ويىلدىڭ تارىسىن شەتەلگە شىعارۋ ويلاستىرىلۋدا

    ويىل اۋدانى – اق تارىنىڭ اتاسى اتانعان شىعاناق بەرسيەۆ تۋعان ءوڭىر. اۋداندا بۇرىنعىداي كولەمدە بولماعانمەن, قازىر دە تارى وسىرۋمەن اينالىساتىن شارۋا قوجالىقتارى بار. سولاردىڭ ىشىندە “جاقىپ” شارۋا قوجالىعىنىڭ بۇل باعىتتاعى شارۋاسى شيراق. “بيزنەستىڭ جول كارتاسى-2020” باعدارلاماسى اياسىندا 2,7 ملن. تەڭگە كولەمىندە مەملەكەتتىك گرانت ۇتىپ العان قوجالىقتىڭ سۋارۋ تەحنيكالارى جانە تارىنى ستاندارتتىق جوبادا قاپتايتىن ستانوگى بولادى. شارۋا قوجالىعىنا تارىنى وتكىزۋ ءۇشىن مەملەكەتتىك ستاندارتقا ساي سەرتيفيكات بەرىلگەن, بولا­شاقتا ارنايى پاتەنت الۋعا قۇجات­تارىن تاپسىرىپ قويعان. شارۋا قوجالىعىنىڭ باسشىسى جۇماباي جاقىپ تارى داقىلىن زەرتتەۋ بويىنشا حالىقارالىق ۇيىمنىڭ مۇشەلىگىنە ءوتىپ, ونىڭ تاعامدىق قۇندىلىعىن تەرەڭ زەرتتەۋ جۇ­مىس­تارىنا قاتىسقان. شەت مەملە­كەتتەردە وتكەن سەمينارعا دا قاتىسىپ قايتىپتى. شارۋا ادامىنىڭ تارى وسىرۋمەن اينالىسىپ جۇرگەنىن دە بىلەتىنبىز. 2000 جىلى 20 گەكتەر القاپتىڭ ءار گەكتارىنان 25 تسەنتنەر تازا ءونىم الدى. 2012-2013 جىلدارى 140 گەكتارعا ەگىلگەن تارىنىڭ ءار گەكتارىنان 14 تسەنتنەر ءونىم الىپ, وبلىس كولەمىندە جوعارى كورسەتكىشكە قول جەتكىزدى. بيىل سۋارمالى ادىسپەن 120 گەكتار جەرگە تارى ەگىپتى. تارىنىڭ ادام دەنساۋلىعىنا پايداسى زور. 2015 جىلى استانا قالاسىندا وتكەن تاماقتىڭ قۇن­دىلىعى جونىندەگى ۇلكەن كونفە­رەنتسياعا قاتىسقان جۇماباي جاقىپ عالىمدارمەن بىرلەسىپ, تارىنى شەتەلدەرگە شىعارۋدى ويلاستىرۋدا ەكەن. وسىلايشا, ونىڭ تارىنى تەك اقتوبەنىڭ عانا ەمەس, بۇكىل قازاقستاننىڭ برەن­دىنە اينالدىرۋ ويى بار. ال, ازىرشە, «جاقىپ» شارۋا قو­جا­لىعىنىڭ باسشىسى تارىنى اقتوبە, اتىراۋ جانە استانا قا­لا­­سىنا اپارىپ وتكىزۋمەن شەكتەلۋدە. جۇماباي جاقىپ تارى ءوسىرۋ­دىڭ دە, ساتۋدىڭ دا ۇلكەن قيىندىق تۋدىرمايتىنىن تىلگە تيەك ەتە كەلىپ, قۇنارلى تاعامدىق دا­قىلدى وڭدەۋ, تازارتۋ, قۋىرۋ, ءتۇيۋدىڭ ماشاقاتى باستان اساتىنىن جەتكىزدى. جينالعان ءونىمنىڭ بارلىعىن وڭدەي المايتىندىقتان ول تارىنى شيكىلەي وتكىزۋگە باسىم­دىق بەرۋدە. ساتىبالدى ءساۋىرباي, «ەگەمەن قازاقستان» اقتوبە وبلىسى