تۇركيا ەاەو-عا مۇشە بولۋعا نيەت ءبىلدىردى

تۇركيا ەۋرازيالىق ەكونوميكالىق وداققا قوسىلۋعا نيەت ءبىلدىرىپ وتىر. بىراق ول مۇنى ءوزىنىڭ ەۋروپا وداعىمەن قارىم-قاتىناسىنا زالال كەلمەيتىندەي ەتىپ جاساعىسى كەلەدى. Daily Sabah گازەتىنىڭ جازۋىنشا, بۇل تۋرالى تۇركيانىڭ ەكونوميكا ءمينيسترى نيحات زەيبەكچي مالىمدەگەن. «2015 جىلعى 24 قاراشادا رەسەيدىڭ ۇشاعى جويىلىپ جىبەرىلگەنگە دەيىن ءبىز بۇل جونىندە رەسەيمەن كەلىسىم جاساسىپ جاتقانبىز. رەسەي پرەزيدەنتى ءپۋتيننىڭ تۇركياعا سوڭعى ساپارى كەزىندە ءبىز رەسەي ەكونوميكا مينيسترىمەن بىرگە ەركىن ساۋدا ايماعىن قۇرۋ تۋرالى نەگىزدەمەلىك كەلىسىمگە قول قويعانبىز. ەندى سول كەلىسىمدى جالعاستىرىپ, مۇمكىندىگىنشە تەزىرەك اياقتاعىمىز كەلەدى», - دەدى زەيبەكچي. ونىڭ ايتۋىنشا, ەركىن ساۋدا ايماعى قىزمەت كورسەتۋ مەن ينۆەستيتسيانىڭ ءبىرىنشى سەكتورىن قامتيتىن بولادى. بۇدان ءارى تاراپتار مۇندا ونەركاسىپ ءوندىرىسىن, سونىڭ ىشىندە اۋىل شارۋاشىلىعى سەكتورىن كىرگىزۋدى جوسپارلاپ وتىر. سونىمەن قاتار, زەيبەكچي تۇركيا ءوزىنىڭ ەۋروپا وداعىمەن بايلانىسىنا زالال كەلمەيتىندەي شارت ارقىلى ەاەو-عا مۇشە بولۋعا دا قارسى ەمەس ەكەنىن جەتكىزدى. «رەسەي قۇرامىنا بەلارۋس, قىرعىزستان, قازاقستان جانە ارمەنيا كىرەتىن ەۋرازيالىق كەدەن وداعىن باسقارادى. ارينە, ءبىز ەۋرازيالىق كەدەن وداعىندا بولعىمىز كەلەدى. الايدا, ول تۇركيانىڭ ەۋروپا وداعىنا كىرۋ ۇدەرىسىنە كەدەرگى كەلتىرمەيتىندەي بولۋى كەرەك», دەدى ول. مۇرات ايتقوجا