الماتىدا ءدامحانا وتقا وراندى

[caption id="attachment_50899" align="aligncenter" width="700"] فوتو: tengrinews.kz[/caption] الماتى قالاسىنىڭ 101 پۋلتىنە مەدەۋ اۋدانىنان «الما-اتا» ءدامحاناسى ورتەنىپ جاتىر...» دەگەن سۋىت حابار تۇنگى ساعات 21:58-دە تۇسكەن. اۋەجايعا باراتىن شىعىس اينالما جولىنىڭ بويىنداعى «كومپوت» دەگەن قوسىمشا اتاۋى بار دامحاناعا بۇل كەزدە كەلۋشىلەرگە لىق تولۋى ءتيىس ەدى. الايدا, بىرەسە سۋى تاۋسىلىپ, بىرەسە ەلەكتر جارىعى ءوشىپ قالا بەرەتىن كافەگە كەلەتىندەردىڭ قاتارى كوپ بولماي شىقتى. ءدامحانانىڭ بۇكىل شاتىرىن قامتىپ الاپات لاۋلاعان قىزىل جالىنعا تەز ارادا كەلىپ جەتكەن ءورت سوندىرۋشىلەرگە سۋ بۇركۋ وڭايعا سوقپادى. الماتى قالالىق توتەنشە جاعدايلار دەپارتامەنتىنىڭ رەسمي وكىلى ساندۋعاش بايمۇحامبەتوۆانىڭ حابارلاۋىنا قاراعاندا, قۇتقارۋشىلار ەلەكتر جەلىسىندەگى جۇيەسىزدىك سالدارىنان ەلەكتر توگىن نەگىزگى جۇيەدەن اجىراتۋعا كوپ ۋاقىت جىبەرىپ العان. سوندىقتان دا, ءورت سوندىرۋشىلەر العاشىندا باستارىن قاتەرگە تىگىپ, شاتىرى لاپىلداپ جانعان عيماراتتىڭ توبەسىنە تاۋەكەلمەن سۋ شاشتى. گاز تولتىرىلعان 5 باللون مەن 1 وتتەگى باللونى ساقتىقپەن سىرتقا شىعارىلدى. بارلىق قيىندىقتارعا قاراماستان ءورت سوندىرۋشىلەر ءبىر ساعاتتىڭ ىشىندە جالىندى باسىپ, 2 ساعاتتىڭ كولەمىندە 600 شارشى مەترلىك عيماراتتى تولىقتاي قاۋىپسىز ەتتى. بىراق, جالىن قۇشقان ءدامحانا بۇل كەزدە تولىقتاي كۇلگە اينالعان. زارداپ شەككەندەر جوق. تالعات ءسۇيىنباي