باس رەداكتورلار كلۋبى ەۋرازيالىق توپتىڭ قولداۋىمەن قازاق ءتىلدى جۋرناليستەر اراسىندا وتكىزىلگەن ءداستۇرلى VI «التىن قالام» بايقاۋىنىڭ جەڭىمپازدارىن ماراپاتتادى. وندا «ۇزدىك ماقالا» نوميناتسياسى بويىنشا جۇلدەلى ەكىنشى ورىندى ارىپتەسىمىز «ەگەمەن قازاقستان» رەسپۋبليكالىق گازەتىنىڭ قوستاناي وبلىسى بويىنشا مەنشىكتى ءتىلشىسى ءنازيرا جارىمبەتوۆا جەڭىپ الدى.
بۇل بايقاۋدىڭ باستى ماقساتى – ەۋرازيالىق توپ كاسىپورىندارىندا جۇمىس ىستەيتىن, وندىرىستەگى قاراپايىم ەڭبەك ادامدارىن بۇگىنگى بەيبىت زاماننىڭ قاھارماندارى رەتىندە ۇلگى ەتىپ, ناسيحاتتاۋ. التى جىلدان بەرى جالعاسىپ كەلە جاتقان بايقاۋعا بۇل جولى رەسپۋبليكالىق جانە وڭىرلىك باسىلىمداردىڭ, سونداي-اق تەلەديدار, راديو جانە ينتەرنەت جاريالانىمدارىنىڭ 37 ءجۋرناليسى نيەت ءبىلدىرىپ, 133 ماقالا مەن ۆيدەو-اۋديو ماتەريالدارىن جىبەرگەن ەكەن. ولاردىڭ اراسىندا 22 ءتىلشىنىڭ 57 ماتەريالى تالاپقا ساي دەپ تانىلىپ, كوميسسيا تالقىسىنا ءتۇسىپ, وڭ باعاسىن العان.
جۇلدە قورى 2 ملن. تەڭگەنى قۇرايدى. استانادا ۇيىمداستىرىلعان شاراعا باق وكىلدەرىمەن قاتار, بىرقاتار وقىرماندار, كورەرمەندەر جانە تىڭدارماندار قاتىستى.
شارادا ءسوز العان «ەگەمەن قازاقستان» گازەتىنىڭ باسقارما توراعاسى دارحان قىدىرالى ارىپتەستەردى جۇلدەلەرىمەن قۇتتىقتاپ, ۇنەمى ءسوز مايدانىنىڭ الدىڭعى شەبىندە ءجۇرىپ, حالىققا شىنايى اقپارات جەتكىزۋدى كاسىپ ەتكەن التىن قالام يەلەرىنە جۇرەك جاردى تىلەگىن جەتكىزدى. سونىمەن قاتار, تۇركيادا بولعان قاسىرەتتى وقيعا مەن الماتىدا ورىن العان قايعىلى جاعدايعا قاتىستى ءوز وكىنىشىن جەتكىزدى. وسىنداي جاعدايدا جۇرتقا شىنايى اقپارات جەتكىزەتىن جۋرناليستەردىڭ قازىرگى جاۋاپكەرشىلىگى اسا جوعارى بولۋى كەرەك ەكەنىن باسا ايتتى.
التىنشى رەت وتكىزىلىپ وتىرعان «التىن قالام» بايقاۋىنىڭ بۇل جولعى جۇلدەلەرى نەگىزىنەن ايماقتارداعى جۋرناليستەردىڭ «قانجىعاسىنا» بايلاندى. سونىمەن, «ۇزدىك ماقالا» نوميناتسياسى بويىنشا 1-ورىندى «اقتوبە» گازەتىنىڭ ءتىلشىسى كامشات قوپاەۆا, 2-ورىندى «ەگەمەن قازاقستان» گازەتىنىڭ قوستاناي وبلىسى بويىنشا مەنشىكتى ءتىلشىسى ءنازيرا جارىمبەتوۆا يەلەندى. ال «ۇزدىك سيۋجەت» نوميناتسياسى بويىنشا 1-ورىندى «استانا» تەلەارناسىنىڭ ءجۋرناليسى ايگۇل شايحيموۆا, 2-ورىندى 24.kz تەلەارناسىنىڭ پاۆلودارداعى مەنشىكتى ءتىلشىسى قارلىعاش قاسيەتوۆا جەڭىپ الدى. سول سياقتى, 3-ورىن «قازاقستان» رترك قاراعاندى وبلىستىق فيليالىنىڭ ءجۋرناليسى ءاشىمحان جانپەيىسوۆ پەن پاۆلودار وبلىستىق «حالىق» راديوسىنىڭ ءتىلشىسى راۋشان سىبانجانوۆاعا بۇيىردى.
ارىپتەستەرىمىزدى جۇلدەلى جەڭىستەرىمەن شىن جۇرەكتەن قۇتتىقتاي وتىرىپ, قالامدارىنىڭ التىن قالپىنان اينىماۋىن تىلەيمىز.
نۇرباي ەلمۇراتوۆ
فوتو: ەرلان وماروۆ
