قالداياقتىڭ ءۇيى

قالداياق ۇستا – ءان الەمىنىڭ سۇڭقارى ءشامشىنىڭ اكەسى. ءشامشى قازاقتىڭ كوگىندە ءان بولىپ نۇر جاۋدىرىپ تۇرعان كەزدىڭ وزىندە بۇگىنگى ءشامشى اۋىلىنىڭ ادامدارى ءۇشىن قالداياق ۇستا بالاسىنان بەدەلدىرەك ەكەن. تەمىردەن ءتۇيىن تۇيەتىن ۇستانىڭ قولىندا كورىكشى بولىپ بۇگىندە  مەملەكەتتىك سىيلىقتىڭ لاۋرەاتى, اكادەميك, ول كەزدە مەكتەپ وقۋشىسى ءابدىرازمان ومباەۆ تا جۇمىس جاساعان. – قالداياق اتا كوپ سوزگە جوق بول­عانىمەن بويىندا ۇلكەن قاسيەتى بار, اۋزىنان اللاسى تۇسپەيتىن, نامازىن قازا قىلمايتىن تاقۋا ادام ەدى, – دەيدى اكادەميك. –بالا­لارعا ءتىل-كوز تيگەندە اتاعا اكەلە­تىن. جاڭا عانا ءولىپ-تالىپ اناۋ دۇنيە مەن مىنا ءومىردىڭ اراسىندا ار­پالىسىپ جاتقان بالا ۇستا دۇعا وقىپ, ۇشكىرگەننەن كەيىن ءبىرازدان سوڭ قۇل­دىراڭداپ جۇگىرىپ كەتەر ەدى. وتىرار اۋدانىنداعى كەشەگى «تەمىر» كەڭشارى, بۇگىنگى ءشامشى اۋىلىندا وتكەن عاسىردىڭ جەت­پىسىنشى جىلدارى قالداياق ۇستا ءوز قولىمەن كىرپىشىن ورگەن قارا­شاڭىراق ءۇي بار. قازىرگى ۋاقىت ءۇشىن توقال تام سياقتى كورىنگەنىمەن, سول ۋاقىتتاعى ءۇش-ءتورت بولمەلى ءۇيدى قالداياق ۇستا ءوزى سالعان. ءشامشىنىڭ كىندىك قانى سارىكول دەگەن جەردە تامعان. ول جەرگە وتىرار اۋدانىنىڭ بۇرىنعى اكىمى سالىحان پولاتوۆ ەسكەرتكىش بەلگى ورناتقان ەدى. اۋداندىق بيۋدجەت ەسەبىنەن ءشامشى اۋىلىنداعى قا­را­شاڭىراق جانىنان ەڭسەلى ءۇي كوتەرىلىپ جاتىر. ىرگەدە اتاقتى كومپوزيتوردىڭ ءانى ارقىلى مۇقىم قازاقستانعا اتاعى شىققان ارىس وزەنى بايىر­قالاپ اعادى. قالداياق ۇستا سوققان اۋلەتتىڭ قارا شاڭىراعىندا بۇگىندە ۇلى باقىت تۇرىپ جاتىر. ۇستانىڭ كوپ دۇنيەلەرىن ءبىز «وتىرار» تاريحي ولكەتانۋ مۋزەيىنەن كوردىك. قالداياق ۇستا دۇنيەدەن وتكەندە تەمىر ءتوسى ەكى-ءۇش كۇن شىڭىلداپ تۇردى دەيدى اۋىل ادامدارى. سول اڭىز قىلعان تاس ءتوس پەن بالعا دا مۋزەيدە. ءشامشى – اتاقتى اندەرىمەن قازاقتىڭ رۋحىن كوتەرگەن كومپوزيتور. تىڭ يگەرۋ كەزىندە قازاق­تار ءوز جەرىندە وتىز پايىزعا دەيىن ازايىپ كەتتى. سون­دا ءشام­شى اندەرى قازاقتىڭ مەملە­كەت­شىل­دى­گىنە قىز­مەت ەتتى. ۇلتتىق رۋحىن كۇ­شەيتتى. بالكىم, سول اندەردىڭ ءبىرازى اكەسى  قالداياق  سالعان  وسى  قارا-شا­ڭى­­راق­تا دۇنيەگە كەلگەن شىعار... باقتيار تايجان, «ەگەمەن قازاقستان» وڭتۇستىك قازاقستان وبلىسى