9 اقپان كۇنى فۋتبولدان ۇلتتىق قۇراما وسىدان ون كۇن بۇرىن چەحيادان شاقىرىلعان باپكەر ميروسلاۆ بەرانەكتىڭ جەتەكشىلىگىمەن تۇركيانىڭ انتاليا قالاسىندا بەلارۋس كومانداسىمەن جاڭا جىلداعى العاشقى ويىنىن وتكىزدى.
بۇل جولداستىق كەزدەسۋ دەڭگەيىندە وتكەن ماتچ ەشكىمنىڭ پايداسىنا شەشىلمەدى, ويىن 1:1 بولىپ اياقتالدى. كەزدەسۋدە ءبىرىنشى بولىپ ەسەپتى قارسىلاسىمىز اشتى. شەتەلدىڭ ءبىراز كوماندالارىندا ويناپ, ابدەن ىسىلعان الەكساندر گلەب بۇل جولى دا قازاق قاقپاسىنىڭ كىلتىن تابا ءبىلدى. ول قۇرامالاردىڭ الماتىداعى ويىنى 5:1, برەستەگى كەزدەسۋى 4:0 بولىپ اياقتالىپ, كوماندالاستارىنىڭ پايداسىنا شەشىلگەندە دە جاسىل الاڭنان گول سوقپاي كەتپەگەن ەدى. وسى جولى دا بەلارۋستىڭ كوشباسشىسى ماتچتىڭ ءبىرىنشى جارتىسى بىتەر كەزدە 11 مەترلىك ايىپ دوبىن سوعىپ ءۇلگەردى. ال ەكىنشى تايمنىڭ سوڭىندا ءبىزدىڭ ابىرويىمىزدى ءارىپتەسىمەن الماسقان سەرگەي وستاپەنكو ساقتاپ قالدى دەسە بولادى. بەرند شتورك كەزىندە سامات سماقوۆ, داۆيد لوريا سياقتى كوماندادان شەتتەتىلگەن وستاپەنكو ويىننىڭ 90-مينوتىندە قارسىلاستار قاقپاسىن ءدال كوزدەدى.
ەندى قازاقستان قۇراماسى كەلەسى ويىنىن 26 ناۋرىز كۇنى گەرمانيا كومانداسىمەن سىر الاڭدا ءوتكىزەدى. ازىرشە جاڭا باپكەردىڭ بۇل كەزدەسۋگە قاي قۇراممەن باراتىنى بەلگىسىز. ال بەلارۋسكە قارسى ماتچتا ۇلتتىق قۇراما جاسىل الاڭعا مىناداي قۇراممەن شىقتى. قاقپادا ويىننىڭ ءبىرىنشى جارتىسىندا اندرەي سيدەلنيكوۆ تۇردى. ونى كەيىن داۆيد لوريا الماستىردى. قورعانىستا ءبىر-ءبىرىن الماستىرعان انتون چيچۋلين, رەنات ابدۋللين, ۆلاديسلاۆ چەرنىشەۆ, سامات سماقوۆ, قايرات نۇرداۋلەتوۆ, الەكساندر كيسليتسىن ويناسا, جارتىلاي قورعانىستا اندرەي كارپوۆيچ, ماكسيم ازوۆسكي, ازات نۇرعاليەۆ, ۇلان قونىسباەۆ, سەرگەي سكورىح, دميتري شومكو, شابۋىلدا نۇربول جۇماسقاليەۆ, سەرگەي حيجنيچەنكو, سەرگەي وستاپەنكو جانە اندرەي فينونچەنكو ونەر كورسەتتى.
م.بەرانەك وسىلاردان باسقا ۇلتتىق قۇراماعا قاقپاشى الەكساندر موكين, قورعاۋشى فارحادبەك ىرىسمەتوۆ, الەكساندر كيروۆ, جارتىلاي قورعاۋشى قازىبەك گەتەريەۆ, اسلان داراباەۆ, سەرگەي مۋجىكوۆ پەن ەۆگەني اۆەرچەنكونى شاقىرىپ وتىرعانىن اتاپ وتكەن ءجون.
ۇلتتىق قۇرامانىڭ تىزگىنىن ۇستاعان بەرانەك 1957 جىلى 24 ءساۋىر كۇنى چەحيانىڭ بەنەشوۆ قالاسىندا تۋعان. چەحيالىق «سپارتاك» (پەلگرجيموۆ), «شكودا» (پلزەن), «سلاۆيا» (پراگا) كوماندالارىندا ويناعان. باپكەر رەتىندە «SV Gmund», «سلاۆيا» (پراگا), «كلادنو», «حمەل», «دەبرەتسەن» (ۆەنگريا), «ءال-ۆاسل» (دۋباي, ءباا) كلۋبتارى مەن چەحيانىڭ جاستار قۇراماسىن جاتتىقتىرعان. سوڭعى كەزدەرى چەحيانىڭ ۇلتتىق قۇراماسى باس باپكەرىنىڭ كومەكشىسى بولعان.
ويىندار ناتيجەلەرى:
6 اقپان. پولشا – مولدوۆا 1:0, 8 اقپان. رۋمىنيا – ۋكراينا 2:2, (پەنالتي 2:4), كيپر – شۆەتسيا 0:2, يرلانديا – ۋەلس 3:0, 9 اقپان. يران – رەسەي 1:0, ارگەنتينا – پورتۋگاليا 2:1, يسپانيا – كولۋمبيا 1:0, مالتا – شۆەيتساريا 0:0, پولشا – نورۆەگيا 1:0, فرانتسيا – برازيليا 1:0, حورۆاتيا – چەحيا 4:2, ەستونيا –بولگاريا 2:2, دانيا – انگليا 1:2, گەرمانيا – يتاليا 1:1, گوللانديا – اۆستريا 3:1, بەلگيا – فينليانديا 1:1, ماكەدونيا – كامەرۋن 0:1, ليۋكسەمبۋرگ – سلوۆاكيا 2:1, ارمەنيا – گرۋزيا 1:2, مولدوۆا – اندوررا 2:1, گرەكيا – كانادا 1:0, بوليۆيا – لاتۆيا 1:2, ءازىربايجان – ۆەنگريا 0:2, يزرايل – سەربيا 0:2, تۇركيا – وڭتۇستىك كورەيا 0:0, البانيا – سلوۆەنيا 1:2, ۋكراينا – شۆەتسيا 1:1(پەنالتي 5:4).
