ۇلتتىق ونىمگە ۇيىتقى

زايسان اۋدانى قارابۇلاق اۋىلىنىڭ كىرەبەرىسىندەگى ەكى مال قوراسى بىردەن كوزگە شالىنادى. بۇل جەردە تاۋارلى-ءسۇت فەرماسى قۇرىلىپ, قازىر سيىر ساۋىپ, قىمىز پىسۋمەن بىرنەشە ادام شۇعىلدانۋدا. فەرما جانىنداعى ۇيگە كىرگەنىمىزدە كۇبى ءپىسىپ جاتقان ەكى كەلىنشەكتى جولىقتىردىق. ولار مارجان ءابدىراحمانوۆا مەن الماگۇل ەڭسەباەۆا دەپ تانىستىردى وزدەرىن. قوس كەلىنشەك كۇنىنە 25 سيىر ساۋادى ەكەن. جيىرماعا تارتا بيە ساۋىپ, قىمىزدى اۋدا­ن تۇرعىندارىنا ساتىپ جاتىر. ءدامى ءتىل ۇيىرگەن قىمىزعا سۇرانىس ۇلكەن. ءتىپتى, اۋداننىڭ قاراتال, قارابۇلاق اۋىلدارى مەن زايساننان الدىن الا تاپسىرىس ءتۇسىپ جاتىر. اعايىندى سەرىك, قايرات, جەڭىس امىرەنوۆتەر باسقاراتىن «مۇراگەر», «امىرە», «امىرەن» شارۋا قوجالىقتارى اۋداننىڭ ەكونوميكاسىنا ەلەۋلى ۇلەس قوسىپ كەلەدى. ال قايراتتىڭ «مۇراگەر» قوجالىعى اۋداندا ءبىرىنشى بولىپ تاۋارلى-ءسۇت فەرماسىن قۇرۋدى قولعا الىپتى. سەرىكتى بۇرىننان تانيمىز. سەكەڭ مەن جۇبايى گاۋحاريانىڭ قىزى اياۋلىم قازاق قىزدارىنىڭ ىشىندە ءبىرىنشى بولىپ سپورتتىڭ ەڭ كۇردەلى ءتۇرى – فريستايلدى مەڭگەرە باستادى. وجەت قىز  ءتورت جاسىندا شاڭعىعا تۇرىپ, ونى يگەرگەن سوڭ فريستايلمەن مىقتاپ شۇعىلداندى. 2010 جىلى ەلىمىزدىڭ جاستار اراسىنداعى ءى قىسقى ويىندارىندا فريستايلدىڭ موگۋل تۇرىنەن جۇپتاسۋدا التىننان القا تاقسا, فريستايل-موگۋلدا ەكىنشى, ال فريستايل-اكروباتيكادا ءۇشىنشى ورىندى يەلەنگەن ەدى. – ەلباسىنىڭ قازاقستان حالقىنا جولداۋىندا تاۋارلى-ءسۇت فەرماسىن قۇرۋ, ادامداردى جۇمىسپەن قامتاماسىز ەتۋ مىندەتى قويىلعانى بەلگىلى. وبلىس اكىمى د.احمەتوۆ وتكەن جىلى اۋداندا بولعان كەزدە تاۋارلى-ءسۇت فەرماسىن قۇرۋدى تاپسىرعان ەدى. بۇل ءىستى قولعا الدىق. 3 جىل بۇرىن كوكپەكتى اۋدانىنان «سيممەنتال» تۇقىمدى 100 سيىر­ ساتىپ الدىق. ال «جابى» تۇقىمدى جىلقى وزىمىزدىكى. قازىر ءسۇتتىڭ ءليترىن 70 تەڭگەدەن ساتۋدامىز. ارتىعى بولسا قۇرت قايناتىپ, ماي الامىز. قۇرت پەن ىرىمشىككە دە سۇرانىس بار. ءىستىڭ كوزىن تاپساڭ, تابىس تابۋعا بولادى. شىنار بەكتەمبەتوۆا جالعىز ءوزى 20 بيەنى ساۋىپ جاتىر. قوجالىقتاعى قىز-كەلىنشەكتەردىڭ بارلىعى ءوز ماماندىعىن شەبەر مەڭگەرگەندەر, – دەدى سەرىك امىرەنوۆ. – اۋداندا ءسۇت زاۋىتى جۇمىس ىستەپ تۇر. ايدار بارىسوۆ باس­قاراتىن  ءسۇت زاۋىتىنىڭ كەلەشەگى بار. پروبلەما – قىس مەزگىلىندە ءسۇت تاپشىلىعى. سول ءۇشىن تاۋارلى-ءسۇت فەرماسىن قۇرعانبىز. ول تولىق قۋاتىنا ەنگەندە قاجەتتى ونىمدەرمەن  اۋدان تۇرعىندارىن قامتاماسىز ەتۋگە مۇمكىندىك تۋادى, – دەيدى اۋدان اكىمى تەمىربەك قاسىمجانوۆ. قازىر قوجالىقتا 500 جىلقى, 500 ءىرى قارا بار. سيىردى 150 باسقا, بيەنى 40-قا جەتكىزۋ مىندەتى تۇر. ەكىنشى مال قوراسىنىڭ قۇرىلىسى اياقتالعان سوڭ جىلقى وسىندا قىستايتىن بولادى. وڭداسىن ەلۋباي, جۋرناليست شىعىس قازاقستان وبلىسى, زايسان اۋدانى سۋرەتتەردى تۇسىرگەن اۆتور