ءبىز ءسوز ونەرىن ارقاشان جوعارى باعالاعان حالىقپىز. ۇلتىمىزدىڭ اراسىنان اقىن-جازۋشىلاردىڭ كوپتەپ شىعۋى بۇل ءسوزىمىزدىڭ ءبىر دالەلى دەسەك, راسىندا دا سوزگە قوناق بەرۋ, ءسوز تىڭداۋ, ءسوز سىيلاۋ قانداعى بار قاسيەت. وسى قاسيەتتىڭ ارقاسىندا قازاق بالاسىنىڭ رۋحاني الەمى باي, كوكجيەگى كەڭ بولىپ وسەدى. ەندەشە, ءبىزدىڭ ەلدە كەز كەلگەن سالادا ەڭبەك ەتە ءجۇرىپ, ادەبيەتتىڭ اۋراسىمەن تىنىستايتىن, سوزبەن سۋرەت سالاتىن ادامداردىڭ كوپتەپ كەزدەسۋى دە زاڭدىلىق. جۋىردا ءبىز سونداي وقيعانىڭ كۋاسى بولدىق. بۇل جولعى كەيىپكەرىمىز – اكىم. «اكىمدەر كىتاپ وقىمايدى, ولار ناعىز شەنەۋنىك سيپاتتاعى بيۋروكراتتار» دەيتىن قوعامدىق پىكىر قالىپتاسا باستاعاندا باتىس قازاقستان وبلىسىنداعى ءبورلى اۋدانىنىڭ اكىمى بولات شاكىموۆ بۇل ويدىڭ بىت-شىتىن شىعاردى. ەڭ عاجابى سول, ونىڭ وزىندىك قولتاڭباسىن, ادەبيەتتەگى ورنىن ەڭ الدىمەن ورىس اعايىندار مويىنداپتى. ولاي دەيتىنىمىز, ورىس تىلىندە جازاتىن, رەسەي جازۋشىلار وداعىنىڭ ءمۇشەسى, اڭگىمەلەرى ورىس پروزاسىنىڭ انتولوگياسىنا قوسىلعان بولات شاكىموۆتىڭ «چتو تام, زا داليۋ؟» دەيتىن كىتابى بىلتىر ءماسكەۋدەگى «روسسيسكي پيساتەل» باسپا ۇيىنەن «سوۆرەمەننايا رۋسسكايا پروزا» سەرياسى بويىنشا جارىق كوردى. ودان كەيىن ىلە-شالا ءماسكەۋدەگى جازۋشىلار وداعى باسقارماسىنىڭ باستاماسىمەن بولات شاكىموۆتىڭ شىعارماشىلىق كەشى ۇيىمداستىرىلدى. ورىستىڭ زيالى قاۋىم وكىلدەرى قاتىسقان كەشتى جازۋشىلار وداعى باسقارماسىنىڭ توراعاسى, تاريح عىلىمدارىنىڭ دوكتورى, مگۋ-ءدىڭ پروفەسسورى ۆالەري گانيچەۆ اشىپ, جازۋشى تۋرالى «ورىس ادەبيەتىنە ورىس ءسوزىن شەبەر مەڭگەرگەن ەستى جازۋشى كەلدى, جاڭا ەسىم پايدا بولدى» دەسە, م.شولوحوۆ اتىنداعى سىيلىقتىڭ لاۋرەاتى, اقىن ليۋدميلا ششيپاحينا: «سوڭعى جىلدارى جارىق كورگەن شىعارمالاردىڭ ەشقايسىسى بولاتتىڭ كىتابى سياقتى مەنى ەلىتە الماپ ەدى. كىتاپتا ورىس ءتىلى مۋزىكا سىندى ەستىلەدى, ورىس ءسوزى ءبىر-بىرىنە كىرىگىپ, تۇتاسىپ تۇر. مەن ورىس ادەبيەتىندە تالانتتى شەبەردىڭ جانە جازۋشىنىڭ پايدا بولعانىنا قۋانىشتىمىن!» دەپ شاكىموۆتىڭ شىعارماشىلىعىنا شىنايى پىكىرىن ءبىلدىرىپتى. سونداي-اق, وسى كەشتە اكادەميك يۋري ۆينوگرادوۆ بولات شاكىموۆكە «چتو تام, زا داليۋ؟» كىتابى ءۇشىن ۆ.پيكۋل اتىنداعى حالىقارالىق ادەبي سىيلىقتىڭ ديپلومى مەن التىن مەدالىن تاپسىرعان بولاتىن.
