گاگارين اتىنداعى ساياباق قايتا اشىلدى

بۇل جۇمىس وبلىس ورتا­لىعىنىڭ جاسىل بولاشاعى ءۇشىن قابىلدانعان «2015-2020 جىلدارعا ارنالعان قالانىڭ ساياباقتار اۋماعىن دامىتۋ تۇجىرىمداماسى» اياسىندا جاسالىپ, ىسكە استى. قازىرگى كەزدە وبلىس ورتالىعىندا جالپى كولەمى 172 گەكتاردى قۇرايتىن پارك­تەر (5), ساياباقتار (28), اللەيا­لار (22) كىرەتىن 55-تەن استام كوگال­داندىرىلعان اۋماق بار. قالا اكىمدىگىنىڭ تۇجىرىمداماسىنا سايكەس جاقىن اراداعى ءۇش جىل ىشىندە 37 اباتتاندىرىلعان اۋماق كوگالداندىرىلادى. گاگارين اتىنداعى دەمالىس پاركىن اباتتاندىرۋ جانە قالالىقتارعا قولايلى ورتا جاساۋعا ەرەكشە كوڭىل ءبولىندى. راسىندا دا ساياباق بۇرىن كۇل-قوقىستان كوز اشپاي جاتتى. كىم كورىنگەن, كەزبەلەر وسى باقتى پانالادى. قاراۋسىز قالعان سوڭ اعاشتارى دا وتالا باستادى. وندا ەشقاشان جاڭارتۋ, جاڭعىرتۋ جۇمىستارى جۇرگىزىلمەدى. قالانىڭ شەتى, اينالا تولى زاۋىتتار, قاپتاعان ونەركاسىپ ورىندارى. 1978 جىلدارى اشىلعان باقتا جۇمىسشىلار دەمالسىن دەگەن ماقسات بولسا كەرەك. ەكولوگتار ەندى ساياباقتاعى توپىراق قاباتىن تازارتۋ, بۇرىنعى اعاشتاردى ساقتاپ, قايتادان وتىر­عىزۋ, گۇل وسى­رەتىن الاڭداردى كو­بەيتۋ, دارەتحانالار جاساۋدى سۇراپ وتىر. ساياباق ونەركاسىپتىك ايماقتىڭ جانىندا ورنالاسقان. بۇدان قانداي دەمالىس, تى­نىعۋ,تازا اۋا جۇتۋ كورە الامىز دەگەن سۇراقتار مازالايدى. سوندىقتان, وتىرعىزىلاتىن اعاشتاردىڭ تۇقىمىن تاڭداۋ كەزىندە ولاردىڭ ساندىك كوركى ءۇشىن عانا ەمەس, سونىمەن قوسا اۋا­نى وتتەگىمەن قانىقتىرۋعا جانە قورشاعان ورتانى ساۋ­ىق­تىرۋعا ىقپال ەتەتىن في­تونتسيدتەردى ءبولىپ شىعارۋ قا­بىلەتىن ەسكەرۋ كەرەك دەپ وتىر ەكولوگتار. قايتادان پايدالانۋعا بەرىلگەن ساياباقتى عارىشكەر توقتار اۋباكىروۆتىڭ ەسىمىمەن اتاۋ جونىندە شە­نەۋنىكتەردىڭ وزدەرى ۇسىنىس جاساعان بولاتىن-دى. ساياباققا جاقىن گاگارين اتىنداعى كوشە دە بار. تاۋەلسىزدىك كۇنى اشىلعانىنا قاراعاندا, اتى دا وزگەرىپ قالۋى مۇمكىن. فاريدا بىقاي, «ەگەمەن قازاقستان پاۆلودار