ەرەكشە ماماندىقتىڭ ەرەن مايتالمانى

قوستانايداعى «قازپوشتا» اكتسيونەرلىك قوعامى وبلىستىق فيليالى عيماراتىنىڭ قابىر­عاسىنا حات تاسۋشى, سوتسياليستىك ەڭبەك ەرى بيزادا جيەنعازيناعا ەسكەرتكىش تاقتا ورناتىلدى. تاۋەلسىزدىكتىڭ 25 جىلدىعىمەن قا­تار بيىل قوستانايلىقتار وبلىستىڭ 80 جىل­دىعىن دا اتاپ وتەدى. بيزادا وتەكەيقىزى وبلىستا پوشتا بايلانىسىنىڭ قالىپتاسۋى مەن دامۋىنا اتسالىسقان. ول كەڭەس وداعىندا سوتسياليستىك ەڭبەك ەرى اتاعىن العان 7 پوچتالوننىڭ ءبىرى بولاتىن. ەكى رەت لەنين وردەنىمەن ماراپاتتالدى. بيزادا اپاي 1996 جىلى ومىردەن ءوتتى. بىراق حات-حاباردى, كۇندەلىكتى پوشتانى الىپ, اۋلاعا ك ۇلىمسىرەپ كىرىپ كەلە جاتاتىن ونىڭ جارقىن بەينەسىن قوستانايلىقتار ۇمىتقان جوق. ونىڭ ەسىمىن ماڭگى ەستە ساقتاۋ ماقساتىمەن ەسكەرتكىش تاقتا ورناتۋ تۋرالى باستامانى دا تۇرعىنداردىڭ ءوزى كوتەردى. – بيزادا اپاي اۋا رايى قالاي بولسا دا, گازەت-جۋرنال مەن حات-حابارعا تولى اۋىر سۋمكاسىن يىعىنا اسىپ, ونى ءار ۇيگە كۇندەلىكتى جەتكىزۋگە اسىعاتىن. قازىرگىدەي ين­تەرنەت جوق, ادامدار گازەت-جۋرنالدى كۇندە الاڭداپ كۇتىپ وتىراتىن. ول ناعىز ەڭبەك ادامى ەدى. ول ۋاقىتتا حات تاسۋشىلار بريگاداعا ءبولىنىپ, اراسىندا سوتسياليستىك جارىس وتەتىن. مەن بيزادا اپانىڭ بريگاداسىندا بولدىم. ول كىسى حات تاسۋشىلاردىڭ بوساڭسۋىنا مۇرسات بەرمەيتىن, ىلعي الدا جۇردىك. سوتسياليستىك ەڭبەك ەرى اتاعىن العاننان كەيىن وعان جەڭىلىرەك وپەراتورلىق جۇمىستى ۇسىنعاندا بيزادا اپا باس تارتىپ, پوشتا تاسي بەرەتىندىگىن ايتقان ەدى. جاستارعا قامقورشى بولدى, ءبىزدى ءتوزىم­دىلىككە باۋلىدى, – دەدى بيزادا وتە­كەي­قىزىمەن بىرگە ىستەگەن بايلانىس ار­دا­گەرى گالينا پاسيچنيك. بيزادا جيەنعازينا ۇلكەن وتباسىنىڭ اناسى بولدى, بالا تاربيەلەدى. قوعامدىق جۇمىستارعا دا بەلسەنە قاتىساتىن. ەڭبەك­تىڭ ءىزى وشپەيتىندىگىنە ەسكەرتكىش تاقتا جارقىن مىسال بولعانداي. ءنازيرا جارىمبەتوۆا, «ەگەمەن قازاقستان» قوستاناي