ورنەكتى ءسوز, ءورىستى وي

قازاق جۋرناليستيكاسىندا وزىندىك بەت-بەينەسى بار نۇرتورە ءجۇسىپتىڭ تاياۋدا عانا «مىڭ قۇمىرسقا جانە ءبىز» اتتى پۋبليتسيستيكالىق ماقالالاردان تۇراتىن جاقسى كىتابى جارىق كور­دى. پرەزيدەنت سىيلىعىنىڭ لاۋرەاتى, «قۇرمەت» وردەنىنىڭ يەگەرى, ويى ۇشقىر, قالامى قارىمدى ازامات­تىڭ كىتابىنا العىسوزدى سەناتور, قازاقستان جازۋشىلار وداعى باسقارماسىنىڭ توراعاسى نۇرلان ورازالين جازعان ەكەن. شاعىن عانا تىلەك سوزدە كورنەكتى اقىن, تاۋەل­سىزدىكتىڭ تاعىلىمدارىن, ۇلتتىڭ ازاتتىق جولىنداعى قارىزى مەن پارىزىن تەرەڭىنەن تەربەگەن اۆتور­دىڭ اتاۋلى دۇنيەلەرىن جان-جاق­تى تالداي كەلىپ, «جۋرناليست نۇرتورە ءجۇسىپتىڭ ءوز جانە وزگە دە تۇس­تاستارىنان ەرەكشەلەنىپ تۇرا­تىن ءبىر قاسيەتى – كەز كەلگەن ماسە­لەنى كوركەم وي, كەستەلى تىلمەن جەت­كىزە بىلۋىمەن قاتار, كوتەرىلگەن ماسە­لەنىڭ شەشىمىن كورسەتەتىن ناقتى ۇسى­نىستار ايتا بىلەتىندىگى دەر ەدىم», دەيدى. شىنىندا, ارىپتەسىمىزدىڭ وسى جيناقتاعى قاي ماقالاسىن الساڭ دا  قابىرعالى وي ايتىپ, ەلىمىزدىڭ ەڭسەلى ىستەرىن ماقتان ەتىپ, كەي تۇستاعى ءات­تەگەن-ايلارىمىزدى دا اشىپ كورسەتەدى. «قازاقتىڭ كۇنى» دەپ اتالاتىن بولىمدە ازات ەلىمىزدىڭ ءتىر­لىك تىنىسى, ەلباسى نۇرسۇلتان نازارباەۆتىڭ كەمەل ساياساتىنىڭ نەگىزىندە اتقارىلعان ىستەر ناقتى دالەل-دايەكتەرمەن بەرىلىپ وتىرادى. مىسالى, ەلدىڭ بىرلىگى تۋرالى وي قوزعايتىن «بولىنگەن – بىرەۋگە جەم بولادى» دەگەن پۋبليتسيستيكالىق ماقالاسىندا ءار قازاقتىڭ پەندەلىككە سالىنباي, كەڭدىكتە قىزمەت ەتۋ قاجەتتىگىن اتاپ, «بولىنگەن – بىرەۋگە جەم بولادى. بولىنبەگەن – باسقا ەلمەن تەڭ بولادى», دەپ ءتۇيىن جاسايدى. ال ءار جىل سايىن استانادا ەلباسى جۇلدەسى ءۇشىن ءوتىپ كەلە جاتقان «قازاقستان بارىسى» تۋرالى تولعامىندا ۇلتىمىزدىڭ ايتۋلى ۇلاندارى ا.نۇعىماروۆ, ب.ىستىباەۆ, وزگە دە جۇرەكتى دە بىلەك­تى ۇلدارىمىزدىڭ ابىرويلى ءىسىن كەلىستى ءتىل, كوركەم ويمەن ايتا كەلىپ, سوڭىندا «جەڭىلگەندى جەر كوتەرەدى, جەڭگەندى ەل كوتەرەدى» دەيدى. كىتاپتاعى ۇلت زيا­لىسى وزبەكالى جانىبەكوۆتىڭ ءوز قولىمەن تىككەن ساۋكەلەسىن ىزدەۋى دە ىزگىلىكتى ءىس. ول تۋرالى كەزىندە بەلگىلى جۋرناليست قالي سارسەنباي جازعان ەكەن. وسى قۇندى جادىگەردى تاۋىپ, كەيىنگىگە ۇلگى كورسەتسەك دەگەن نيەتى قۇپتارلىق. ەكىنشى ءبولىم «زامانداس» دەپ اتالادى. وتانىمىزدىڭ وركەندەۋىنە, رۋحاني جاعىنان كەمەلدەنۋىنە ءوز ۇلەستەرىن قوسقان كەشەگى ايتۋلى اقاڭ – اقسەلەۋ سەيدىمبەك, كورنەكتى جازۋشى دۇكەنباي دوسجان, ابزال ازامات مۇسا پاتتەەۆ جايلى جازبالاردان الار ۇلگى مولىنان. اسىرەسە, اقاڭ ايتقان اسىل سوزدەگى ءيىرىمدى ويلار, ىلكىم بايلامدار كىمدى دە بولسا بەيجاي قالدىرمايدى. سول سەكىلدى بۇگىنگى بەلگىلى عالىم س.قوزىباەۆ, وتانىمىزدىڭ قا­رىش­تاپ دامۋىنا ءوز ۇلەستەرىن قو­سىپ كەلە جاتقان س.ۇمبەتوۆ, ءا.جاق­سىبەكوۆ, وزگە دە قايراتكەرلەر تۋرالى سا­راپتامالارى, قازاقستاننىڭ حالىق ءارتىسى د.جولجاقسىنوۆتىڭ شىعارماشىلىعىنا ارنالعان تالداۋى, ارىپتەسى ق.سارسەنبايعا, قا­لام­گەر زامانداستارى ت.شاپايعا, ج.شاشتاي ۇلىنا باعىتتاعان ماقالا­لارى ادەمى وقىلادى. جالپى, كىتاپتىڭ سوڭعى بايلام سوزىندە اۆتور ىرگەلى ەلگە ىرىتكى تۇسىرمەۋ, ىشكى بىرلىككە بەرىك بولۋ, وسى ارقىلى قازاقتىڭ بەدەلىن كوتەرۋگە بولاتىنىن ايتىپ: «ەي, ۋاقىت! ەي, زامان! كوزىڭدى اشىپ قازاققا قارا: ەسكەن جەلدەي, كوشكەن سەڭدەي, قيىندىقتى ەڭسەرىپ, قايراتتى جيىپ, بەلسەنىپ, ءبىز كەلەمىز!» دەپ ەل تاۋەلسىزدىگىنىڭ 25 جىلدىعىن اتاعالى وتىرعان ۇلتتىڭ بۇگىنگى تىنىس-ءتىر­شىلىگى الدا دا جالعاسىن تاۋىپ, ۇرپاقتار ساباقتاستىعى ۇلىقتالا بەرەتىنىن العا تارتادى. سۇلەيمەن مامەت, «ەگەمەن قازاقستان»