پانفيلوۆشىلار ەل ەسىندە

ماسكەۋ قالاسىنىڭ تاعزىم تاۋىندا ورنالاسقان ۇلى وتان سوعىسىنا ارنالعان ورتالىق مەملەكەتتىك مۋزەيدە پانفيلوۆ ديۆيزياسىنىڭ قۇرىلعانىنا 75 جىل تولۋىنا بايلانىستى سالتاناتتى جيىن ءوتتى. شاراعا قاتىسۋشىلار ءبىرىنشى كەزەكتە مايدان دالاسىندا ەر­لىكپەن قازا تاپقان, سوعىستان كەيىنگى بەيبىت ءومىردىڭ ءدامىن تاتا ءجۇرىپ ومىردەن وزعان پانفيلوۆشىلاردى ءبىر مينۋتتىق ۇنسىزدىكپەن ەسكە الدى. بۇدان كەيىن ماسكەۋ قالالىق ۇلتتىق ساياسات, ايماقارالىق بايلانىس جانە تۋريزم دەپارتامەنتى باسشىسىنىڭ ورىنباسارى يۆان پەتروۆ جيىندى رەسمي تۇردە اشتى. سونداي-اق, ول ماسكەۋ مەرى سەرگەي ءسوبيانيننىڭ جيىنعا قاتىسۋشىلارعا جولداعان قۇتتىق­تاۋ حاتىن وقىپ بەردى. « ۇلى وتان سوعىسىنىڭ ءبىز ءۇشىن جەڭىسپەن اياقتالۋىنا حا­لىق­تار دوستىعى, ءوزارا باۋىر­لاستىعىمىز تىكەلەي اسەر ەتىپ, ماڭىزدى ءرول اتقاردى. كەڭەس وداعىنىڭ قۇرامىنداعى بارلىق رەسپۋبليكالاردان جينالعان ساربازدار جەرىمىزدى جاۋدان ازات ەتتى. قيىن-قىستاۋ كەزدە ءتۇرلى ۇلت وكىلدەرىنەن قۇرالعان, ءماس­كەۋدى دۇشپاننان جان اياماي قورعاعان پانفيلوۆشىلار ديۆيزياسى حالىقتار دوستىعىنىڭ, ىنتىماعىنىڭ جارقىن ۇلگىسىن كورسەتە ءبىلدى. پانفيلوۆشىلار جاۋدىڭ ۆولوكولامسك باعىتىنا جۇمىلدىرىلعان قۋاتتى كۇشىن جانكەشتىلىكپەن توقتاتىپ, دۇش­پاندى زور شىعىنعا ۇشىراتتى. ءبىز ەلىمىزدى جاۋدان قورعاۋدا كورسەتكەن پانفيلوۆشىلاردىڭ ەرلىگىنە ارقاشان باسىمىزدى يەمىز. ۇلى وتان سوعىسىنىڭ باتىرلارى, ولاردىڭ ەرلىكتەرى حالىق جادىنان وشپەيدى», – دەلىنگەن ماسكەۋ مەرىنىڭ قۇتتىقتاۋ حاتىندا. ەلىمىزدىڭ رەسەيدەگى اسكەري اتتاشەسىنىڭ كومەكشىسى ازامات جاڭبىرباەۆ ءوز كەزەگىندە پان­فيلوۆ ديۆيزياسىنىڭ قازاق­ستاندىقتار ءۇشىن ۇلكەن ماڭىزعا يە ەكەنىن جەتكىزدى. «كەڭەس ودا­عىنىڭ باتىرى يۆان ۆاسيل­ەۆيچ پانفيلوۆتىڭ ەسىمىن قا­زا­ق­ستاندىقتار ءاردايىم قۇر­مەت­پەن ەسكە الادى. ءبىزدىڭ ورتاق تاريحىمىزدا 28 گۆاردياشى پانفيلوۆشىلاردىڭ ەرلىگى ۇلكەن ماڭىزعا يە. ماسكەۋ ءۇشىن بولعان