وقۋدان شىقساڭ, مەملەكەت شىعىنىن قايتاراسىڭ

رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ كەزەكتى وتىرىسىندا ءبىلىم بەرۋ سالاسىنداعى قارجىلىق ءاۋديتتىڭ قورىتىندىسى قارالدى. وسى تەكسەرىس كەزىندە ءبىلىم بەرۋ سالاسىنداعى 24 نىسان قامتىلسا دا, ءتيىمسىز جۇمسالعان بيۋدجەت قارجىسى از ەمەس بولىپ شىقتى. ال, ەڭ باستىسى, اۋديت وسى سالانىڭ اسا وزەكتى ماسەلەلەرىن انىقتاپ بەردى. اتاپ ايتقاندا, بۇگىندە ءبىلىم بەرۋ باعدارلاماسى مەن يندۋستريالىق-يننوۆاتسيالىق دامۋ باعدارلاماسى اراسىندا بايلانىس جوق. اتالعان باعدارلاماعا قاجەتتى ماماندار جۇيەلى تۇردە دايىندالمايدى. وقىتۋشى-پروفەسسور قۇرامىن جاڭارتۋ جۇمىسى دۇرىس جولعا قويىلماعان. بۇدان بولەك, وقۋدان شىعىپ كەتكەن جاستاردىڭ كەسىرىنەن ەل بيۋدجەتى شىعىندالىپ جاتىر. ەسەپ كوميتەتىنىڭ توراعاسى قوزى-كورپەش جاڭبىرشين ونداي ستۋدەنتتەردەن بيۋدجەت قاراجاتىن قايتارىپ الۋ مەحانيزمىن ازىرلەۋدى ۇسىندى. «266 ادامدى ساباق ۇلگەرىمى ءۇشىن وقۋدان شىعاردى. ىشكى ءتارتىپتى بۇزدى. بۇل دەگەنىمىز, بۇزاقىلىق جاسادى جانە تاعىسىن تاعى. سوسىن ءوز ەركىمەن وقۋدى تاستاپ كەتكەندەر بار. مىنە, وسى ستۋدەنتتەردى وقىتۋ ءۇشىن بيۋدجەتتەن 1 ملرد. تەڭگەگە جۋىق قارجى جۇمسالدى. بىزدىڭشە, «بولاشاق» باعدارلاماسىنداعى سياقتى بيۋدجەت قاراجاتىن قايتارۋدىڭ بەلگىلى ءبىر ەرەجەسىن ازىرلەۋ كەرەك», - دەيدى قوزى-كورپەش جاڭبىرشين. ونىڭ ايتۋىنشا, مۇنداي مەحانيزمدى ىسكە قوسۋ تۋرالى شەشىم مىندەتتى تۇردە بولادى. ال اۋديتكە كەلەر بولساق, تەكسەرىس كەزىندە ءبىلىم بەرۋ سالاسىنداعى 16 كاسىپورىن, 7 اكتسيونەرلىك قوعام مەن 1 جاۋاپكەرشىلىگى شەكتەۋلى سەرىكتەستىك قامتىلدى. ونداعى قاراجات پەن اكتيۆتەردىڭ جالپى كولەمى 214,9 ملرد. تەڭگەنى قۇرادى. «اۋديت كەزىندە جالپى سوماسى 1 ملرد. 845 ملن. تەڭگەنىڭ قارجىلىق ءتارتىپ بۇزۋشىلىقتارى انىقتالدى. سونىڭ ىشىندە 918 ملن. تەڭگەنىڭ ءتارتىپ بۇزۋشىلىقتارى تۇزەلدى. بۇدان بولەك, 252,8 ملن. تەڭگە مەملەكەت بيۋدجەتىنە قايتارىلدى. سونداي-اق 12 ملرد. 119 ملن. تەڭگەنىڭ پروتسەدۋرالىق ءتارتىپ بۇزۋشىلىقتارى انىقتالدى. ءتيىمسىز پايدالانىلعان قارجىنىڭ كولەمى 7 ملرد. 49 ملن. تەڭگەنى قۇرادى», - دەيدى كوميتەت مۇشەسى سوۆحوزبەك قۇلماعانبەتوۆ. ونىڭ سوزىنە قاراعاندا, عىلىمي-زەرتتەۋ جۇمىستارىنا بولىنەتىن قىرۋار قاراجات تا دۇرىس يگەرىلمەيدى. وسى ماسەلەلەرگە قاتىستى جاۋاپ بەرۋ ءۇشىن ەسەپ كوميتەتىنە ءبىلىم جانە عىلىم ۆيتسە-ءمينيسترى بيبىگۇل اسىلوۆا كەلگەن ەكەن. ونىڭ بۇل قىزمەتكە تاياۋدا عانا تاعايىندالعانىن ەسكەرگەن كوميتەت مۇشەلەرى ۆيتسە-ءمينيستردى اسا قينامادى. بىراق ەسكەرتۋسىز دە قالدىرمادى. «ءبىز مينيسترلىكتىڭ اتقارعان جۇمىسىن تىڭداۋ ءۇشىن جينالعان جوقپىز. ەسەپ كوميتەتى «گلامۋرنىي» ەسەپتەردى تىڭدايتىن مەكەمە ەمەس. ءبىلىم بەرۋ سالاسىندا انىقتالعان كەمشىلىكتەر نەگە بولدى؟ سونىڭ ءبارىن جويۋ ءۇشىن قانداي جۇمىس اتقارىلدى؟ مىنە, ءسىزدىڭ نەگىزگى مىندەتىڭىز وسىنى ايتىپ بەرۋ ەدى. سەبەبى 1 ملرد. 845 ملن. تەڭگەنىڭ قارجىلىق ءتارتىپ بۇزۋشىلىقتارى بار, ول دەگەنىڭىز از ەمەس. سول اقشانىڭ بارلىعىن قايتارۋ قاجەت», - دەپ اتاپ كورسەتتى قوزى-كورپەش جاڭبىرشين. ارمان اسقار