ىنتىماقتاستىقتىڭ جاڭا جولدارى

تەل-اۆيۆتە قازاقستان رەسپۋبليكاسى قور­عا­نىس ءمينيسترىنىڭ يز­رايل­گە رەسمي ساپارى شەڭبەرىندە ەكى ەلدىڭ قور­عا­نىس ۆەدومستۆولارى باس­شىلارىنىڭ كەزدەسۋى ءوتتى. ءبىرىنشى كەزەكتە يمانعالي تاسماعامبەتوۆ اۆيگدور لي­بەر­ماندى قورعانىس ۆەدوم­ستۆوسىنىڭ باسشىسى لاۋازىمىنا تاعايىندالۋىمەن قۇتتىقتاپ, وعان مەملەكەتتىڭ اسكەري قاۋىپسىزدىگىن نىعايتۋ ىسىندە ساتتىلىك تىلەدى. قازاقستان قورعانىس مينيس­ترلىگى باسشىسىنىڭ ايتۋىنشا, ەلدەرىمىزدىڭ اراسىنداعى ديپلوماتيالىق قارىم-قاتى­ناس باستالعالى شيرەك عاسىرعا تاياپ قالىپتى. وسى جىلدار ىشىندە وراسان جۇمىس اتقارىلدى. قازاقستان مەن يزرايل اراسىندا بارلىق سالادا تىعىز ىنتىماقتاستىق رەتكە كەلتىرىلدى. «وزدەرىڭىز بىلەتىندەي, كەز كەلگەن مەملەكەتتىڭ ءتيىمدى دامۋىنىڭ نەگىزگى شارتى ونىڭ قاۋىپسىزدىگى بولىپ تابىلادى. سىزدەردىڭ ەلدەرىڭىزبەن قورعانىس سالاسىنداعى قارىم-قاتىناستى دامىتۋعا مۇددەلى ەكەنىمىز زاڭ­دىلىق. ول ءۇشىن بىزدە اسكەري-تەحنيكالىق ىنتىماقتاستىق اياسىنداعى مىقتى قۇقىقتىق بازا بار», – دەدى يمانعالي تاسماعامبەتوۆ. دوستىق راۋىشتە وتكەن كەزدەسۋدە قازاقستان مەن يزرايل قورعانىس ۆەدومستۆولارىنىڭ باسشىلارى ءوزارا مۇددەلىلىكتەن تۇراتىن, ونىڭ ىشىندە, ەكىجاقتى قارىم-قاتىناسقا قاتىستى ماسە­لەلەردى تالقىلادى. ارميامىز جاۋىنگەرلىك دايارلىق بويىنشا ۇتقىرلىق پەن تيىمدىلىك دەڭگەيىن دامىتۋ جولىندا ىلگەرىلەپ كەلەدى. وسىعان وراي, داعدارىستىق دەن قويۋ وپەراتسيالارىنا ارنالعان ارناۋلى ماقساتتاعى ارميا كۇشتەرىن تارتۋ اياسىنداعى يزرايلدىك تاجىريبەنى زەردەلەۋ بەلگىلەنگەن ماقساتتاردى ىسكە اسىرۋ ءۇشىن بىرەگەي تۇعىر­نامادان تۇرادى. سونداي-اق, قاۋىپسىزدىك اياسىندا اقپارات الماسۋ ماڭىزدى باعىتتاردىڭ ءبىرى بولىپ تابىلادى. جوعارى تەحنولوگيالىق قارۋ-جاراقتى ءوندىرۋ بويىنشا ماسەلە قارالدى. كەزدەسۋ بارىسىندا قازاق­ستان­داعى يزرايلدىك تەحنولوگيا بويىنشا ۇشقىشسىز ۇشۋ اپپاراتتارىن (ۇۇا) بىرلەسىپ شىعارۋ جونىندە ۋاعدالاستىققا قول جەتكىزىلدى. اسكەري جانە ازاماتتىق ماقساتتاردا ۇۇا قول­دانۋدىڭ الەمدىك تاجىريبەسى كورسەتىپ وتىرعانداي, تاكتيكالىق ۇۇا قۇراستىرىپ شىعارۋ جانە تەحنيكالىق سۇيەمەلدەۋدى ۇيىم­داستىرۋ قاجەتتىلىگى تۋىندايدى. «اتالعان جوبا ءتيىستى تەحنولوگيالاردى العان جانە مامانداردى وقىتقان جاعدايدا ۇۇا قۇراستىرىپ ءوندىرۋ جانە سەرۆيستىك قىزمەت كورسەتۋدى ۇيىم­داستىرۋ ءۇشىن قاجەتتى ءون­دىرىس قۋاتى مەن كادرلىق الەۋە­تى بار استاناداعى اۆياتسيالىق-تەحنيكالىق ورتالىقتا ىسكە اسىرىلاتىن بولادى», – دەدى قازاق­ستاننىڭ قورعانىس ءمينيسترى كەزدەسۋ بارىسىندا. ودان باسقا, يزرايلدىك ۇۇا وپەراتورلارىن دايىنداۋ ور­تالىعىنىڭ بازاسىندا قازاق­ستاندىق اسكەريلەردى وقى­تىپ-ۇيرەتۋ بويىنشا كەلىسىم بار. ءوز كەزەگىندە, ءيزرايلدىڭ قورعانىس ءمينيسترى بۇل ساپار قورعانىس ۆەدومستۆولارىنىڭ ءوزارا ءىس-قيمىلىنىڭ ءارى قاراي دامۋىنا جاعىمدى ىقپال ەتەتىنىن اتاپ ءوتتى. «بارلىق كونفەسسيالار مەن ۇلتتار بەيبىت ءومىر ءسۇرىپ جاتقان ەل رەتىندە قازاقستاندى جوعارى باعالايمىز. مۇنىڭ بارلىعى قازاقستان رەسپۋبليكاسى پرەزي­دەنتىنىڭ سارابدال ساياساتىنىڭ ارقاسىندا. اسكەري-تەحنيكالىق ىنتىماقتاستىققا قاتىستىنىڭ ءبارىن ءبىز قولدايمىز جانە بەل­گىلەنگەن جوسپارلاردى ىسكە اسىرۋ ءۇشىن بارلىق قولدان كەلەتىن نارسەنى جاساۋعا تىرى­سامىز. زاماناۋي سوعىستىڭ الدىڭعىدان ايىرماشىلىعى ار­ميانىڭ ءدال­دىگى جوعارى قارۋىنسىز ءساتتى بولا المايتىنىمەن بايلانىستى», – دەدى اۆيگدور ليبەرمان. رەسمي ساپار اياسىندا قازاق­ستان رەسپۋبليكاسى قورعا­نىس ءمينيسترىنىڭ باسشىلىق ەتۋىمەن قازاقستاندىق اسكەري دەلەگاتسيا بىرقاتار الەمدىك اسكەري تەحنيكا ءوندىرۋشى كومپانيالارعا باردى. «Elbit Systems» ءارتۇرلى قارۋ-جاراق تۇرلەرىن, اۆيونيكا, راديولوكاتسيا جۇيەلەرىن دايىندايدى جانە جاڭعىرتادى, سونداي-اق, عارىشتىق بارلاۋ جەر سەرىكتەرىن ازىرلەپ شىعارادى. ال «Rafael» كومپانياسى اۋە شابۋىلىنان قورعانىس جۇيەلەرىنىڭ زىمىران جانە اۆياتسيالىق تەحنولوگيا­لارىن, تاكتيكالىق زىمىران قارۋىن جاسايدى. ساۋلەبەك ءبىرجان