جازعى ديزەل قىمباتتاۋى مۇمكىن

ەنەرگەتيكا مينيسترلىگى تامىزدىڭ باسىندا جازعى ديزەل وتىنى شەكتى باعاسىنا شەكتەۋدى الىپ تاستاۋدى جوسپارلاپ وتىر. ال قىسقى ديزەلگە شەكتەۋ بولعان جوق. بۇعان دەيىن ونىڭ باعاسى نارىق ارقىلى قالاي رەتتەلسە, ءارى قاراي دا سولاي رەتتەلە بەرەدى. ەنەرگەتيكا ۆيتسە-ءمينيسترى اسەت ماعاۋوۆتىڭ ايتۋىنشا, جازعى ديزەلدىڭ شەكتى باعاسىن الىپ تاستاعاننان كەيىن «سولياركانىڭ» ءبىر ءليترى 15-16 تەڭگەگە قىمباتتاۋى مۇمكىن. ودان جوعارى كوتەرىلمەۋى ءتيىس. جازعى ديزەل وتىنىنىڭ شەكتى باعاسىن الىپ تاستاۋدىڭ باس­تى سەبەبى – كورشى ەلدەرمەن باعا ايىرماشىلىعى. قازاقستاندا ديزەلدىڭ شەكتى باعاسى – ءبىر ءليترى ءۇشىن 99 تەڭگە بولسا, قىرعىزستاندا – 150, ال رەسەيدە 180 تەڭگەگە دەيىن جەتىپ وتىر. شەكارا ماڭىندا تۇراتىن رەسەيلىكتەر مەن قىرعىزستاندىقتار وسىنى پايدالانىپ, ارزان قازاقستاندىق ديزەلدى توننالاپ تاسىپ ءجۇر. ترانزيتپەن وتەتىن جۇك ماشينالارىنىڭ باكتارىن تولتىرىپ كەتەتىنى بىلاي تۇرسىن, شەكارالاس ايماقتا تۇراتىندار قازاقستانعا بىرنەشە رەت كەلىپ, ديزەل وتىنىن قۇيىپ اكەتەدى. «ءبىز ونداي ارەكەتتەرگە شەكتەۋ قويا المايمىز. سەبەبى, قىرعىزستان دا, رەسەي دە ەۋرازيالىق ەكونوميكالىق وداقتىڭ مۇشەلەرى بولىپ سانالادى», – دەيدى ۆيتسە-مينيستر ءا.ماعاۋوۆ. ال كورشى ەلدەرگە ارزانعا كەتىپ جاتقان ديزەل وتىنىنا شەكتەۋ بولماعاننان كەيىن وڭتۇستىك پەن سولتۇستىك ايماقتاردا جانار-جاعارمايدىڭ وسى تۇرىنە تاپشىلىق سەزىلە باستادى. ۆيتسە-ءمينيستردىڭ ايتۋىنشا, بۇگىندە وسى ماسەلەگە قاتىستى تالقىلاۋلار ءجۇرىپ جاتىر. دەگەنمەن, قازىردىڭ وزىندە قۇزىرەتتى مەملەكەتتىك ورگاندار مەن قوعامدىق ۇيىمدار اتالعان باستاماعا قارسى ەمەس. جانار-جاعارماي قۇيۋ بەكەتتەرى دە ونى تولىعىمەن قولداپ وتىر. الايدا, ماعاۋوۆ مىرزا ءتيىستى شەشىم قابىلدانباي تۇرىپ, سپەكۋلياتسياعا جول بەرۋگە بولمايتىنىن ەسكەرتتى. «بىزدە وسىنداي جاڭالىقتار جاريالانعان كەزدە بىرەۋلەر باعامەن ويناي باستايدى, ەندى بىرەۋلەر جانار-جاعارمايدى ۇستاپ قالىپ, باعانىڭ كوتەرىلگەنىن كۇتەدى. ونداي سپەكۋلياتسياعا جول بەرىلمەيدى. جاڭاعىداي ارەكەتتەر انىقتالسا, ءتيىستى جازالاۋ شارالارى قولدانىلادى», – دەيدى ۆيتسە-مينيستر. ونىڭ سوزىنە قاراعاندا, مينيسترلىك ديزەلدى وتىن ساۋداسىندا  سپەكۋلياتسياعا جول بەرمەۋ ماقساتىمەن شەكتى باعانى تەزدەتىپ الىپ تاستاۋدى كوزدەيدى. تامىزدىڭ باسىندا رەسمي شەشىم شىعارىلۋى ءتيىس. وسىدان كەيىن ديزەل وتىنىنىڭ باعاسى 115 تەڭگەگە دەيىن قىمباتتايدى دەگەن بولجام بار. الايدا, اۋىل شارۋاشىلىعى ءونىمىن وندىرۋشىلەر ءۇشىن جەڭىلدىك باعا (79 تەڭگە) ساقتالا بەرەدى. ارمان اسقاروۆ استانا