گۋبەرناتوردىڭ حاباردار ەتۋىنشە, سۋ باسۋدان باسساۋعالاعاندار شتاتتىڭ ورتالىعى – باتون رۋح قالاسىن پانالاۋدا. بۇل وقيعادان اقش بيلىگى دە حاباردار بولعان. كومەك بەرۋگە ءازىر ەكەندەرىن مالىمدەدى. فەدەرالدى ۇكىمەت شتاتتىڭ ءتورت بولىگىن سۋ باسىپ, ونىڭ سوڭى اپاتتى جاعدايعا ۇلاسقانىن ايتادى. ءبىر اپتاعا جۋىق تولاسسىز جاۋعان جاۋىن وسىعان سوقتىرىپ جاتىر.
قۋاتتى جارىلىس اۆتوبۋستى وتقا ورادى سيريانىڭ تۇركيامەن شەكارالاس اۋدانىندا جولاۋشىلار مىنگەن اۆتوبۋس جارىلىپ, 15 ادام قازا تاپتى جانە 25 جولاۋشى جارالاندى. الدىن الا مالىمەتتەر بويىنشا, جارىلعىش قۇرىلعىنى جانكەشتى ىسكە قوسقان. اۆتوبۋسقا شابۋىل سيريادان تۇركياعا وتەتىن شەكاراداعى اتما وتكەلىندە جاسالعان. كەيبىر مالىمەتتەرگە قاراعاندا, اۆتوبۋستا سيرياداعى ازاماتتىق سوعىسقا قاتىسىپ جاتقان توپتىڭ جاساقتارى وتىرعان سياقتى. وسىنىڭ الدىنداعى اقپاراتتا ورتەنگەن اۆتوبۋستارعا دارىگەرلەردىڭ كومەكتەسىپ جاتقانى جاريالانعان ەدى. بۇل اقپارات راستالمادى. اتما وتكەلى ورنالاسقان سيريانىڭ يدليب پروۆينتسياسى تۇركيا بيلىگى قولدايتىن, پرەزيدەنت باشار اساد ۇكىمەتىنە قارسى سوعىسىپ جاتقان وپپوزيتسيالىق كۇشتەر بەكىنگەن ايماق سانالادى.
ۇتىسىن الۋعا ۇلگەرمەي قالعان وسى جىلدىڭ ناۋرىزىندا ۇلتتىق لوتەرەيادان 6 ميلليون ەۋرو ۇتقان ادام ۇتىسىن الۋعا ۇلگەرە المادى. بريۋسسەل قالاسىنىڭ تۇرعىنى ءوزىنىڭ ۇتقان اقشاسىن الۋعا ءتيىستى مەرزىم – سەنبى كۇنى دە كەلمەگەن ەكەن. ۇتىس يەسىنە ىزدەۋ سالعان ۇلتتىق لوتەرەيانىڭ اكىمشىلىگى بەلگيا گازەتتەرىندە ءۇش رەسمي تىلدە – فرانتسۋز, گوللاند جانە نەمىس تىلدەرىندە حابارلاندىرۋ جاريالاعان. بىراق, الگى ادام قارا كورسەتپەگەن. وسىنشا سوماداعى ۇتىس لوتەرەيا بيلەتى 13 تامىزعا دەيىن جارامدى بولاتىن. بەلگيادا 2008 جىلعى جەلتوقساندا دا لوتەرەيا جەڭىمپازى ۇتىسىن الۋعا كەلمەگەن جاعداي تىركەلىپتى. بۇل ەلدە ەڭ ءىرى ۇتىس – 100 ميلليون ەۋرو 2007 جىلى كەزدەسىپتى. قىسقا قايىرعاندا:
- قىرعىزستان پوستكەڭەستىك ەلدەر اراسىندا جاس بوسانعان انالار ءولىمى بويىنشا ءبىرىنشى ورىندا تۇر. بۇل اقپاراتتى دۇنيەجۇزىلىك دەنساۋلىق ساقتاۋ ۇيىمى تاراتتى.
- ەل كوزىنە كوپ تۇسە بەرمەيتىن كۋبانىڭ بۇرىنعى باسشىسى فيدەل كاسترو جۇرتشىلىق الدىنا شىعىپ, ءوزىنىڭ 90 جاسقا تولعان تۋعان كۇنىن تويلاۋ سالتاناتىنا قاتىستى.
- اۋعانستاننىڭ سولتۇستىگىندەگى قۇندىز پروۆينتسياسىندا اۋعان ارمياسى «تاليبان» قوزعالىسىنىڭ 21 مۇشەسىنىڭ كوزىن جويدى.
- باتۋمي ماڭىندا قارا تەڭىزدە الاپات داۋىل تۇرىپ, قۇتقارۋ قىزمەتى 16 ادامدى اجالدان قۇتقاردى.
