ليۋكس كيىز ءۇي

اقش-تا بۇرىن-سوڭدى بولماعان قوناقۇي اشىلدى. مانحەتتەن ورتالىعىندا ليۋكس ساناتىنداعى كيىز ءۇي بوي كوتەردى.   اتىنا سايكەس, ماماندار ونى ورتالىق ازيا حالىقتارىنىڭ ءداستۇرى بويىنشا دايىنداعان ەكەن. كيىز ءۇي قالا حالقى كوپ شوعىرلانعان جەردە ورنالاسقان. دىبىس وتكىزبەيتىن قۇرىلعىلار ورناتىلعاندىقتان, كوشەدەگى شۋ كەلگەن قوناقتارعا ەش كەدەرگى كەلتىرمەيدى. مۇنىمەن قوسا, ديزاينەرلەر كوشپەلى حالىقتىڭ تۇرمىسىن سەزىنىپ ءبىلۋى ءۇشىن ارنايى الاڭقاي جاساعان. بۇل جەردە كەلۋشىلەر وت جاعىپ, كەمپينگ ۇيىمداستىرا الادى. جاڭا ستيلدەگى مەيمان­حانا­نىڭ ىشىنە شاعىن ديۆان ورنالاس­تىرىپ, ەدەنىنە كورپەلەر توسەپتى. مالىمەتتەر بويىنشا, قوناقۇي قا­راشا ايىنا دەيىن جۇمىس ءىس­تەيدى. The Daily Mail باسىلىمىنىڭ اقپارى بويىنشا, جوبا اۆتورلارى كوشپەلىلەر ءۇيىن كاليفورنيادا وتكەن كواچەللا مۋزىكالىق فەستي­ۆالىنەن كورگەن ەكەن. وسىدان بارىپ قوناقۇي جاساۋ تۋرالى وي كەلىپتى. سونىمەن قاتار, سىرتقى ءپىشىنىنىڭ جۇمىر بولۋىنا دا باسا نازار اۋدارعان بولسا كەرەك. سەبەبى, مۇنداي بولمە ادامداردىڭ ءبىر-بىرىمەن ەركىن اڭگىمەلەسۋىنە ىڭعايلى ەكەنىن ايتتى. بۇگىندە نيۋ-يورك تۇرعىن­دارىنىڭ جاڭا نىسانعا دەگەن قىزىعۋشىلىقتارى ارتۋدا. ءبىر رەت تۇنەپ شىعۋ قۇنى دا ارزان ەمەس, 2-3 مىڭ دوللاردى قۇرايدى. بۇل ەليتالىق قوناقۇيلەردەن ءال­­دەقايدا قىمبات. شارىقتاپ تۇر­عان باعاسىنا قاراماستان, كەلۋشىلەر  قاراسى ازايار ەمەس. ايان ءابدۋالي, «ەگەمەن قازاقستان»