« ۇلى دالا ەلى» ەتنوفەستيۆالى

ەرلىك پەن ەلدىكتى ارقاۋ ەتتى پاۆلودار وبلىسىندا 19-20 تامىز كۇندەرى قازاقستان رەسپۋبليكاسىنىڭ 25 جىلدىعىنا ارنالعان « ۇلى دالا ەلى» ەتنوفەستيۆالى ءوتتى. باياناۋىل اۋدانى ەسكەلدى شاتقالىندا بەلگىلى اقىن, ەتنوگراف, تاريحشى, فولكلورتانۋشى ءماشھۇر ءجۇسىپ كوپەي ۇلىنىڭ كەسەنەسى ورنالاسقان. – قاسيەتىمەن حالقىنا قور­عان, وسيەتىمەن ۇرپاققا تۇعىر بولعان بابامىزدىڭ بۇل مەكەنى – جىل ون ەكى ايدا تاعزىم ەتىپ كەلۋشى جاماعاتتان ۇزىلگەن ەمەس. سوندىقتان ءماشھۇر بابامىزدىڭ كەسەنەسى جانىندا قوناقۇي كەشە­نىن اشۋ وتە قاجەت بولدى, – دەدى پاۆلودار وبلىسىنىڭ اكىمى بو­لات باقاۋوۆ. – ءماشھۇر ءجۇسىپ بابامىزدىڭ ۇلت تاريحىندا ورنى بيىك. وسىنداي تۇلعالاردى ءدارىپ­تەۋ, ناسيحاتتاۋ قاجەت. الداعى ۋاقىتتا, وسى مەكەندى ودان ءارى دامىتۋ قاراستىرىلىپ وتىر. «ەسكەلدى» قوناقۇي كەشەنى 40 ادامعا ارنالعان بولمەلەرى بار ەكى قاباتتى عيمارات. مۇندا اسحانا جانە ۇلى ويشىلدىڭ مەموريالدىق مۇراجايى اشىلدى. كەشەن قۇرىلىسىنا «KAZENERGY» اسسوتسياتسياسى دەمەۋشىلىك ەتتى. قۇرىلىس قۇنى 30 ملن تەڭگەنى قۇرادى. ونىڭ قۇرىلىسىن «سترويمەحسەرۆيس» جشس كومپانياسى جۇرگىزدى. « ۇلى دالا ەلى» ەتنوفەستيۆالى اياسىندا وبلىس ورتالىعىندا قازاق حالقىنىڭ داڭقتى باتىرى مالايسارى تارحانعا ەسكەرتكىش قويىلدى. ەسكەرتكىشتىڭ اشىلۋ سالتاناتىنا پاۆلودار وبلىسىنىڭ اكىمى بولات باقاۋوۆ, «مالايسارى تارحان» قوعامدىق قورىنىڭ پرەزيدەنتى تيتو سىزدىقوۆ, تۇڭ­عىش قازاق عارىشكەرى توقتار اۋباكىروۆ جانە باسقا دا قۇرمەتتى قوناقتار قاتىستى. ەسكەرتكىشتىڭ اۆتورى – بەلگىلى ءمۇسىنشى بولات قۇسايىنوۆ. ەسكەرتكىش بىرنەشە ساۋلەت ەلەمەنتىنەن قۇرالعان ءبىرتۇتاس كومپوزيتسيادان تۇرادى. كومپوزيتسيانىڭ ءبىرىنشى بولىگىن – بيىكتىگى 60 سم ءتورت  باسپالداق, ەكىنشى بولىگىن – بيىكتىگى 4,4 مەتر ءۇش باسپالداقتى تۇعىر, ءۇشىنشى بولىگىن – بيىكتىگى 5 مەتر مىستان جاسالعان تۇلپاردىڭ ۇستىندەگى باتىردىڭ تۇلعاسى قۇرايدى. ەسكەرتكىشتىڭ قۇرىلىسىنا تەگىستەلگەن تابيعي گرانيت پايدالانىلعان. ەتنوفەستيۆالدىڭ نەگىزگى شارالارى وبلىس ورتالىعىنا ءىر­گەلەس كەنجەكول اۋىلى ماڭىنداعى وزەن اڭعارىندا جالعاستى. دۋمانعا رەسەي فەدەراتسياسىنان, قىرعىز رەسپۋبليكاسىنان جانە موڭعول حالىق رەسپۋبليكاسىنان كەلگەن قانداس اعايىندار مەن قۇرمەتتى قوناقتار قاتىستى. ەتنواۋىلدا ەلۋگە جۋىق كيىز ءۇي تىگىلىپ, داستارقان جايىلدى. قوناقتار ۇلتتىق تاعامداردان ءدام تاتتى. سونىمەن قاتار مۇندا قول­ونەر بۇيىمدارىنىڭ  كورمە-جارمەڭكەسى دە كوپشىلىك كوڭىلىنەن شىقتى. ايماقارالىق «كانەكي, سويلە, قىزىل ءتىل» اتتى اقىندار ايتىسى ۇيىمداستىرىلدى. ال «قۇلاگەر» يپپودرومىندا ءوت­كىزىلگەن ءدۇبىرلى الامانعا پاۆ­لودار, الماتى, شىعىس قازاقستان وبلىستارىنان  قىرىققا جۋىق سايگ ۇلىك قاتىستى. بايگەنىڭ باس جۇلدەسىنە جەڭىل اۆتوكولىك قويىل­دى. فەستيۆال  پاۆلودار قالاسىنىڭ ورتالىق جاعاجايىندا وتكەن گالا-كونتسەرتپەن اياقتالدى. كونتسەرتكە بەلگىلى  كۇيشى ايگۇل ۇلكەنباەۆا, تانىمال ءانشى ايگۇل قوسانوۆا, «تۇران» ەتنو-فولكلورلىق توبى جانە «قوڭىر» ەتنوتوبى قاتىستى. «ەگەمەن-اقپارات»