بۇل – قازاق قالامگەرىنىڭ ۇلكەن جەتىستىگى. بولات شاكىموۆتىڭ كىتابىنا ءمۇيىزى قاراعايداي ورىس زيالىلارى بەرگەن باعا ءۇشىن جەرلەستەرى نەگە قۋانباسقا؟ قۋانىش بولىسسە كوبەيەدى دەمەكشى, الدىڭعى كۇنى سول كىتاپتىڭ تۇساۋكەسەرى ءوز ەلىمىزدە, استانادا, قازاق ءباسپاسوزىنىڭ قاراشاڭىراعى, توقسان جىلدان اسا تاريحى بار «ەگەمەن قازاقستان» گازەتىنىڭ رەداكتسياسىندا ءوتتى. ءبىر ايتا كەتەتىن ءجايت, وسى كەشكە رەسەيدەن ارنايى قوناقتار دا كەلدى. وعان قوسا سەنات, ءماجىلىس دەپۋتاتتارى, زيالى قاۋىم وكىلدەرى كەشتىڭ اجارىن اشىپ, ەكى ساعاتتان ارتىق تەك ادەبيەتتىڭ ءاڭگىمەسىن ايتىپ, جازۋشى شىعارماشىلىعىن تالقىلادى.
تۇساۋكەسەر ءراسىمىن «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ جۇرگىزىپ, قوناقتارعا ءسوز بەرىپ وتىردى. باسىلىم باسشىسى الدىمەن بولات شاكىموۆتى ەكى-ءۇش جىلدان بەرى تانيتىنىن, ءاربىر ءاڭگىمەلەسۋ بارىسىندا ونىڭ ادەبيەتتى تازا كاسىبي تۇرعىدا جاقسى بىلەتىنىن بايقاعانىن ايتىپ ءوتتى. «وتكەن جىلى بولات «ناش سوۆرەمەننيك» جۋرنالىن ۇسىنىپ ەدى. ىشىندە ءوزىنىڭ ءاڭگىمەلەرى بار ەكەن. وقىپ شىعىپ, جاقسى اسەر الدىم. ال ماسكەۋدەن شىققان جيناق قاتتى تاڭعالدىردى. مەندە ماسكەۋدە وتكەن كەش ءتۇسىرىلگەن ءۇنتاسپا بار. ونى كورىپ شىققاندا, اسىرەسە گانيچەۆ, ششيپاحينالاردىڭ ءسوزىن ەستىگەندە تولقىماۋ مۇمكىن ەمەس. وسىنشالىقتى تالانتتى حالقىمىز باردا ەلباسى مەجەلەگەن بيىك اسۋلاردىڭ بارىنەن دە اساتىنىمىزعا نىق سەنىمدى بولا الامىز», دەدى ساۋىتبەك ابدراحمانوۆ.
