ءماجىلىس دەپۋتاتى قاراتاۋدىڭ حالقىمەن كەزدەستى

پارلامەنت ءماجىلىسىنىڭ دەپۋتاتى, «نۇر وتان» فراكتسياسىنىڭ مۇشەسى باقىتجان ءابدىرايىموۆ قاراتاۋ قالاسىنداعى «شولاقتاۋ» كەن ورنىنىڭ جۇمىسىمەن تانىسىپ, ەڭبەككەرلەرىمەن جۇزدەستى. ايماقتاعى عانا ەمەس, ەلىمىزدەگى ءىرى ءوندىرىس وشاقتارىنىڭ ءبىرى سانالاتىن «قازفوسفات» جشس-ىنە قاراستى «شولاقتاۋ» ءوندىرىس الاڭىندا بۇگىندە 535 ادام ەڭبەك ەتىپ جاتىر. «قازفوسفات» زاۋىتى جىلىنا 1 ملن. 744 مىڭ توننا فوسفوريت شىعاراتىن بولسا سونىڭ 40 پايىزىن وسى كەن ورنى بەرەدى. بيىلعى جىلدىڭ جەتى ايىندا بۇل الىپ كاسىپورىن مەملەكەت قازىناسىنا 1 ملرد. تەڭگەدەن استام سالىق تولەپتى. 2011-2015 جىلدار ارالىعىندا كاسىپورىنعا 2,5 ميللارد تەڭگە ينۆەستيتسيا قۇيىلعان. وسىنىڭ ارقاسىندا كوپتەگەن جاڭا تەحنيكالار الىنىپ, زاۋىتتىڭ قۇرال-جابدىقتارى جاڭاردى. تاريحى سوناۋ 1946 جىلدان باستاۋ الاتىن «شولاقتاۋ» كەن ورنىنىڭ جۇمىسى ءبىر كۇندە توقتاعان ەمەس. بۇرىن فوسفوريت اشىق ادىسپەن وندىرىلەتىن بولسا, قازىر 300 مەتر تەرەڭدىكتەگى شاحتادان قازىلىپ الىنادى. بۇل كاسىپورىنداعى جۇمىسشىلاردىڭ بارلىعى دەرلىك جەرگىلىكتى تۇرعىندار. جۇمىسشىلاردىڭ ورتاشا جالاقىسى 93 مىڭ تەڭگەنى قۇرايدى. «قازىر ەلىمىزدەگى ءوندىرىس وشاقتارىنا مەملەكەت تاراپىنان ۇلكەن قولداۋلار بولىپ جاتىر, – دەيدى زاۋىت جۇمىسشىلارىمەن جۇزدەسكەن ءماجىلىس دەپۋتاتى باقىتجان جارىلقاسىن ۇلى. – سوڭعى تەحنولوگيالاردى پايدالانا وتىرىپ ءوندىرىستى جاڭا دەڭگەيگە كوتەرۋ مىندەتى كۇن تارتىبىنەن ەش تۇسكەن ەمەس. كاسىپورىن جۇمىسىنىڭ العا باسۋى ارينە, باسشىلارعا دا بايلانىستى. دەگەنمەندە سىزدەردىڭ قاجىرلى ەڭبەكتەرىڭىز زاۋىتتىڭ دامۋىن جەدەلدەتە تۇسەدى». بۇل كۇنى ءماجىلىس دەپۋتاتى باقىتجان ءابدىرايىموۆ «نۇر وتان» پارتياسىنىڭ فيليالىندا جەرگىلىكتى تۇرعىنداردى قابىلداپ, ارىز-شاعىمدارىن تىڭدادى. اۋدان تۇرعىندارى ءبىر كەزدەرى زياندى تسەحتاردا جۇمىس ىستەپ, ۋاقىت وتە كەلە مۇگەدەك بوپ قالعان عارىپ جانداردىڭ مۇڭىن, قاراتاۋ قالاسىنداعى جول, كوپقاباتتى تۇرعىن ۇيلەردى جوندەۋ ماسەلەسىن وتكىر قويدى. حالىق قالاۋلىسى تۇرعىنداردىڭ ارىز-شاعىمىن مۇقيات تىڭداپ, بۇل ماسەلەلەردى شەشۋ ءۇشىن ءتيىستى ورىندارعا حات جولدايتىنىن ايتتى. ورالحان ءداۋىت جامبىل وبلىسى