الماتىدا بەلگىسىز بىرەۋلەر اتىس ۇيىمداستىردى

[caption id="attachment_51806" align="aligncenter" width="630"] inform.kz[/caption] «18 شىلدە كۇنى ساعات 11:00 شاماسىندا بەلگىسىز بىرەۋ الماتى قالاسى ىشكى ىستەر دەپارتامەنتىنىڭ المالى اۋداندىق ىشكى ىستەر باسقارماسىنا باسىپ كىرۋ ماقساتىمەن كۇزەتتە تۇرعان پوليتسيا قىزمەتكەرىنە وق اتتى. ناتيجەسىندە قىلمىسكەر ءتارتىپ ساقشىسىنىڭ قارۋىن يەمدەنىپ, وقيعا ورنىنان ءىزىن سۋىتتى», – دەلىنگەن ىشكى ىستەر مينيسترلىگىنىڭ ءباسپاسوز قىزمەتى تاراتقان حابارلامادا. Inform.kz-ءتىڭ مالىمەتى بويىنشا, قىلمىسكەردى ۇستاۋ وپەراتسياسى كەزىندە ول «بوران» پوليتسيا ەكيپاجىنا وق جاۋدىرىپ, ەكى پوليتسەيدى جارالاعان. ودان ءارى قىلمىسكەر «قازاقكونتسەرت» اق ماڭىندا پوليتسيامەن قارۋلى قاقتىعىسقا ءتۇسىپ, جارالانعان كۇيى قولعا تۇسكەن. ونى ۇستاۋ كەزىندە تاعى ەكى پوليتسەي جارالاندى. الدىن الا مالىمەتتەر بويىنشا, قولعا تۇسكەن ازامات 27 جاستاعى قىزىلوردا وبلىسىنىڭ تۋماسى بولىپ شىقتى. وكىنىشكە قاراي, قاشۋ كەزىندە قىلمىسكەر جەڭىل اۆتوكولىكتى باسىپ الىپ, ونىڭ جۇرگىزۋشىسىن اتىپ ءولتىردى. سونىمەن قاتار, قارۋلى قاقتىعىس كەزىندە العان جاراقاتتارىنان ءۇش پوليتسيا قىزمەتكەرى قازا تاپتى. قازىر قالادا «سيرەنا» جەدەل جوسپارى ەنگىزىلدى. پوليتسيانىڭ بارلىق قىزمەتكەرلەرى قولعا تۇسكەن كۇدىكتىنىڭ سىبايلاسىن ۇستاۋعا جۇمىلدىرىلدى. ايدار ورىسباەۆ