قوناق سىيلايتىن سالتىمىز بويىنشا بولاتتىڭ شىعارماشىلىعى تۋرالى العاشقى ءسوزدى رەسەيلىك قوناقتار ايتتى. قوناقتاردى باستاپ كەلگەن رەسەي جازۋشىلار وداعى باسقارماسىنىڭ حاتشىسى, «روسسيسكي پيساتەل» باسپا ءۇيىنىڭ ديرەكتورى نيكولاي دوروشەنكو بولاتتى ورىستىڭ اۋىل تاقىرىبىن شەبەر جازاتىن راسپۋتين, استافەۆ سەكىلدى جازۋشىلارىمەن ءبىر قاتارعا قوياتىنىن, سوندىقتان ونىڭ شىعارماشىلىعىن ورىس پروزاسىنىڭ تاماشا ۇلگىسى دەپ ەسەپتەيتىنىن ايتتى. «بولات قازاق حالقىنىڭ جانىن ورىس تىلىندە اشىپ بەردى. مەن العاشىندا بۇل كىتاپتان ۇلكەن اسەر كۇتكەنىم جوق. ويتكەنى, ءبىز ءوز ورتامىزداعى جازۋشىلاردىڭ ءبارىن بىلەمىز. ءبىر-ءبىرىمىزدى وقىپ جۇرگەندىكتەن, شىعارماشىلىقتارىمىز ەتەنە بولىپ كەتكەن. ءبىراق, بولاتتىڭ اڭگىمەلەرى مەن پوۆەسى كىتاپ بولىپ شىققاندا ۇلكەن اسەر سىيلادى. سوندا دا ءوز سەزىمىمە سەنىڭكىرەمەي, پروزايكتەرگە تاراتىپ بەردىم. كىتاپتى وقىپ شىققان ءبىرىنشى حاتشىمىز «جيناقتىڭ تۇساۋكەسەرىن وتكىزەيىك» دەپ باستاما جاسادى. ونىڭ الدىندا ەشكىمنىڭ كىتابىنا العىسوز جازبايتىن پوپوۆ بۇل كىتاپتىڭ العىسوزىن مەن جازايىن دەپ ايتقان. العىسوز جازبايتىن, سىني پىكىر ءبىلدىرمەيتىن پوپوۆتىڭ قاتال تالعامىنا ءسايكەس كەلۋ وڭاي ەمەس. وسىنىڭ ءبارىن ەسكەرە كەلگەندە مەنىڭ كىتاپتان جاقسى اسەر الۋىم الدامشى سەزىم ەمەس دەگەن قورىتىندىعا كەلدىم», – دەدى ن.دوروشەنكو.
ال رەسەي جازۋشىلار وداعى باسقارماسىنىڭ حاتشىسى, پروزا كەڭەسىنىڭ ءتوراعاسى ميحايل پوپوۆ: «مەن العاش قولجازبانى وقىدىم. بىردەن ۇنادى. سوسىن ونى دوروشەنكونىڭ باسىپ شىعاراتىنى ۇنادى. ونىڭ كىتاپقا دەگەن جاۋاپكەرشىلىگىن وتە جاقسى بىلەمىن. ول كەزدەيسوق كىتاپتاردى شىعارمايدى. وسى كىتاپتان تۋىنداعان ءبىر ويدى ايتايىن. پۋتين ءبىر جولى: «كەڭەس وكىمەتىنىڭ قۇلاعانىنا جانى اشىمايتىن ادامداردىڭ جۇرەگى جوق, ال كەڭەس وكىمەتىن قايتا ورناتۋدى ارماندايتىن ادامداردىڭ اقىلى جوق», دەپ ايتىپ ەدى. مىنا كىتاپ جۇرەكپەن جازىلعان. كەڭەس وكىمەتى زامانىنداعى ادامداردىڭ تاعدىرىن ادەمى بەينەلەگەن. شاكىموۆ اسىرەسە ءايەلدەر تۋرالى جاقسى جازعان. وسى كىتاپ ارقىلى قازاق دالاسىندا ايەلدەردىڭ يىعىنا سونشالىق اۋىرتپالىق تۇسكەنىن ءبىلدىم. شاكىموۆتىڭ ءبىر اڭگىمەسىندە اۋىلدا جالعىز ءوزى قالعان ەر ازامات تۋرالى ايتىلادى. ول ادامدى وبراز ارقىلى ويلاندىرۋعا جەتەلەيدى. وي جاڭاعى جالعىز قالعان ەر ازاماتتىڭ ءتوڭىرەگىنەن ءوربيدى. سونداي-اق, ونىڭ كەيىپكەرلەرى كوبىنەسە بالالار بولىپ كەلەدى. سوندىقتان كىتاپتى تۇتاستاي بالالىق شاق تۋرالى پوۆەست دەۋگە بولادى. ءويتكەنى, تالاي شىعارماسى بالانىڭ كوزىمەن بەرىلگەن. ەڭ ماڭىزدىسى, مۇندا سول بالالار بەينەسىنە كوپ ءۇمىت ارتىلعان. ال ەندى ەكى كۇننەن بەرى استانا قالاسىن ارالاي ءجۇرىپ, سول ءۇمىتتىڭ اقتالعانىنا كوزىم جەتتى. شىن ءمانىندە وسى قالانى سالعان, جالپى ەل ءۇشىن قىزمەت ەتىپ جۇرگەن ازاماتتاردىڭ كوپشىلىگى سول ءبىر كەزدەردەگى بالالار ەكەنىنە ەشكىم تالاسا قويماس. بۇل ءۇشىن مەن بولاتقا العىس ايتامىن», – دەدى م.پوپوۆ.