كەپىلدەگى رەسەيلىك ۇشقىش بوساتىلدى پاكىستان بيلىگى يسلامابادتا رەسەيلىك ديپلوماتتارعا بۇعان دەيىن اۋعانستاندا «تاليبان» قوزعالىسى ادامدارىنىڭ قولىنا ءتۇسىپ, كەيىن بوساتىلعان رەسەي ۇشقىشى سەرگەي سەۆاستيانوۆتى تاپسىردى. رەسەيلىك تەلەارنانىڭ حابارلاۋىنشا, رەسەي ازاماتىنىڭ دەنساۋلىعى بىرقالىپتى دەپ باعالانعان. بۇعان دەيىن رەسەي سىرتقى ىستەر مينيسترلىگى سەۆاستيانوۆتى جاقىن كۇندەرى رەسەي تاراپىنا تاپسىراتىنى حابارلانعان ەدى. بۇل ۇشقىشتى وزبەكستان ارقىلى رەسەيگە تەحنيكالىق قىزمەتىنەن وتۋگە ۇشىپ بارا جاتقاندا, پاكىستانعا تيەسىلى مي-17 ۇشاعى اتىپ تۇسىرگەن بولاتىن. ال اسكەري ۇشقىشتى اۋعانستاننىڭ شىعىسىنداعى لوگار ءۋالاياتىندا اپاتتى جاعدايدا قونۋعا ءماجبۇر بولعاندا تىكۇشاقتاعى وزگە ادامدارمەن بىرگە «تاليبان» قوزعالىسىنىڭ كۇش قۇرىلىمدارى كەپىلگە العان.
سولتۇستىك كورەيا اقش-قا دوق كورسەتتى سولتۇستىك كورەيا اقش-تى ازيا-تىنىق مۇحيتى ايماعىندا ارانداتۋشىلىق ارەكەتتەر جاساعان جاعدايدا اۋە كۇشتەرىنە يادرولىق سوققى بەرۋگە ءازىر ەكەنىن مالىمدەدى. «ەسكەرتۋ سوققىسىن جاساۋ قۇقىعى اقش مونوپولياسى ەمەس, – دەلىنگەن حابارلامادا. – كورەي اسكەرىنىڭ جەدەل بولىمشەلەرى جاۋ تاراپىنان قاندايدا ءبىر ارانداتۋشىلىق بايقالسا, اياۋسىز سوققى بەرۋگە دايىن». كورەيا ورتالىق تەلەگراف اگەنتتىگىنىڭ تاراتقان اقپاراتى بويىنشا, وڭتۇستىك كورەيا اۋماعىنا تنااد امەريكالىق زەنيتتى زىمىران كەشەنىنىڭ باتارەياسىن ورنالاستىرۋ جانە پەنتاگوننىڭ گۋام ارالدارىنا يادرولىق قارۋ تاسيتىن ءۇش ستراتەگيالىق بومبالاۋشى ۇشاعىن جىبەرۋى – كحدر اۋماعىن قارۋلى باسىپ الۋ جوسپارىنىڭ ءبىر بولىگى. وسى جىلدىڭ قاڭتارى مەن اقپانىندا ءبىر مارتە يادرولىق قارۋدى سىناقتان وتكىزگەن سوڭ, كورەي تۇبەگىندەگى جاعداي شيەلەنىسىپ كەتتى.
وقيعا سوڭى تارتىپسىزدىككە سوقتىردى اقش-تىڭ ۆيسكونسين شتاتىنداعى ميلۋوكي قالاسىندا افروامەريكالىق ازاماتتىڭ پوليتسيا وعىنان قازا تابۋىنا نارازىلىق بىلدىرگەن جۇزدەن استام ادام كوشەگە شىعىپ, ونىڭ سوڭى تارتىپسىزدىككە ۇلاستى. نارازىلىق بىلدىرۋشىلەر جانارماي قۇيۋ ستانساسىن, بانك عيماراتى مەن ەكى دۇكەندى ورتەگەن. تارتىپسىزدىك كەزىندە اتىس قارۋىن دا قولدانعان سياقتى. ءبىر پوليتسيا قىزمەتكەرى جارالاندى دەگەن دەرەك بار. اقش-تا افروامەريكالىقتى اتىپ ءولتىرۋ وقيعاسى ءجيى ورىن الاتىن بولدى. مىسالى, وسى وقيعاعا دەيىن ميلۋوكيدە 23 جاستاعى افروامەريكالىق جىگىت پوليتسيا قولىنان قازا تاپتى. مۇنىڭ الدىندا دا اقش-تىڭ بىرنەشە قالاسىندا وسىنداي جاعداي تىركەلدى. مىڭداعان ادام قاتىسقان نارازىلىق شەرۋلەرى دە ءوتتى.
ينتەرنەت ماتەريالدارى نەگىزىندە ازىرلەندى
