قاناتىمەن ءان سەپكەن قارلىعاش

   الاساپىران كۇندەردە اتقا قونىپ, تاعدىرشەشتى كەزەڭدە تاباندىلىق تانىتىپ, ەرلىكتىڭ ەرەن ۇلگىسىن كورسەتكەن كورىكتىلەر قازاق تاريحىندا از ەمەس. قوس بىلەگىن سىبانىپ, سوعىسقا دا سۇرانىپ, مايدان دالاسىندا قارۋ ۇستاعان ارۋلار دا بولعان. ونىڭ ءبارى وتانعا دەگەن مازداعان ماحابباتتان پايدا بولسا كەرەك-ءتى. بۇل ورايدا اركىم ءوز سەزىمىن ءارتۇرلى جولمەن جەتكىزەتىنى بەلگىلى عوي. بىرەۋلەر قانىمەن, بىرەۋلەر جانىمەن, ەندى بىرەۋلەر انىمەن ءبىلدىرىپ جاتادى. ساحنانى سايالاپ, سازدىڭ سۇيەمەلدەۋىمەن ساناسىنداعى سارقىلماس سەزىمىن, اتامەكەنگە دەگەن ورنى بولەك لەبىزىن ءان ارقىلى جەتكىزىپ جۇرگەن جانداردىڭ قاتارىندا قارلىعاشتىڭ دا وزىندىك ورنەگى بار. جاستاردى وتان­سۇيگىشتىككە تاربيەلەۋ جولىندا ەڭبەك ەتىپ جۇرگەن ول قازاق ۇلتتىق مۋزىكا اكادەمياسىندا ءبىلىم الىپ, ەربول ءساريننىڭ سىنىبىنا تۇسەدى. كەيىن وسى وقۋ ورنىنىڭ ماگيستراتۋراسىندا وقىعاندا جەزتاڭداي ءانشى قايرات بايبوسىنوۆتان ءتالىم الادى. سودان بولۋ كەرەك, قارلىعاش قاي كەزدە دە ونەر بايگەسىندە الدىڭعى شەپتەن كورىنىپ كەلەدى.  از عانا مەرزىمنىڭ ىشىندە ماعجان جۇماباەۆ, كەنەن ازىرباەۆ, نۇرعيسا تىلەنديەۆ اتىنداعى بايقاۋلار مەن «شابىت» فەستيۆالىنىڭ جەڭىمپازى اتانىپ ۇلگەردى. 2011 جىلى قىزىلجار قالاسىندا ماعجان جۇماباەۆقا ارنالعان «قازاق ەلى, ءبىر اۋىز ءسوزىم ساعان!» اتتى فەس­تيۆالدە اقىننىڭ ولەڭدەرىنە جازىلعان جاڭا اندەر اتالىمى بويىنشا بەلگىلى سازگەر جولامان تۇرسىنباەۆتىڭ «سارىارقا – سايران جەرىم-اي!» ءانىن ورىنداپ, باس جۇلدەگە يە بولعان ەدى. ودان كەيىن اقتوبە قالاسىندا بولعان كەزەكتى ونەر سايىسىندا دا قاتارلاستارىنان باعى باسىم ءتۇسىپ, ونىڭ دا باس جۇلدەسىن قانجىعاسىنا بايلايدى. سول جارىستان كەيىن يتالياداعى حالىقارالىق بايقاۋعا جولداما الادى. وسى 2013 جىلى ريمدە وتكەن «دجوۆانني كانتانو يل موندو» بايقاۋىندا قارلىعاش ابباسوۆا ەكىنشى ورىندى ەنشىلەپ قايتقانىن سۇيىنشىلەپ جازعان اقپارات بەتتەرىنەن بايقاعان بولاتىنبىز. يتالياعا شۆەيتساريادان, رەسەيدەن, نورۆەگيادان, فرانتسيادان, ۋكراينادان, بەلورۋسسيادان جانە ت.ب. مەملەكەتتەردەن 356 قاتىسۋشى جينالعان. بۇل بايقاۋدىڭ بىردەن-ءبىر ەرەكشەلىگى مۇندا تەك ۇلتتىق ونەر تۇرلەرى عانا ۇسىنىلدى, دەيدى قارلىعاش. قازىلار القاسىنىڭ مۇشەلەرى بىرىنشىدەن ۆوكال ساپاسىن, ورىنداۋ تەحنيكاسىن جانە ءارتيستيزمدى باعالاعان. ءبىزدىڭ جەرلەسىمىز «دومبىرامەن ءان ايتۋ» اتالىمىندا ونەر كورسەتىپ, حالىق ءانى «بۇلب ۇلىم» مەن ەستاي بەركىمباەۆتىڭ «ساندۋعاش» ءانىن شىرقاپ, شەتەلدىڭ ساحناسىنان قازاق­تىڭ ابىرويىن اسقاقتاتىپ قايتقان ەدى. قازىرگى ۋاقىتتا قازاقستان رەس­پۋب­ليكاسى قارۋلى كۇشتەرىنىڭ ۇلتتىق اسكەري پاتريوتتىق ورتا­لىعىندا قىزمەت ەتىپ جۇرگەن قارلىعاش «انا تۋرالى باللادا» دەيتىن بەينەبايانىمەن دە بەلگىلى. سۇراپىل سوعىستىڭ سۇلباسىن سۋرەت­تەيتىن, سىندارلى ساتتەردەن سىر شەرتەتىن كليپتىڭ اسەرى استە بولەك. باۋىر ەتى بالاسىن مايدان دالاسىنا اتتاندىرعان انانىڭ قارس ايىرىلعان جۇرەگى, قاپالانعان رەڭى, ءۇمىت پەن كۇدىككە تولى كۇتۋمەن وتكەن كۇندەرى ءبارى-ءبارى وسى بەينەباياننىڭ بەينەسىن اشىپ تۇرعانداي. «ادام بىرەۋگە ۇستاز بولىپ ونى تاربيەلەۋ ءۇشىن, ول ەڭ ءبىرىنشى ءوز-ءوزىن تاربيەلەۋ كەرەك. قانشاما جىل جيناعان ءبىلىم مەن تاجىريبەنى ۇشتاستىرا بىلگەن ۇستازدىڭ شاكىرتتەرى دە وسال بولمايدى دەپ ويلايمىن. سول سەبەپتى مەن ەڭ ءبىرىنشى ءوزىمنىڭ ونەرىم ارقىلى ءدۇيىم جۇرتتى مويىنداتىپ, مويىنىن بۇرعىزا السام, سوندا عانا مۇعالىمدىك مۇراتتى جۇزەگە اسىرا الام دەر ەدىم. ءوزىم ءتالىمىن الىپ, تاربيەسىن كورگەن ۇستازدارىممەن قالاي ماقتانسام, ەرتەڭ مەن دايىندايتىن شاكىرتتەرىم دە مەنىمەن سولاي ماقتانا الاتىن دارەجەگە جەتۋدى كوزدەيمىن», دەيدى قارلىعاش. قارلىعاشتىڭ ءوزى ايتپاقشى, «ساحنا سالعىرتتىقتى كوتەرمەيدى» دەگەندەي وعان تايماس تاباندىلىق پەن شىعارماشىلىق شىدامدىلىقتىڭ قاجەت ەكەنى داۋسىز. سوندا عانا ماشاقات ماراپاتقا اينالعانىن كورەسىز. راۋان قايدار, «ەگەمەن قازاقستان»