رەسەي جازۋشىلار وداعى باسقارماسىنىڭ حاتشىسى, «الگوريتم» باسپاسىنىڭ باس رەداكتورى اندرەي ۆورونتسوۆ بۇل كىتاپتىڭ بەلگىلى ءبىر ويلارعا جەتەلەيتىنىن باياندادى. سوڭعى جىلدارى ورىس ادەبيەتى دەۋگە كەلمەيتىن, كوممەرتسيالىق پايدا تابۋدى كوزدەيتىن كىتاپتاردىڭ كوبەيىپ كەتكەنىن, ماسەلەن, پەلەۆين, سوروكين, تولستايا سەكىلدى كوپشىلىككە تانىمال جازۋشىلاردىڭ شىعارماشىلىعىنىڭ ءوزىن ورىس ادەبيەتى دەۋگە بولمايتىنىن تىلگە تيەك ەتە كەلىپ, «بۇل جازۋشىلاردىڭ كەيىپكەرلەرى وسى زامانعى ادامدار. بىراق قانشا وقىساڭ دا قابىلداي المايسىڭ. مۇنىڭ جاۋابى بىرەۋ. كادىمگى پوستمودەرنيستىك پروزا. كەيىپكەرلەرىن جاقسى كورمەيتىن, قايتا ولاردى ءارتۇرلى ەكسپەريمەنتكە سالىپ, مازاققا اينالدىراتىن جازۋشىلار. ولار كەيىپكەرلەرىن جاقسى كورمەگەن سوڭ وقىرمان دا جاقسى كورە المايدى, قابىلدامايدى. ال بولات ءوز كەيىپكەرلەرىن ءبىلىپ قانا قويماي, ولاردى جاقسى كورەدى. ال ءبىزدىڭ شىعارماشىلىعىمىزدىڭ قاينار كوزى – ماحاببات. بۇل تۇرعىدان العاندا, ونى ورىس جازۋشىسى دەپ اتاۋعا بولادى. دەگەنمەن ونىڭ قازاق جازۋشىسى ەكەندىگى دە داۋسىز. كەڭىرەك ماعىنادا الاتىن بولساق, ونىڭ ورىس تىلىندە ءسوز كەستەلەۋى ەكى ەلدى جاقىنداستىرادى. ەكى حالىقتىڭ دا ءوز كەيىپكەرلەرىن جاقسى كورۋى كەزدەيسوقتىق ەمەس. ويتكەنى, ءبىزدىڭ ماحابباتقا, ادىلەتكە دەگەن كوزقاراستارىمىز بىردەي. سوندىقتان, كورشى وتىرعان ەكى ەلدى ساياسات نەمەسە تاريحي وقيعالار ەمەس, ءبىر-بىرىنە دەگەن جىلى كوزقاراس, شىنايى قابىلداۋ سەزىمى بىرىكتىرەدى. بۇل ەر ادامنىڭ ايەلدى ۇناتقانىنداي نە انانىڭ بالاعا دەگەن ماحابباتىنا ۇقساس سەزىمدەر», – دەدى ول.
«ناش سوۆرەمەننيك» جۋرنالىنىڭ پروزا ءبولىمىنىڭ مەڭگەرۋشىسى, جازۋشى ەۆگەني شيشكين اۆتوردى قۇتتىقتاي وتىرىپ, قازىرگى ورىس ادەبيەتىنىڭ جايىنا كەڭىرەك توقتالدى. ول وسى زامانعى ورىس ادەبيەتىن دونتسوۆا, اكۋنين سياقتى جازۋشىلاردىڭ سيۋجەتتەرى بىرىنەن-بىرىنە كوشىپ جۇرەتىن دەتەكتيۆتەرىنە, ەكىنشى – سوروكين, پەلەۆين سياقتى جازۋشىلاردىڭ داۋ-دامايعا تولى شىعارماشىلىقتارىنا, ءۇشىنشى – تاپ-تازا كوركەم ادەبيەتكە, ياعني ءۇش ارناعا ءبولىپ قاراستىراتىنىن, ونىڭ ىشىندە تەلەديدار مەن ينتەرنەتتى جاۋلاپ العان الدىڭعى ەكەۋ تۇرعاندا, كوركەم ادەبيەتكە قيىنىراق تيەتىنىن شەگەلەپ ايتتى. «ءبۇكىل حالىق بارماسا دا تەاتر, مۋزەيلەردىڭ بار بولعانى سياقتى, كەز كەلگەنىمىز وقىماساق تا وسىنداي كىتاپتاردىڭ جارىق كورگەنى ماڭىزدى. بۇل سەكىلدى كىتاپتار تالعامدى وسىرەدى» – دەدى شيشكين. ول سونداي-اق, جۋىردا «براتينا» الماناعىنا جازۋشىنىڭ اڭگىمەلەرى جاريالاناتىنىن دا ايتىپ ءوتتى.
