ەل تىرەگى – ۇلگىلى وتباسى

مەملەكەتتىك حاتشى گۇلشارا ابدىقالىقوۆانىڭ تورايىمدىعىمەن «مەرەيلى وتباسى» ۇلتتىق كونكۋرسىنىڭ لاۋرەاتى اتاعىن بەرۋ جونىندەگى كوميسسيانىڭ وتىرىسى ءوتتى. وتىرىستا سويلەگەن سوزىندە مەملەكەتتىك حاتشى «مەرەيلى وتباسى» ۇلتتىق كونكۋرسىنىڭ قازاقستان پرەزيدەنتى نۇرسۇلتان نازارباەۆتىڭ باستاماسىمەن وتكىزىلىپ كەلە جاتقانىن, ونىڭ اۋداندىق, وڭىرلىك جانە ۇلتتىق سەكىلدى ءۇش كەزەڭدى قامتيتىنىن اتاپ ءوتتى. سونداي-اق, مەملەكەتتىك حاتشى قا­زاق­ستان تاۋەلسىزدىگىنىڭ 25 جىلدى­عىندا ۇلگىلى وتباسىلاردى تاڭداۋ بارىسىندا ولاردىڭ مەملەكەتتىڭ قالىپتاسۋى مەن وركەندەۋىنە قوسقان ۇلەستەرى ەسكەرىلەتىنىن ايتتى. «ەلباسى وتاننىڭ بىرلىگى وتباسىنىڭ بىرلىگىندە ەكەنىنە نازار اۋدارا وتىرىپ, ەلدىڭ دامۋى مەن تاۋەلسىزدىكتىڭ نىعايۋىندا وتباسىلىق ينستيتۋتتىڭ ءرولى مەن ماڭىزى ايرىقشا ەكەنىن اتاپ وتكەن بولاتىن. مىنە, ەلىمىزدە 2014 جىلدان بەرى «مەرەيلى وتباسى» كونكۋر­سى ۇيىمداستىرىلىپ كەلەدى. وعان قاتىسۋشىلاردىڭ دا سانى كوبەيۋدە. بۇل كونكۋرس جەرگىلىكتى وڭىرلەردىڭ ءوز ءداس­تۇرلەرىنە, ەرەكشەلىكتەرىنە سايكەس وتكىزىلۋدە. وتباسى – مەملە­كەت­تىڭ ماڭىزدى تىرەگى. بيىل ءبىزدىڭ ەلىمىز ءوز تاۋەلسىزدىگىنىڭ 25 جىل­دى­عىن اتاپ وتەدى. وسىعان وراي, ءبىز كون­كۋرس­قا قاتىسۋعا نيەت تانىتقان وتباسى­لاردىڭ, ولاردىڭ ءاربىر مۇشەسىنىڭ قازاقستاننىڭ دامۋى مەن وركەندەۋىنە قوسقان ۇلەستەرىن سارالاپ, ساراپتايتىن بولامىز», دەدى گ.ابدىقالىقوۆا. مەملەكەتتىك حاتشى وتىرىس قورىتىندىسى بويىنشا مەملەكەتتىك ورگاندارعا بايقاۋدى ءارى قاراي ۇيىمداستىرۋ ماسەلەلەرى جونىندە بىرقاتار تاپسىرما بەردى. اتالعان كونكۋرس, ەڭ الدىمەن, وتباسى ينستيتۋتىن نىعايتۋعا, ادامگەرشىلىك پەن وتباسىلىق قۇن­دىلىق­تاردى قاستەرلەۋگە, اعا بۋىندى قۇر­مەتتەۋدى جانە بالالارعا ىزەت كورسە­تۋدى دارىپتەۋگە باعىتتال­عانى بەلگىلى. سوندىقتان, وعان ەڭبەك­تە, زياتكەرلىكتە, عىلىمدا, شىعارما­شىلىق پەن سپورتتا جوعارى جەتىستىك­تەرگە قول جەتكىزگەن وتباسىلارى قاتىسا الادى. بايقاۋ ۇزدىكتەرىن انىقتاۋ وتباسى مۇشەلەرى جەتىستىكتەرىنىڭ ءمانى, رۋحاني-ادامگەرشىلىك قۇندىلىقتار مەن شىنايى وتباسىلىق داستۇرلەردى ۇستانۋشىلىق, ءومىر ءسۇرۋ سالتى مەن قوعامداعى ابىروي-بەدەلى سەكىلدى ولشەمدەرگە سايكەس جۇزەگە اسىرىلاتىن بولادى. بيىلعى جىلدىڭ ماۋسىم ايىن­دا