سىن ورىندى. سىنالعاندار نە دەر ەكەن؟

بەلگىلى جۋرناليست جىلقىباي جاعىپار ۇلىنىڭ «دەۆياتكودان دۇيسەنوۆاعا دەيىن» اتتى ماقالاسى مەنى دە قولىما قالام الۋعا ماجبۇرلەپ وتىر. ويتكەنى گازەت بەتىندە جاريالانعان ماقالا ءوزىنىڭ وتكىرلىگىمەن جانە رەسپۋبليكاداعى مە­دي­تسينالىق قىزمەتتىڭ كەم­شىلىكتەرىن ەش بۇك­پە­سىز بايانداۋىمەن وي سالدى. تاۋەلسىزدىگىمىزدىڭ شيرەك عا­سىرلىق مەرزىمى ىشىندە دەن­ساۋ­لىق ساقتاۋ ءمينيسترى بولىپ جەتى بىردەي ادام ىستەگەن ەكەن. ال وسى مينيسترلەر وسى زامانعا جاۋاپ بەرەرلىك, حالىق مۇددەسىنە ساي, دەنساۋلىق ساقتاۋ باعىتىندا ىلگەرى باسارلىقتاي رەفورمالار جۇرگىزە الدى ما؟ ماقالادا ءار ءمينيستردىڭ ءوزىن­شە جاساعان جۇمىستارى تە­رەڭ تالدانىپ, وتكىر سىنعا الىن­دى. مىندەتتى الەۋمەتتىك مەدي­تسينالىق ساقتاندىرۋ تۋرالى زاڭ قابىلدانعانىمەن, ول سەبەپتەن سەبەپسىز تۇرالاپ بارىپ, توقىراپ توقتاپ قالعان. بۇكىلحالىقتىق قور قۇرىلىپ, وعان جۇزدەگەن مىڭ ادام قالتالارىنان قارجى قۇيعان. قور باسشىسى الاياق ت.يمانباەۆ دەگەن قورعا تۇسكەن قارجىنى تىك كوتەرىپ الىپ, شەتەلگە قاشىپ كەتكەن. ودان تاپا-تال تۇستە كوز جازىپ قالعان باسشىلىق سىرتتاي توعىز جىلعا سوتتاعان. بۇل كادىمگى «جاۋ كەتكەن سوڭ قىلىشىڭدى تاسقا شاپتىنىڭ» كەرى عوي. قازاقتىڭ «قازاننان قاقپاق كەتسە, يتتەن ۇيات كەتەدى» دەگەنى وسىنداي يەسىزدىك پەن باسسىزدىققا قاراتا ايتىلسا كەرەك. سوندا باس ۇرى ۇستالماي كەتكەنمەن, ونىڭ وسىندا قالعان سىبايلاستارى كۇنى بۇگىنگە نەگە جاۋاپقا تارتىلماعان؟ مۇلدەم تۇسىنىكسىز جايت. جۋرناليست جەكەمەنشىك ەمدەۋ ورىندارىنداعى ءوز كوزىمەن كور­گەن, باسىنان وتكەرگەن كەلەڭ­سىز­دىكتى, ناۋقاستىڭ قالتاسىن قاعۋ قيتۇرقىلىعىن ورىندى ءسوز ەتەدى. مەنىڭشە, بۇل جۇگەنسىزدىككە بيلىك­تەگىلەر تاراپىنان ءبىر توسقاۋىل بولماي ما دەگەن وي كەلەدى. مەديتسينا سالاسىندا ءبىلىمسىز عالىمداردىڭ ءورىپ جۇرگەندىگىن مەن دە كەزىندە ءوز كوزىممەن كورگەن اداممىن. ۇيات تا بولسا ايتايىن, اتا­عى اسپانداپ تۇرعان استاناداعى ءبىر ەمدەۋ مەكەمەسىندە 2011 جىلى ون كۇن جاتىپ شىققانىم بار. جاڭىلماسام, عىلىم دوكتورى باس­قاراتىن بولىمشەدە جاتتىم. سوندا الگى قارىنداسىم: «وڭ جاق وك­­پەڭىزدە راك بار, وعان وتا جاسايمىز», دەدى. سودان ول ۇكىمنىڭ تۋرا ءولىم ەكەندىگىن ءبىلىپ, ال­ماتىعا ساپار شەكتىم. ون­دا­عىلار بۇل دياگ­نوزدى تە­رىسكە شىعاردى. اگاراكي بۇلاردىڭ ءامىرىن ورىنداسام, مەن بۇگىن ج.جاعىپار ۇلىنىڭ اسا كوكەيكەستى ماقالاسىنا ءۇن قوس­پاعان بولار ەدىم. ال مۇنداي شالا ساۋاتتى عالىمداردىڭ مىسالدارى ءبىزدىڭ ەلىمىزدە مىڭداپ سانالادى. ادام ومىرىمەن بۇلاي ويناۋعا بولماس بولار. ءسوز سوڭىندا ايتارىم, «ەگەمەن قازاقستان» سياقتى اعا باسىلىمنىڭ كوتەرىپ وتىرعان ماسەلەسى ەڭ قۇرى­عاندا اتالمىش مينيسترلىكتە وقى­لىپ, تالقىلانسا, ءسويتىپ ناق­تىلى شارا قولدانىلسا, نۇر ءۇستى­نە نۇر بولار ەدى. ويتكەنى ماسە­لە قازاقستاندىقتاردىڭ دەن­ساۋ­لىعىنا تىكەلەي قاتىستى بولىپ تۇر عوي. تولەگەن قاجىباي, قازاقستان جازۋشىلار وداعى اقمولا وبلىستىق فيليالىنىڭ توراعاسى