اق تىلەك

جاسىم 90-عا تاياسا دا, بولىپ جاتقان وقيعالارعا قۇلاعىم ءتۇ­رىك, كوكىرەگىمنىڭ كوزى اشىق. حال­قى­مىزدىڭ 20 جىل بويى ەركىندىكتە, بوستان زاماندا ءومىر ءسۇرىپ, ەلىمىزدىڭ وركەندەپ جاتقانىنا قۋانامىن. وتكەن جىلعى استانا سام­ميتى, ەقىۇ-عا توراعالىعى­مىز قازاق حالقىنا ۇلكەن حا­لىق­ارالىق بەدەل, ابىروي اپەرگەنىنە دە ءسۇيىندىم. كەلەر جىلى 90 جىل­دىعى بولاتىن ءوزىمنىڭ وتاعاسىم, قازاقستاننىڭ حالىق جازۋشىسى سافۋان شايمەردەنوۆ ءتىرى بولسا, وسىنىڭ بارىنە ءسوزسىز قۋانار ەدى, وسى يگىلىكتى ىستەردىڭ بارىنە ەلدى جۇمىلدىرا بىلگەن ەلباسىنىڭ ەرەن ەڭبەگىنە قولداۋ بىلدىرەر ەدى عوي. ءوز باسىم اسىرەسە نۇرسۇلتان ءابىش ۇلىنىڭ ەڭ الدىمەن, كەشەگى كوشتەن قالىپ قويعان پروۆين­تسيا­لىق اقمولانى اباتتاندىرىپ, عاجايىپ استاناعا اينالدىرۋى ادام سەنبەستەي وقيعا بولدى دەپ ەسەپتەيمىن. مۇنى «عاسىر قۇرى­لىسى» دەسەك تە بولادى. سول كەزدەردە ءار جەردە تالقىلاۋلار ءجۇ­رىپ, ۇلكەن جيىن بولىپ, استانانى اقمولاعا كوشىرۋ تۋرالى ماسەلە قويىلعاندا سافەكەڭ بىردەن ءوزى­نىڭ قولداۋ ءسوزىن ايتقان بولاتىن. بۇگىنگى استانامىزدىڭ سالتاناتى ەۋروپانىڭ ساۋلەتتى قالالارىنان ءبىر دە كەم ەمەستىگىن كورىپ تە, ءبىلىپ تە ءجۇرمىز. وسىلايشا ءبىر-بىرىمەن ساباق­تاس­قان عالامات جۇمىستار ايتۋعا عانا وڭاي. شىن مانىندە ونىڭ عالاماتتىعىن كورەتىن كوز, سەزەتىن جۇرەك كەرەك. سوعان قاراپ كەيدە وسىنىڭ بارىنە قالاي ۇلگەرەدى, وسى كىسى ۇيىقتامايتىن شىعار دەپ ويلايمىن. وسىنداي ساتتەردە اتاقتى حالىق ءارتىسى, قۇرمەتتى روزا باعلانوۆا ايتاتىن: «اق پاتشام!» دەگەن ءسوزى ويعا ورالادى. وتە ورىندى ايتىلعان تەڭەۋ ءسوز وسى. وسى عاجايىپ استانامىزدا, ارۋ الماتىمىزدا ازيادانىڭ ءوتۋى دە كەرەمەت. ونداعى ەڭ باستى ەڭبەك تە ەلباسىنىكى. زيالى قاۋ­ىم حالىق جازۋشىسى سافۋان شايمەردەنوۆتىڭ ۇلى ساياننىڭ دوپتى حوككەيدەن 10 دۇركىن كسرو چەمپيونى اتاعىن العان, كەيىن ۇلتتىق ايەلدەر قۇراماسىنا باپكەرلىك ەتكەن سپورتتىڭ ساڭلاق تۇلعاسى بولعاندىعىن بىلەدى. اياۋلى ۇلىمنىڭ ارۋاعى ءۇشىن دە ەل رۋحىن تاعى ءبىر كوتەرگەن ازيادانى وتكىزگەن ەلباسىنا باسىمدى يەمىن. تاريحتى پاراقتاساق, امەريكا پرەزيدەنتى رۋزۆەلت بىرنەشە رەت سايلانعانى بەلگىلى. ال ەندى ءوزىمىزدىڭ بۇقار جىراۋ بابامىز: «تورەمىز تاقتان تايماسىن, توق­سانداعى قارت باباڭ, توپقا جاياۋ بارماسىن» دەپ وسيەت ايتقان ەكەن. اتا-انا تاربيەسىن العان, حا­لىق ۇناتقان, وتە العىر دا كو­رەگەن ساياساتكەر نۇرسۇلتان ءابىش­ ۇلى رەفەرەندۋم توڭىرەگىندەگى اڭگىمەلەردى ساليقالى تۇجىرىم­مەن وتە ءادىل تۇيىندەگەنى دە كوڭى­لىمىزگە قونىپ وتىر. تەك مەنىڭ انالىق تىلەگىم بىرەۋ عانا: قازاق مەملەكەتىنىڭ التىن تاعىندا اينالايىن نۇرەكەڭنىڭ ءوزى وتىرا بەرسە ەكەن. باعدات شايمەردەنكەلىنى, قارت پەداگوگ. الماتى.