قارۋ ۇرلاعان قانىشەرلەر ۇستالدى

2009 جىلدىڭ 17 قىركۇيەگىندە بەلگىسىز ءبىر توپ ادام «سۇڭقار» اڭشىلىق دۇكەنىنە شابۋىل جاساپ, كوپتەگەن قارۋ, ونىڭ ىشىندە: كارابين, ۆينتوۆكا, پنەۆماتيكالىق تاپانشا, وق-دارىلەر, سونداي-اق, وپتيكالىق كوزدەۋىشتەر, جاۋىنگەرلىك گراناتالاردىڭ ساقينالارى مەن 4 دانا راتسيانى جىمقىرىپ كەتكەن بولاتىن. سول كەزدە-اق بۇل وقيعاعا قاتىستى پوليتسيا قك 255-ءبولىمىنىڭ 3-تارماعىمەن قىلمىستىق ءىس قوزعاعان ەدى. الايدا, امال نە, قاپتاعان پوليتسەيلەر قاۋىپتى قىلمىسكەرلەردى انىقتاۋ ماقساتىندا ۇزاق ۋاقىت بويى ارنايى جەدەل-ىزدەستىرۋ شارالارىن جۇرگىزسە دە قاراقشىلار تابىلمادى. سونان سەرگەلدەڭگە تۇسكەن ءىز كەسۋشىلەر ءبىزدىڭ عانا ەمەس, كورشى مەملەكەتتەردەگى قارۋ ساتۋمەن اينالىساتىن دۇكەندەردى قاراپ, سونداي-اق, بۇرىن قارۋ قولدانۋمەن سوتتالعان ادامداردى مۇقيات تەكسەرىسكە الدى. بىراق ناتيجە بولا قويمادى. اقىرى ارادا ءبىر جىل وتكەندە الگى ۇرلىقتىڭ قاسىرەتى كورىندى, 2010 جىلدىڭ 7 تامىزىندا كوكشەتاۋ قالاسىنداعى جەكە كاسىپورىننىڭ ەكى كۇزەتشىسى ولتىرىلگەن اسا قاتىگەزدىك قىلمىس تىركەلدى. ساراپتامالار قورىتىندىسى كۇزەتشىلەر جوعارىدا ايتىلعان «سۇڭقار» دۇكەنىنەن ۇرلانعان قارۋلارمەن اتىلعانىن كورسەتتى. بۇل وقيعا بويىنشا دا تاعى دا قىلمىستىق ءىس قوزعالدى. بىراق ۋاقىت سىرعىپ جاتتى. بەيبىت كۇندە ۇرلانعان ءبىر قويما قارۋدىڭ ىزىنە پوليتسيا تۇسە المادى. تەك ارادا بىرنەشە جىل وتكەن سوڭ عانا ۇستىمىزدەگى جىلدىڭ مامىر ايىن­دا, كوكشەتاۋ قالاسىنىڭ شەتىندەگى قالىڭ بۇتالار ىعىندا ەكى ادامنىڭ بەلگىسىز قارۋمەن نىسانا اتىپ جاتقانى بايقالىپ قالدى. الگىلەردى قۇرىقتاپ تەكسەرە كەلگەندە ولاردىڭ 2009 جانە 2010 جىلدارى جوعارىدا اتالعان قىلمىستارعا قاتىسى بارلىعى جانە مۇنىڭ قالاي جۇزەگە اسىرىلعانى انىقتالىپ شىعا كەلدى. مىنە, ءسويتىپ, ويدا-جوقتا ۇمىت بولا جازداعان قىلمىس اشىلدى. اقمولا وبلىسى