ال وتانداستارى اراسىنان العاش ءسوز كەزەگىن العان «نيۆا» جۋرنالىنىڭ باس رەداكتورى ۆلاديمير گۋندارەۆ جيىرما جىلدان بەرى جۋرنال شىعارىپ كەلە جاتقانىن, ورىستىڭ اقىن-جازۋشىلارىن كوپتەپ جاريالاعانىن ايتا كەلىپ: «ءبىز وزىمىزدە جاريالايتىن اقىن-جازۋشىلار جوق بولعانى ءۇشىن ەمەس, دوستاستىق قارىم-قاتىناستى ارتتىرۋ ءۇشىن جۋرنالىمىزدىڭ ءاربىر سانىندا رەسەيلىك قالامگەرلەردى جاريالاپ وتىرامىز. سول سەكىلدى بولاتتىڭ كىتابىنىڭ رەسەي جەرىنەن شىققانىنا قۋانىشتىمىن. بۇل جيناقتى تۇگەل وقىپ شىقتىم. چەحوۆ ينتوناتسياسىمەن جازىلىپتى. ورىستىڭ ءتىلىن شەبەر مەڭگەرگەنى كورىنىپ تۇر. بىراق قازاقتىڭ, ونىڭ ىشىندە قاراپايىم حالىقتىڭ جانىن ادەمى اشقان. بۇل كىتاپتاعى اڭگىمەلەردى انتيادەبيەتتىك قوقىستىڭ اراسىنداعى ءمولدىر بۇلاقتىڭ ءبىر جۇتىم سۋىنداي دەپ باعالاۋعا بولادى», دەدى.
ءيا, كەش بارىسىندا بولات شاكىموۆتىڭ شىعارماشىلىعى تۋرالى ءتۇرلى پىكىرلەر ايتىلدى. دەگەنمەن جازۋشىلاردىڭ كوپشىلىگى قازاق جانى ورىس تىلىندە شەبەر بەينەلەنگەن دەگەن پىكىر ماڭايىندا وي ءوربىتتى. ارينە, قانى قازاق بولعان سوڭ ول مىندەتتى تۇردە قازاق جانىن بەينەلەيدى عوي. سوناۋ كەڭەستىك كەزەڭنىڭ ءوزىندە ولجاس سۇلەيمەنوۆ «ارعىماقتار», «قىش كىتابىن», ءانۋار ءالىمجانوۆ «جاۋشىنى» جازعان. بۇل جازۋشىلاردى ءالەم ورىس جازۋشىسى دەپ ەمەس, قازاق جازۋشىسى دەپ تانيدى. بولات شاكىموۆ تە رەسەي جازۋشىلار وداعىنىڭ مۇشەسى بولعانىمەن, قازاق جازۋشىسى ەكەنى انىق. بىزدە جازۋشىلاردى ءبىر-ءبىرىمەن سالىستىراتىن ءبىر ادەت بار. وسى «سالىستىرۋ دۇرىس ەمەس» دەي تۇرا, قر مەملەكەتتىك سىيلىعىنىڭ لاۋرەاتى, جازۋشى الدان سمايىل بولات شاكىموۆتىڭ شىعارماشىلىعىن سايىن مۇراتبەكوۆكە ۇقساتتى. «سايىن كوركەمدەپ جازادى, ءسىز ءومىردىڭ وزىنە ۇقساتىپ جازادى ەكەنسىز», – دەدى ول كەشكە قاتىسىپ وتىرعان اۆتورعا. تانىمال جازۋشى ءشاربانۋ بەيسەنوۆا ءوز سوزىندە تۇساۋكەسەر يەسىنە رەسەيدىڭ كورنەكتى ءسوز زەرگەرلەرىنىڭ بيىك باعا بەرۋى ۇلتتىق ادەبيەتىمىزدىڭ دە مەرەيىن تاسىتاتىنىن ايتتى.