ەلىمىزدىڭ بارلىق وڭىرىندە ەكىن­شى كەزەڭنىڭ جەڭىمپازدارىن مارا­پات­تاۋدىڭ سالتاناتتى راسىمدەرى وتكىزىلىپ, ءاربىر وبلىستان, استانا جانە الماتى قالالارىنان ءۇشىنشى, ياعني ۇلتتىق كەزەڭگە قاتىسۋ ءۇشىن ەكى وتباسىدان انىقتالعان ەكەن. كونكۋرستىڭ ۇلتتىق كەزەڭىنە دايىندىق اياسىندا كوميسسيا مۇشەلەرى فينالعا قاتىساتىن 16 ۇمىتكەردى بەلگىلەگەن, سونىمەن قا­تار, كونكۋرستىڭ جەڭىمپازىنا تابىس­تالاتىن ديپلومدار مەن ءمۇسىنشى­لەردىڭ ەسكيزدەرىن بەكىتكەن. «مەرەيلى وتباسى» بايقاۋىنىڭ فينالدىق كەزەڭىنىڭ جەڭىمپازدارىن انىقتاۋعا ەلىمىزدىڭ بارشا ازاماتى ونلاين-داۋىس بەرۋ ارقىلى تەلەفون بويىنشا, kaztube.kz پورتالىندا, سون­داي-اق, SMS-حابارلاما جولداۋ ار­قىلى تىكەلەي قاتىسا الادى. داۋىس بەرۋ بيىلعى جىلدىڭ 2-9 قىر­كۇيەگى ارالىعىندا وتكىزىلىپ, ونىڭ قورى­تىندىسى سول ايدىڭ ەكىنشى جەكسەنبىسى – وتباسى كۇنى قارساڭىندا جاريالانا­تىن بولادى. بايقاۋدى قازاقستان رەس­پۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلت­تىق كوميسسيانىڭ, سونداي-اق, استانا, الماتى قالالارىنىڭ جانە وبلىس اكىمدەرى جانىنداعى وتباسىلىق-دەموگرافيالىق ساياسات جونىندەگى كو­ميسسيالاردىڭ قولداۋىمەن ءما­دە­نيەت جانە سپورت, اقپارات جانە كوم­مۋ­نيكاتسيالار مينيسترلىكتەرى ۇيىم­داستىرادى. وتىرىس اياسىندا جۋرناليستەرگە بەرگەن سۇحباتىندا قازاقستان رەس­پۋب­ليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلت­تىق كوميسسيا ءتورايىمىنىڭ ورىنباسارى ءلاززات سۇلەيمەنوۆا «مەرەيلى وتباسى» كونكۋرسىنىڭ اۋقىمى جىلدان جىلعا كەڭەيىپ كەلە جاتقانىن جەتكىزدى. «ونىڭ نەگىزگى ماقساتى – وتباسى ينستيتۋتىن نىعايتۋ. بيىلعى جىلى 2600-گە تارتا وتباسى كونكۋرسقا قاتىسۋ ءۇشىن ءوز قۇجاتتارىن تاپسىردى. بۇگىندە اۋداندىق, قالالىق, وبلىستىق دەڭگەيدەگى كونكۋرستاردىڭ قورىتىندىلارى شىقتى. قازىرگى ۋاقىتتا كونكۋرستى وتكىزۋ رەسپۋب­ليكا­لىق دەڭگەيگە جەتىپ وتىر. بايقاۋ­عا جالپى 110-نان استام ۇلت وكىلدەرى قاتىسۋدا. «مەرەيلى وتباسىنىڭ» ەلى­مىز­دىڭ مەملەكەتتىلىگى مەن وتباسى ينستي­تۋتىن بەكىتۋدەگى, جاستاردى تاربيە­لەۋدەگى ىقپالى زور دەپ ويلايمىن», دەدى ول. ال اتالعان كوميسسيانىڭ تاعى ءبىر مۇشەسى سالتانات بايقوشقاروۆا بۇل بايقاۋدىڭ ۇلگىلى وتباسىلاردى قوعامعا, جاستارعا ناسيحاتتاۋداعى ءرولى وراسان ەكەنىن ايتتى. ءلايلا ەدىلقىزى, «ەگەمەن قازاقستان»