Reuters اگەنتتىگىنىڭ اقپارىنا قاراعاندا, بۇرىنعى كابينەت باسشىسى دەۆيد كەمەرون 13 شىلدە كۇنى ۇكىمەت مۇشەلەرى الدىندا ءسوز سويلەپ, قوشتاسقاننان كەيىن بۋكينگەم سارايىنا كەلگەن. ول وندا كورولەۆا ەليزاۆەتا II-گە پرەمەر-ءمينيستردىڭ ورىنتاعىنا وتىراتىن ءوز ءىزباسارىن تانىستىرىپ, وتستاۆكاسىن قابىلداۋدى وتىنگەن. كورولەۆا مەيدىڭ كانديداتۋراسىن قۋاتتادى.
وسىلايشا ۇلىبريتانيادا كابينەتتىڭ جاڭا باسشىسى پايدا بولدى. كەمەرون بيىلعى جىلعى 24 ماۋسىمدا ەلدىڭ ەۋرووداقتان شىعۋى جونىندەگى رەفەرەندۋم قورىتىندىسى شىققاننان كەيىن ءوز وتستاۆكاسى تۋرالى مالىمدەگەن ەدى. بۇكىلحالىقتىق داۋىس بەرۋ ناتيجەسىندە ەۋرووداقتان شىعۋدى, ياعني Brexit-ءتى جاقتاۋشىلار جەڭىسكە جەتتى. سوسىن كونسەرۆاتيۆتىك پارتيادا بيلىك ءۇشىن بولعان قىسقا مەرزىمدى كۇرەستە ىشكى ىستەر ءمينيسترى تەرەزا مەي تۇبەگەيلى ۇتىپ شىقتى.
بريتانيا كونسەرۆاتورلارىنىڭ جاڭا ليدەرى ەۋرووداقتان شىعۋدى قامتاماسىز ەتۋ ارقىلى بريتانيالىقتاردىڭ قالاۋىن ورىنداۋ جونىندەگى ۋادەسىن ورىنداپ ۇلگەرگەن بولاتىن. «بۇعان قوسا, ءبىزدىڭ بولاشاقتاعى جاعدايلاردى ناقتى كورە ءبىلۋىمىز كەرەك, ءبىزدىڭ ەلىمىزدىڭ جوعارى تاپتىڭ وكىلدەرى ءۇشىن عانا ەمەس, ءبىزدىڭ ءبارىمىز ءۇشىن جۇمىس جاسايتىنىن سەزىنە ءبىلۋىمىز كەرەك», - دەپ مالىمدەدى مەي. ساراپشىلار سونىمەن قاتار, تەرەزا مەيدىڭ بريتانيا تاريحىنداعى ەكىنشى ايەل پرەمەر-مينيستر بولىپ وتىرعانىنا دا نازار اۋدارىپ جاتىر. كەيبىر ءباسپاسوز قۇرالدارى ونى قازىردىڭ وزىندە «ەكىنشى تەمىر لەدي» ەسەبىندە اتاپ تا ۇلگەردى. ال ءبىرىنشىسى ايگىلى مارگارەت تەتچەر بولعانى بەلگىلى.
مۇرات ايتقوجا
