بالاندين – «قازاق فەلپسى»

بۇكىل برازيليانى ءبىر مەزەتتە تاڭ قالدىرعان جەڭىسىنەن كەيىن ماماندار مەن سپورت شولۋشىلارى دميتري ءبالانديندى ءبىراۋىزدان «قازاق فەلپسى» دەپ اتاپ كەتتى. وعان سەبەپ 21 جاستاعى ۇلاننىڭ ريودا 200 مەترگە براسس ادىسىمەن ءجۇزۋ ادىسىندەگى سەنساتسيالىق كورسەتكىشى بولسا كەرەك. دەگەنمەن, الماتىلىق جۇزگىش ويىندارعا قۇرالاقان كەلمەگەن. 2014 جىلى وڭتۇستىك كورەيادا وتكەن جازعى ازيا ويىندارىندا 50, 100, 200 مەتردى براسپەن جۇزۋدە ءۇش «التىندى» قاتار العان ول – 2015 جىلى كۆاندجۋدا وتكەن جازعى ۋنيۆەرسيادادا 100 مەترگە براس­پەن جۇزۋدە ءبىر التىن مەدالعا قول جەتكىزگەن. بىراق, كەلگەننەن كەيىن سانكت-پەتەربۋرگتە بولعان حالىقارالىق جارىستا 100 مەترگە براسپەن جۇزۋدە ەكىنشى ورىن الىپ قالدى. ال 200 مەترلىك جارىستا ءۇشىنشى ورىنعا تابان تىرەدى. حالىقارالىق تورەشىلەردىڭ قاتالدىعى سونداي, ازيا قۇرلىعىنداعى تايتالاس­تا 4 التىن العان جۇزگىشتى 50 مەترلىك قاشىقتىقتا «ءتارتىپ بۇزعانى» ءۇشىن جارىستان شىعارىپ تاستادى. ديمانىڭ بار كىناسى جارىس جولىندا باسسەين ەرنەۋىنەن كەرى قايتار كەزىندە ەرەجەگە ساي وڭتايلى بۇرىلماعانى ەكەن. وسىدان كەيىن جانكۇيەرلەر ويلانىپ قالدى. سول قوبالجۋدى ديما ريودا سەرپىلتتى. الايدا, العاشقى تايتالاستاعى 8-ءشى ورنى تاعى ويلاندىرىپ تاستاعان. ال فينالدا جانىن سالدى. بۇل رەتتە ونىڭ سەگىزىنشى جولاقتا جۇزگەنى دە دۇرىس بولعان سياقتى. ەشكىمنىڭ نازارىن اۋدارا قويمايتىن بۇل بەلدەۋدە جارىسۋ وعان ءبىراز ارتىقشىلىق الىپ بەرگەندەي. سونىمەن, دميتري بالاندين نەبارى 3 مينۋتتىڭ ىشىندە ريو-2016 وليمپياداسىنىڭ التىن مەدالىن يەلەندى. سەنساتسيالىق كورسەتكىشكە (2:08,20) قول جەتكىزدى! قازاقستان سپورتشىسى 2015 جىلعى الەم چەمپيونى ماركو كوح پەن ۆيتسە-چەمپيون كەۆين كوردەستى ءتىپتى جۇلدەسىز قالدىردى! الماتىنىڭ «التىن بالاسىن» قالا اكىمى باۋىرجان بايبەك باس بولىپ تاڭسارىدە الماتىعا كەلىپ قونعان حالىقارالىق باعىتتاعى اۆيالاينەردەن توسىپ الدى. قازاقستاننىڭ سپورت تاريحىنداعى جۇزۋدەن تۇڭعىش وليمپيادا چەمپيونىنا لايىقتى قۇرمەت كورسەتىلدى. ال بۇل كەزدە ناعىز فەلپس, ياعني امەريكالىق جۇزگىش مايكل فەلپس ريودا وليمپيا ويىندارىنىڭ 23 رەت چەمپيو­نى (!) اتاعىن الىپ, مارقايىپ وتىرعان. مۇنداي وقيعا وليمپيادا تاريحىندا بولماعان! ديما – 21 جاستا, مايكل – 31 جاس­تا. مايكل دە سپورتتا تالاي سۇرىنگەن, بىراق ورنىنان تەز تۇرعان. ول «قازاق فەلپسىنە» ساباق بولارى ءسوزسىز. مەدال جاعىنا كەلسەك, بۇل فەلپس افينادا, 19-عا قاراعان جاسىندا وليمپيادانىڭ 6 التىن مەدالىن جەڭىپ العان. قازىر ديمادا وليمپيادانىڭ سوڭعى التىنىن قوسقاندا, 5 التىن مەدال بار. سوڭعى دەرەك: فەلپستىڭ بويى – 1,93 مەتر, سالماعى – 88 كگ, قوس قۇلاشىنىڭ جازىلعانداعى ۇزىندىعى – 201 سم. دميتري بالاندين كورسەتكىشتەرىنىڭ وسى ولشەمدەرگە سايكەس كەلىپ تۇرعانىن قاراڭىزشى. ايتپاقشى, ديمانىڭ ريودا وزىنە جانكۇيەرلىك ەتىپ قايتقان اناسى تاتيانا – كونكيمەن سىرعاناۋدان سپورت شەبەرى. اكەسى – يگور بالاندين دە سپورتتان الشاق جۇرگەن جان ەمەس. الماتىدا ۆولەيبول ويىنىنىڭ ءتۇبىن تۇسىرگەندەردىڭ بىرىنەن سانالادى. چەمپيوننىڭ وتباسى وسىنداي! تالعات ءسۇيىنباي, «ەگەمەن قازاقستان» الماتى