ۆوۆان مەن لەكسۋس دوپينگ داۋىنىڭ ساياسات ەكەنىن انىقتادى (ۆيدەو)

رەسەيدىڭ بەلگىلى پرانكەرلەرى ۆوۆان مەن لەكسۋس بۇكىلالەمدىك انتيدوپينگ اگەنتتىگىنىڭ (WADA) باسشىسى كرەيگ ريدي مەن اقش انتيدوپينگ اگەنتتىگىنىڭ جەتەكشىسى ترەۆيس تايگەرتكە تەلەفون شالىپ, رەسەي سپورتشىلارىن شارپىپ جاتقان دوپينگ جانجالىنىڭ تازا ساياسي ماقساتتان تۋىنداعانىن انىقتادى. بۇلاردىڭ سوڭعىسى وسى تەكسەرىستىڭ جۇرگىزىلۋىنە ءوزى تىكەلەي مۇرىندىق بولعان ەكەن. پرانكەرلەر اتالمىش تۇلعالارعا ۋكراينا سپورت ءمينيسترى يگور جدانوۆتىڭ اتىنان شىققان. اڭگىمە بارىسىندا كرەيگ رەسەيدە 2006-2015 جىلدارى انتيدوپينگى ورتالىعىن باسقارعان گريگوري رودچەنكوۆتىڭ The New York Times گازەتىنە بەرگەن سۇحباتى وسى داۋدىڭ جالعىز عانا ايعاعى ەكەنىن اشىپ ايتقان. ودان باسقا ەشقانداي دەرەك بولماعان. بۇعان قوسا, ءوزىن ۋكراينا سپورت ءمينيسترىنىڭ وزىمەن سويلەسىپ وتىرمىن دەپ ويلاعان ترەۆيس تايگارت ءسوزىنىڭ باسىندا رەسەي فەدەراتسياسى سپورتشىلارىن بارلىق جارىستاردان شىعارىپ تاستاۋ كەرەك ەكەنىن ايتا وتىرىپ, «بۇل ساياسات قوي, دوسىم» دەگەندى قىستىرىپ قويعان. نتۆ تەلەارناسى ارقىلى جۇرگىزىلگەن پرانكەرلەردىڭ تەلەفون شالۋلارى كەزىندە ميلليونداعان كورەرمەن دوپينگ داۋىنىڭ وسىلايشا ەشقانداي نەگىزسىز, قولدان ۇيىمداستىرىلا سالعانىنا كوز جەتكىزدى. ەسكە سالا كەتەيىك, رەسەي سپورتشىلارىنىڭ قاتىسۋلارىمەن كوتەرىلگەن دوپينگ جانجالى وتكەن جىلدىڭ قاراشا ايىنان باستاۋ الادى. ول كاناداعا قاشىپ كەتكەن رودچەنكوۆتىڭ اتالعان باسىلىمعا بەرگەن سۇحباتىنان كەيىن قوزعالدى. ال بۇل مامان سول سۇحباتتا سوچي وليمپياداسى كەزىندە رەسەيدىڭ مەدال العان 15 سپورتشىسى دوپينگ پايدالاندى, دەگەندى ايتقان بولاتىن. بىراق ول مۇنى ناقتى دەرەكپەن دالەلدەپ بەرگەن جوق. بۇل داۋ-شاردىڭ اياعى قازاقستاننىڭ دا بىرقاتار سپورتشىلارىن قامتىپ ءوتتى. سونىڭ ناتيجەسىندە بەيجىڭ جانە لوندون وليمپيادالارىندا التىن مەدال العان 4 سپورتشىمىز ريوعا بارا المايتىن بولىپ وتىر. دامير قوجامقۇل https://youtu.be/cNkWlgTH5Kc