شايقاس ۇلى وتان سوعىسىنىڭ ەڭ ءبىر اۋىر تۇستارى بولدى. ەۋروپانىڭ جارتىسىن جاۋلاپ العان گيتلەردىڭ اڭىزعا اينالعان قۋاتتى ارمياسى ءدال وسى ماسكەۋ تۇبىندەگى شايقاستا العاش رەت زور شىعىنعا ۇشىراپ, بەتى قايتتى. وسى ۇرىستا قازاقستاندىق جاۋىنگەرلەر ەرلىكتىڭ قايتالانباس ۇلگىسىن كورسەتتى», – دەدى ا.جاڭ­بىرباەۆ. سالتاناتتى جيىندا ماسكەۋ قالاسىنىڭ تاعزىم تاۋىندا ور­نالاسقان ۇلى وتان سوعىسىنا ارنالعان ورتالىق مەملەكەتتىك مۋزەي ديرەكتورىنىڭ ورىنباسارى الەكساندر سۋرنوۆ, ماسكەۋ مادەنيەت ينستيتۋتىنىڭ پروفەسسورى, ساياساتتانۋ عىلىمدارىنىڭ دوكتورى راۋشان قاناپيانوۆا, ماسكەۋ قالالىق ارداگەرلەر كەڭەسى توراعاسىنىڭ ورىنباسارى يۆان حاركوۆ, ي.ۆ.پانفيلوۆتىڭ نەمەرەلەرى – الۋا جانە ايگۇل بايقاداموۆالار جانە رەسەيلىك «جاۋجۇرەك پولك» قوعامدىق-پاتريوتتىق قوزعالىسى جەتەك­شىلەرىنىڭ ءبىرى نيكولاي زەمتسوۆ ءسوز سويلەدى. ولاردىڭ بارلىعى پانفيلوۆشىلاردىڭ وتان ال­دىن­داعى بورىشىن ورىنداۋدا كورسەتكەن ەرلىگىن جان-جاقتى اڭگىمەلەپ بەردى. شاراعا ۇلى وتان سوعىسىنىڭ ارداگەرلەرى, قازاق­ستان, قىرعىزستان, بەلارۋس ەلدەرىنىڭ ازاماتتارى, رەسەي مەملەكەتتىك دۋماسىنىڭ دەپۋتاتتارى جانە رەسەيلىك قوعامدىق ۇيىمداردىڭ وكىلدەرى قاتىستى. تمد ەلدەرىنىڭ ءوزارا مادەني بايلانىستارىن نىعايتا ءتۇسۋ, وسكەلەڭ ۇرپاقتى وتانسۇيگىشتىككە باۋلۋ, كوزى ءتىرى ارداگەرلەرىمىزگە قۇرمەت كورسەتە وتىرىپ, ولاردىڭ ومىردەن وزعان قارۋلاستارىن ەسكە الۋ باعىتىندا ۇيىمداستىرىلعان جيىندى قازاقستاننىڭ رەسەيدەگى ەلشىلىگى, ماسكەۋ قالالىق ۇلتتىق ساياسات, ايماقارالىق بايلانىس جانە تۋريزم دەپارتامەنتى, ءماس­كەۋلىك ارداگەر-پانفيلوۆشىلار, ماسكەۋ قالاسىنىڭ تاع­زىم تاۋىندا ورنالاسقان ۇلى وتان سو­عىسىنا ارنالعان ورتا­لىق مەم­لەكەتتىك مۋزەي باس­شىلىعى جانە «شىعىس پرۋس­سيادا قازا تاپقان كەڭەس سارباز­دارىن ەسكە الۋعا ارنالعان «پا­ميات» («ەس­كەرت­كىش») قورى» كوممەر­تسيا­لىق ەمەس ۇيىمى (رەسەي) بىرلەسە ءوت­كىزدى. جولدىباي بازار, «ەگەمەن قازاقستان» ماسكەۋ