ءجۇز تەڭگەگە ءبىر كۇلشە جەۋگە بولادى

شىنىندا بۇگىندە 100 تەڭگەگە تويىپ تاماق ءىشۋ مۇمكىن بە؟ تىپتەن مۇمكىن ەمەس. ەڭ ارزان دەگەن اسحاناعا بارساڭىز, 100 تەڭگەگە جارتى تاباق اس بەرمەيدى. قانت قوسىلعان ءبىر ستاكان شاي ءىشۋىڭىز مۇمكىن. ودان باسقاعا بۇل سارىالا تەمىر اقشانىڭ شاماسى كەلمەيدى. ال بايزاق اۋدانىندا ورنالاسقان «Rola-7» جشس-ءتىڭ قارجى ديرەكتورى ەركە توقتاعۇلقىزىنىڭ ايتۋىنا قاراعاندا 100 تەڭگەگە كىشكەنە كۇلشە جەۋگە بولاتىن كورىنەدى. قالاي دەيسىز عوي؟ بۇل سەرىكتەستىك سوڭعى سەگىز جىلدان بەرى كەسپە, جايما, ماكارون ونىمدەرىن جانە ۇن شىعارۋمەن اينالىسىپ كەلەدى. – قازىر ەڭ ارزان بالمۇزداقتىڭ ءوزى 250-300 تەڭگە تۇرادى, – دەيدى ەركە توقتاعۇلقىزى بىزبەن اڭگىمەسىندە. – بىراق بالمۇزداقتى قانشا جەسەڭ دە تاماق بولىپ جارىتپايتىنى انىق. ءبىز ءوز كەسپەلەرىمىزدىڭ ءبىر داناسىن 10,90 تەڭگەدەن بوساتامىز. اراداعى دەلدالدار ۇستىنە تاعى سونداي اقشا قوسىپ ساتۋى مۇمكىن. بۇل كەسپەلەردى قايناعان سۋعا سالساڭىز, 5-7 مينۋتتا دايىن بولادى. ءبىر كەسپەنىڭ ءوزى ءبىر ادامنىڭ قارنىن تويدىرادى. ال قازانعا بەس داناسىن سالساڭىز, كوزدى اشىپ-جۇمعانشا ءبىر تاباق كۇلشەتاي دايىن دەگەن ءسوز. وتە ارزان, ءارى ءدامدى جانە تەز دايىندالاتىن بولعاندىقتان شىعار, ءبىزدىڭ ونىمىمىزگە سۇرانىس وتە جوعارى. ستۋدەنتتەر, جۇمىسىنا اسىققان جاندار, اقشاسىن ۇنەمدەۋشىلەر... ايتەۋىر, ءبىزدىڭ كەسپەلەردىڭ ساۋداسى جاقسى جۇرۋدە. ءبىر قاراعاندا ءبىزدىڭ ءونىمىمىزدى تەك تۇرمىسى ناشار جاندار عانا الاتىن سياقتى بوپ كورىنەدى. بۇل قاتە تۇسىنىك. قازىر قالتالى جاندار دا ساپالى ءارى ءدامدى جانە قازاننان تاباققا تەز تۇسەتىن تاماقتاردى ۇناتادى. سون­دىقتان ءبىزدىڭ ءونىم بارشاعا ارنالعان. شىنىندا «Rola-7» جشس-ءتىڭ ونىمدەرى جوعارعى سۇرانىسقا يە. سودان بولار سەرىكتەستىك تاۋلىگىنە 5 توننا ماكارون, جايما ونىمدەرىن, 30 تونناعا دەيىن ۇن شىعارادى. – بۇگىندە ءبىزدىڭ كاسىپورىندا 150 ادام جۇمىس ىستەيدى, – دەيدى بۇل جونىندە «Rola-7» جشس-ءتىڭ ديرەكتورى تۇرسىنبەك نۇرباەۆ. – وتكەن جىلى بانكتەن 165 ملن. تەڭگە نەسيە الىپ, ونىڭ 92 ملن.-ىنا زاماناۋي قوندىرعىلار ساتىپ الىپ, ورناتتىق. قازىر 14 ءتۇرلى ءونىم شىعارۋدامىز. ۇن سولتۇستىك قازاقستان وبلىسىنان تىكەلەي جەتكىزىلىپ وتىرعاندىقتان ءبىزدىڭ ءونىمنىڭ باعاسى وتە ارزان. «Rola-7» جشس سوڭعى كەز­دەرى ءوز ونىمدەرىن تەك وسى وڭىرگە عانا ەمەس, شەت مەملەكەتتەرگە دە شى­­عارۋ ماقساتىندا ءبىراز ارە­كەتتەر جاساپتى. ناتيجەسىندە اۋ­عانستاننىڭ ءىرى ساۋدا ورىندارىمەن كەلىسىمشارت جاساسىپ, ەكى ۆاگون ونىمدەرىن جىبەرمەك. ارزان ءارى ساپالى ءونىمنىڭ تۇتىنۋشىسى دا كوپ بولاتىنى بارىمىزگە بەلگىلى. ەندەشە «Rola-7» جشس-ءتىڭ بۇل قادامى باياندى بولا بەرگەي! ورالحان ءداۋىت, «ەگەمەن قازاقستان» جامبىل وبلىسى