مەكسيكانىڭ ەجەلگى قالاسىنان تابىلدى
مەكسيكانىڭ ەجەلگى تەوتيۋاكان قالاسىنىڭ ماڭىنان قازبا جۇمىستارى كەزىندە ءتىستەرى مينەرالدى تاستارمەن اشەكەيلەنگەن اقسۇيەك ايەل ادامنىڭ باسسۇيەگى تابىلدى. عالىمدار وسىدان بارىپ سول كەزەڭدە ءومىر سۇرگەن حالىقتىڭ ءتىس پروتەزدەۋدى جاقسى بىلگەنىن مالىمدەدى. زەرتتەۋ جۇمىستارى كەزىندە الدىڭعى ەكى تىسىنە ءدوڭگەلەك فورماداعى پيريت تاستارى ورناتىلعانى انىقتالعان. ال ونىڭ قۇرامىندا تەمىر وتە كوپ.
بولجامعا سايكەس, اقسۇيەك ايەلدى وسىدان 1600 جىل بۇرىن 35-40 جاس شاماسىندا جەرلەگەن. ول سول تۇستاعى قوعامنىڭ جوعارعى توپتارىنىڭ مۇشەسى بولعان. قازبا جۇمىستارى كەزىندە ونىڭ قابىرىنەن تاعى ءبىرنەشە ىدىس-اياق تابىلدى. مامانداردىڭ پىكىرىنشە, ول تەوتيۋاكان قالاسىنىڭ جەرگىلىكتى تۇرعىنى ەمەس, وزگە ايماقتان كوشىپ كەلىپتى.
سول سياقتى, ارنايى مەحانيكالىق كۇشتىڭ كومەگىمەن باسسۇيەگىنىڭ فورماسى وزگەرتىلگەنى دە بەلگىلى بولدى. مۇنداي ءۇردىستى ءمايىت يەسى جەرلەنگەن ورتالىق ايماقتىڭ حالقى ەمەس, كوبىنە وڭتۇستىكتىڭ تۇرعىندارى جۇزەگە اسىرىپ وتىرعان. ەجەلگى ادامدار بۇل فورماداعى ادامدار وتە سۇلۋ ءارى تابىنۋشىلارىنا وزگەلەردەن جاقىنىراق بولادى دەپ ەسەپتەگەن ەكەن.
ايتا كەتەيىك, تەوتيۋاكان ءوز زامانىندا الەمدەگى ەڭ ءىرى قالالاردىڭ ءبىرى بولعان. كەيبىر دەرەكتەردە حالقى 200 مىڭنان اسقان دەگەن مالىمەتتەر بار. ءبىزدىڭ ءداۋىرىمىزدىڭ VII عاسىرىندا قالا تۇرعىندارى بەلگىسىز سەبەپتەرمەن بۇل ايماقتان كوشىپ كەتكەن ەكەن.
ايان ءابدۋالي,
«ەگەمەن قازاقستان»
