ماسكەۋلىك گرۋزين جاستارى «مەن سەنى سۇيەمىن» جوباسىن تاراتتى (ۆيدەو)

ماسكەۋدە تۇراتىن جاس گرۋزيندەر كەڭەسىنىڭ ليدەرلەرى «მე შენ მიყვარხარ»/ «مەن سەنى سۇيەمىن» دەگەن رەسەي-گرۋزيا بىرىككەن جوباسىن جۇرگىزىپ جاتىر. «Sputnik-گرۋزيا» اگەنتتىگىنىڭ ءتىلشىسى الەنا ساۆەلەۆا وسىعان وراي جوبانى ۇيىمداستىرۋشىلاردىڭ بىرىنە جولىعىپ, وعان بىرنەشە سۇراق قويدى. جاۋاپتى رەسەيدەگى فەدەرالدى ۇلتتىق-مادەنيەت اۆتونومياسى جانىنداعى گرۋزين بولىمشەسى جاس ليدەرلەرى كەڭەسىنىڭ كۋراتورى, مگۋ-ءدىڭ جۋرناليستيكا فاكۋلتەتىنىڭ تۇلەگى ساندرو يۆانوۆ بەردى. - اندرو, ءوز جوبالارىڭىز تۋرالى تالداپ ايتىڭىزشى. ونىڭ ءمانى نەدە؟ -جوبانىڭ ءمانى بارىنشا قاراپايىم. وعان ءاربىر قاتىسۋشى جاس قىز بەن جىگىت ءوزىنىڭ ەڭ جاقىن ادامدارىنا – اتا-اناسىنا, ەڭ جاقىن باسقا دا ادامدارىنا جەكە-جەكە بار بولعانى «მე შენ მიყვარხარ» نەمەسە «مەن سەنى ء(سىزدى) سۇيەمىن» دەپ ايتادى. كەلىسەتىن شىعارسىز, اكەڭ مەن شەشەڭە نەمەسە باسقا ءبىر سۇيىكتى ادامىڭا ءدال مۇنداي ءسوز ايتۋ پالەندەي قيىندىق تۋعىزا قويمايتىن شىعار. مۇنىڭ ەسەسىنە, وسىنداي ءسوز ەستىگەن ادام بارىنشا ءماز بولىپ قالادى. ول ادامنىڭ كوڭىل كۇيىن كۇرت كوتەرىپ جىبەرەدى. ءبىز جوبانى سوندىقتان دا جاستاردى ءوز جاقىندارىنا وسى ءسوزدى ءجيى ايتىپ ۇيرەنۋلەرىنە داعدى الدىرۋ ماقساتىندا ومىرگە ەنگىزدىك. جانە بۇل ءسوزدى ورىس نەمەسە گرۋزين تىلدەرىندە عانا ەمەس, جاستار وزدەرى قارىم-قاتىناس جاساي الاتىن كەز كەلگەن تىلدە بىلدىرە الادى.

- مۇنداي جوبا جاساۋ جونىندەگى يدەيا قالاي تۋىپ ءجۇر؟ -وسىعان ۇقساس اكتسيا, ءسال باسقاشا پىشىمدە, بۇدان الدىن تبيليسيدە وتكەن بولاتىن. وندا «يمەدي» تەلەارناسىنىڭ جۋرناليستەرى كوشەدە كەتىپ بارا جاتقان جۇرگىنشىلەرگە جولىعىپ, وزدەرىنىڭ اتا-انالارىنىڭ اتتارىن اتاپ بەرۋدى وتىنگەن ەدى. ماعان وسى سيۋجەت قاتتى ۇناپ قالدى. سوسىن جىگىتتەرمەن اقىلداسا وتىرىپ, وسىعان ۇقساس, بىراق كوتەرەتىن جۇگى مەن مازمۇنى ءسال باسقاشا ءبىر جوبانى ويلاپ تابۋعا شەشىم قابىلدادىق. ويلانا كەلگەندە, وسى يدەيا تۋىندادى. -سوندىقتان روليك ءتۇسىرىپ كوردىڭىزدەر عوي؟ -ءيا. نەگىزى, جوبانىڭ يدەياسى 19 ماۋسىم كۇنى قولعا الىنعان ەدى. سول كۇنى ءبىز, كەڭەس مۇشەلەرى, گەورگي سكۆەرىندەگى شوتا رۋستاۆەلي ەسكەرتكىشى جانىنا جينالىپ, الدىمەن ءوز اتا-انالارىمىز بەن جاقىندارىمىزعا تەلەفون شالىپ, ولارعا وزدەرىن سۇيەتىندەرىمىزدى جەتكىزدىك. اسەر كەرەمەت بولدى. سول ءساتتىڭ ءبارىن ءتۇسىرىپ الىپ, ۆيدەوعا جيناقتادىق. ناتيجەسىندە 30-عا جۋىق ادام روليككە كىردى. -جوبانى بۇدان ءارى دە جالعاستىرا بەرەسىزدەر مە؟ -ءسوزسىز. ءبىز بۇل جوبانى سونىمەن قاتار سانكت-پەتەربۋرگتەگى «تەرگدالەۋلەبي» | «თერგდალეულები» گرۋزين جاستارى ۇيىمىنا ۇسىندىق. ولار دا قازىر وسىنداي روليك دايىنداپ جاتىر. بۇدان بولەك, ۆلاديكاۆكازداعى گرۋزين جاستارى دا باستاماعا قوسىلماقشى بولىپ وتىر. دامير قوجامقۇل https://youtu.be/cvuAXwDKgH0