وسى كەشتەگى جانە ءبىر تىڭ پىكىردىڭ اۆتورى پارلامەنت ءماجىلىسىنىڭ دەپۋتاتى ۆيكتور كيانسكي بولدى. ول بولاتتى قازاق جازۋشىسى دا, ورىس جازۋشىسى دا ەمەس, ەۋرازيا جازۋشىسى دەپ اتادى. «ەلباسىمىز ءبىر جولى ءماسكەۋدە ساپاردا بولعاندا مگۋ-ءدىڭ ستۋدەنتتەرىمەن كەزدەسىپ ەدى. سول كەزدەسۋدە ءتىلىمىز, ءدىنىمىز وزگە بولعانىمەن, سەزىمدەرىمىزدىڭ بىرەگەي, ياعني ەۋرازيالىق بولۋىنا ءۇمىت ارتامىن دەپ ەدى. مىنا كىتاپ سول ءسوزدىڭ دالەلىندەي. تازا بۇلاقتىڭ سۋىنداي. ءتىپتى تاقىرىبىنىڭ ءوزى ءان سالىپ تۇر. ورىس ءسوزىنىڭ سازىن جاقسى بىلەتىن ادام جازعانى بىلىنەدى», – دەدى ول.
«چتو تام, زا داليۋ؟» كىتابىنىڭ تۇساۋكەسەرىندە باسقا دا جاقسى پىكىرلەر كوپ ايتىلدى. ءوزىنىڭ جەرلەستەرى اتىنان دا, جازۋشىلار اتىنان دا پىكىر بىلدىرۋشىلەر بولدى. ولاردىڭ بارلىعى بولاتتىڭ اكىمدىك قىزمەتتى اتقارا ءجۇرىپ, مىنانداي تاماشا كىتاپتى قالاي جازعانىنا تاڭقالىس سەزىمدەرىن دە جاسىرمادى. كىتاپ جەتى مىڭ دانامەن, اجەپتەۋىر كوپ تيراجبەن جارىق كورىپتى. ەندىگى پىكىردى قازاق وقىرماندارى ايتارىنا سەنىمدىمىز. ءبىر ايتا كەتەرلىگى, شەنەۋنىكتىك قارا پاپكى پەن جازۋشى اق پاراعىن ءبىر-بىرىنە ءوزارا ۇيلەستىرە بىلگەن جازۋشىنىڭ ەجەلگى كورشى, ورىس اعايىنداردىڭ ادەبيەت مايتالماندارىنان «قۇبىلىس» دەگەن باعا الىپ, شىعارمالارى زاماناۋي ورىس پروزاسى انتولوگياسىنا ەنىپ, سول ارقىلى بۇكىل ءبىر ۇلتتىڭ جان-دۇنيەسىن, ءمىنەز-قۇلقىن سولارعا تۇسىنىكتى تىلدە كورسەتىپ, ءدارىپتەپ, سول ارقىلى باق اسىرىپ جاتقانى قۋانتادى.
ءبىزدى قۋانتقان تاعى ءبىر جاي بولدى. رەسەيلىك اتاقتى قالامگەرلەر استانا تۋرالى, وسىنداي قالا سالدىرتقان ەلباسىمىز نۇرسۇلتان نازارباەۆ تۋرالى تاماشا پىكىرلەر ءبىلدىردى. «ءبىز استانانىڭ كەلبەتى, قازاقستاننىڭ جەتىستىكتەرى, پرەزيدەنت نازارباەۆتىڭ ەڭبەگى جايىندا جوعارى باعالاردى كوپ ەستىگەنبىز, ولاردىڭ كەيبىرىن ارتىق ايتىلعانداي دا كورگەنبىز. سويتسەك, ول باعالار جەرىنە جەتپەي جاتادى ەكەن, ءبىزدىڭ كورگەنىمىز شىنىندا دا قايران قالدىرادى», دەيدى ولار.
ايگۇل سەيىلوۆا.
–––––––––––––––––––
سۋرەتتەردى تۇسىرگەن ورىنباي بالمۇرات.
