كونە تۇركى ەسكەرتكىشتەرىن زەرتتەۋگە مۇمكىندىكتەر مولايا ءتۇستى

ۇلان-باتىر قالاسىندا حالىقارالىق تۇركى اكادەمياسىنىڭ (TWESCO), موڭعوليا عىلىم اكادەمياسىنىڭ جانە «ەگەمەن قازاقستان» رەسپۋبليكالىق گازەتىنىڭ ۇيىمداستىرۋىمەن ءوتىپ جاتقان «ءتاڭىرتاۋدان وتۇكەنگە دەيىن: ۇلى دالا كوشپەندىلەرىنىڭ تاريحي-مادەني قازىنالارى» اتتى II حالىقارالىق ەكسپەديتسياسىنىڭ ءۇشىنشى كۇنگى جۇمىسى ارىپتەستىك مەموراندۋمىنا قول قويۋمەن جانە ماراپاتتاۋ راسىمىمەن جالعاسىن تاپتى. تۇسكە دەيىن موڭعوليا ۇلتتىق مۋزەيىندەگى جۇمىسپەن تانىسىپ شىققان دەلەگاتسيا مۇشەلەرى موڭعوليا عىلىم اكادەمياسىنىڭ جەتەكشىلەرىمەن كەزدەستى. كەزدەسۋ بارىسىندا موڭعوليا عىلىم اكادەمياسى جانە تۇركى اكادەمياسىمەن بىرلەسكەن ارىپتەستىك مەموراندۋمىن بەكىتتى. دەمەك, ەندىگى جەردە تۇركىتىلدەس مەملەكەتتەر عالىمدارىنىڭ موڭعوليا اۋماعىندا قالعان بالبال تاستار تاريحىن تەرەڭ زەرتتەپ, تانىپ-بىلۋگە مۇمكىندىكتەر مولايا ءتۇستى. جيىنعا قاتىسقان ەكسپەديتسيا مۇشەلەرى سوڭعى جىلدارى تۇركى الەمىنىڭ ءوزارا ىنتى­ماقتاستىعى نىعايىپ كەلە جاتقانىنا توقتالا كەلىپ, تۇركىلەر تۇلپارىنىڭ تۇياعى جەتكەن ەۋرازيا قۇرلىعىنىڭ باتىسى مەن شىعىسىندا جاتقان تاڭبالى تاستاردى كوزدىڭ قارا­شىعىنداي ساقتاپ وتىرعانى ءۇشىن موڭعول جۇرتىنا مىڭ العىس ءبىلدىردى. ال جيىن سوڭىنا قاراي بىرقاتار موڭعول عالىمدارى مەن اكادەميكتەرى تۇركى اكادە­مياسىنىڭ ارنايى سىيلىقتارىنا يە بولدى. اتاپ ايتقاندا, كورنەكتى شىعىستانۋشى, موڭعولتانۋشى عالىم, موڭعوليا عىلىم اكادە­مياسىنىڭ اكادەميگى شاگدارىن بي­راعا اكادەميانىڭ ارنايى التىن مەدالى تابىس ەتىلىپ, حالىقارالىق موڭعولتانۋ قاۋىمداستىعىنىڭ باس حاتشىسى دومين تومورتوگونىڭ يىعىنا قازاقشا شاپان جابىلدى. كەشە ەكسپەديتسيا مۇشەلەرى تۇركى اكادەمياسى مەن موڭعو­ليانىڭ ورتالىق مۇراعات باس­قارماسى اراسىنداعى ەكىجاقتى ىنتىماقتاستىق تۋرالى مەموراندۋم بەكىتۋ راسىمىنە قاتىستى. بۇل قۇجات كەلەشەكتە ەكى ۇيىمنىڭ ارحيۆ ءىسى جانە قۇجات الماسۋ سالالارىندا تىعىز بايلانىس ورناتىپ, ءوزارا عىلىمي دەرەكتەر الماسۋعا, سونداي-اق بىرلەسكەن جوبالاردى جۇزەگە اسىرۋعا مۇمكىندىك بەرەدى. قۇجاتقا سايكەس, كاسىبي تاجىريبەدەن وتكىزۋ ماقساتىندا مامان الماسۋ ماسەلەسى دە قاراس­تىرىلعان. مەموراندۋمعا قول قويۋ سالتاناتىنا TWESCO-نىڭ حالىق­ارالىق ەكسپەديتسيا قۇرا­مىنداعى قوعام قايراتكەرلەرى مەن كورنەكتى عالىمدار, جۋرناليستەر قاتىستى. قۇجاتقا قول قويۋ راسىمىنەن كەيىن موڭ­عوليانىڭ ورتالىق مۇراعات باسقار­ماسى­نىڭ باس­تىعى, تاريح عىلىمدارىنىڭ دوكتورى يشجامتس سارۋل مىرزا كوشپەلى وركەنيەت تاريحىن زەرتتەۋگە قوس­قان ۇلەسى مەن دە­رەكتانۋشىلىق ەڭبەگى ءۇشىن اكادەميانىڭ كۇمىس مەدالىمەن ماراپاتتالدى. نۇرلىبەك دوسىباي, «ەگەمەن قازاقستان» – موڭعوليادان