وڭىرلەردىڭ بەلسەندىلىگى قاجەت

«استانا ەكسپو-2017» ۇك» اكتسيونەرلىك قوعامى ءوفيسىنىڭ ءماجىلىس زالىندا ۆيتسە-پرەمەر باقىتجان ساعىنتاەۆتىڭ توراعالىق ەتۋىمەن ەكسپو حالىقارالىق كورمەسى اياسىندا وڭىرلەرمەن قارىم-قاتىناس جانە ونى ىلگەرىلەتۋ ماسەلەلەرى بويىنشا كەڭەيتىلگەن ءماجىلىس بولىپ ءوتتى. وعان ەكسپو كورمەسىن وتكىزۋگە بايلانىستى جاۋاپكەرشىلىك جۇكتەلگەن ەلىمىزدىڭ بارلىق وبلىستارى مەن استانا جانە الماتى قالالارى اكىمدەرىنىڭ ورىنباسارلارى قاتىستى. كەڭەيتىلگەن ماجىلىسكە قاتىس­قان­داردىڭ الدىندا «استانا «ەكسپو-2017» ۇك» اق-تىڭ باس­قار­ما توراعاسى احمەتجان ەسى­موۆ بايانداما جاسادى. «وسى جيىن بارىسىندا اتاپ كور­سە­تىل­گە­نىندەي, ءبىز ەلوردادا وتەتىن ەكسپو كورمەسىن تاماشا­لاۋشى­لاردىڭ قاتارى كوپ بولا­تىن­دىعىنا ءتانتى بولعاندايمىز. وسىعان بايلانىستى بارلىق ءوڭىر­لەردىڭ اكىمدىكتەرىن كورمەگە كەلەتىن تۋريستەر لەگىن رەتتەپ وتى­رۋعا شاقىرامىز. كورمە وتەتىن كۇندەرى وڭىرلەردەن استا­ناعا اعىلاتىن ادامدار لەگى كوپ بولادى. سوندىقتان ءتار­تىپ پەن رەتتىلىك وتە قاجەت. ەكىن­شىدەن, ءبىز كولىك-لوگيستيكا ماسە­لەسىنە, كەلگەن قوناقتاردى, وقۋ­شى­لاردى ورنالاستىرۋعا جانە ولار­دىڭ قاۋىپسىزدىگىنە ەرەكشە كوڭىل ءبولۋىمىز كەرەك. بۇل رەتتە ءوڭىر­لەردىڭ اكىمدىكتەرى ۇلتتىق كومپانيامەن جانە استانا قالاسى اكىمدىگىمەن تىعىز بايلانىستا جۇمىس ىستەۋى كەرەك», دەپ اتاپ كورسەتتى بايانداماشى. ودان ءارى احمەتجان ەسىموۆ ەكسپو كورمەسىنە بيلەت ساتۋ ناۋقانىنىڭ باستالعانىن اتاپ كورسەتتى. قازىرگى كۇندەرى ونلاين رەجىمى بويىنشا بيلەت سا­تۋ بارلىق وڭىرلەردە ءورىس العان. ۇستىمىزدەگى جىلدىڭ 1 قىركۇيە­گىنەن باستاپ وفلاين رەجىمىن­دەگى بيلەت ساتۋ ءۇردىسى باستاۋ الا­دى. بۇل رەتتە ۇلتتىق كومپا­نيا باستىعى ەلىمىزدىڭ تۋريس­تىك بيزنەسى سالاسىنىڭ وكىلدە­رىنە ۇلكەن جاۋاپكەرشىلىك جۇكتە­لە­تىندىگىن اتاپ كورسەتتى. «حالىقارالىق دارەجەدەگى مۇنداي ءىرى شارالار وتكىزىلگەن كەزدە تۋريستىك كومپانيالاردىڭ بەل­سەندىلىك كورسەتۋى ءداستۇرلى جاعداي. جاقىندا ءبىز يۋنۆتو-نىڭ (بۇۇ-نىڭ بۇكىلالەمدىك تۋريس­تىك ۇيىمى) باس حاتشىسى تالەب ريفايمەن كەزدەسىپ, مەموراندۋمعا قول قويدىق. ەكسپو كورمەسى كە­زىندە كەمىندە 100 مەملەكەتتىڭ تۋريزم مينيسترلەرى قاتىساتىن حالىقارالىق كونفەرەنتسيا ءوت­كىزۋ تۋرالى ۋاعدالاستىققا قول جەتكىزدىك. يسپانيانىڭ تۋريزم جونىندەگى اگەنتتىگىنىڭ باس ديرەك­تورى مارتو بلانكومەن جۇزدەس­كەنىمىزدە, ول يسپانيا ەلىنىڭ ءىجو-ءسىنىڭ 11 پايىزى تۋريزم ۇلەسىنە تيەسىلى ەكەنىن, تۇرعىنداردىڭ 13 پايىزى وسى سالادا ەڭبەكپەن قامتىلعاندىعىن, تۋريزم ۇلتتىق ەكونوميكانىڭ ەكىنشى ءىرى سالاسى ەكەندىگىن اتاپ كورسەتتى. ەل ەكو­نوميكاسىنا جىل سايىن تۋريزم سالاسىنان 67 ميلليارد ەۋرو ءتۇسىم تۇسەدى ەكەن. ال ەلىمىزدىڭ ۇلتتىق بانكىنىڭ دەرەكتەرى بويىنشا قازاقستاننىڭ تۋريزم سالا­سىنىڭ تولەم بالانسى كەرى كەتكەن (مينۋس 400 ميلليون اقش دوللارىنا تەڭ). ەلىمىزگە كەلەتىن قوناقتاردىڭ ىشىندە تۋريزم ماق­ساتىمەن كەلەتىندەرى 1 پايىزدى عانا قۇرايدى, ياعني 60 مىڭ ادام مولشەرىندە. ال ەكسپو كور­مەسى وتەتىن 3 اي ىشىندە ءبىز بۇل كورسەتكىشتى 5-7 ەسە ارتتىرۋىمىز كەرەك. ەندەشە, جاعدايدى ءتۇبى­رىمەن وزگەرتۋ ءۇشىن ءبىز بارلىق ۇيىم­داستىرۋشىلىق شارالارىن ۇتىمدى وتكىزۋىمىز كەرەك», دەدى ۇلتتىق كومپانيا باسشىسى. ودان ءارى ۇلتتىق كومپانيا باس­شىسى ۆولونتەرلىك كورپۋستىڭ جۇمىسىن ويداعىداي ۇيىم­داس­تىرۋ ماسەلەسىنە توقتالدى. ۆولون­تەرلار – ەكسپو كورمە­سىنىڭ ايناسى عانا ەمەس, سونىمەن بىرگە, ەلىمىزدىڭ دە ايناسى بو­لۋعا ءتيىس. ۇلتتىق كومپا­نيا باس­شىسى ەلىمىزدىڭ كوپتە­گەن ءوڭىر­لەرىندە ەكسپو لوگو­تيپى ءتيىستى دارەجەسىندە پايدا­لا­نىل­مايتىندىعىن ايتتى. سونىمەن بىرگە, كەيبىر شەنەۋ­نىكتەر ورىن العان كەمشىلىكتەردى ەكسپو-2017 حالىقارالىق كورمەسىن وتكىزۋ شاراسىمەن ءبۇر­كەمەلىگىسى كەلەتىن كورىنەدى. ماسە­لەن, وتكەن اپتادا استانا قالا­سى اۆتوموبيل جولدارى باسقار­ماسىنىڭ باسشىسى تەلەديدار ارقىلى قالاداعى كەيبىر كوپتەگەن كوشەلەردىڭ جولدارى ەكسپو كورمەسىن وتكىزۋگە بايلانىستى قولعا الىنباي وتىرعاندىعىن ايتقان. ال قوسشى كەنتىنىڭ اكىمى باق وكىلدەرىنە بەرگەن سۇحباتىندا جول جوندەۋگە بولىنگەن بارلىق اقشانىڭ ەكسپو-عا اۋدارىلعاندىعى جونىندە تەرىس مالىمەت تاراتقان. وڭتۇستىك قازاقستان وبلىسىندا تۇرعىن ءۇي قۇرىلىسى وسى شاراعا بايلانىستى تەجەلىپ وتىرعاندىعى العا تارتىلعان. وسىنداي مىسالداردى كوپتەپ كەلتىرە كەلىپ, احمەتجان ەسىموۆ جەرگىلىكتى شە­نەۋنىكتەردىڭ جۇمىستاعى كەمشى­لىكتەردى حالىقارالىق شارا وتكىزۋ وقيعاسىمەن بۇركەلەمەك بولعان پيعىلدارىنا قاتاڭ تىيىم سالۋ كەرەكتىگىن ەسكەرتتى. ۇلتتىق كومپانيا باسشىسى اتاپ كورسەتكەندەي, ەكسپو كور­مەسىنىڭ قالاشىعىن سالۋ بۇگىن­گى تاڭدا ەلىمىز ءۇشىن ناقتى داع­دارىسقا قارسى جوبا بولىپ وتىر. كورمە قالاشىعىنىڭ قۇرى­لىسىندا بۇگىندە 11 مىڭنان استام قازاقستاندىقتار ەڭبەك ەتۋ­دە. سونىمەن بىرگە, كورمەگە قاتىس­تى ونىمدەر شىعاراتىن بار­لىق وڭىرلەردەگى وتاندىق كاسىپ­ورىنداردا 30 مىڭنان استام ادام ەڭبەكپەن قامتىلعان. كورمە نىساندارى قۇرىلىسىن تۇرعىزۋعا 262 وتاندىق تاۋار ءوندىرۋشى كاسىپورىندار تارتىلىپ, جالپى كولەمى 36,8 ميلليارد تەڭگەنىڭ كەلىسىمشارتتارى جاسالعان. جالپى كولەمى 244 ميلليارد تەڭگەنى قۇرايتىن ينۆەستيتسيالىق جوبالار ىسكە اسىرىلۋدا. تەك وسى ينۆەستيتسيالىق جوبالاردىڭ ناتيجەسىندە عانا 5300 قوسىمشا جۇمىس ورنى اشىلعان. قازىردىڭ وزىندە الەمنىڭ 91 مەملەكەتى جانە 15 حالىقارالىق بەدەلدى ۇيىم «استانا ەكس­پو-2017» حالىقارالىق مامان­دان­دىرىلعان كورمەسىنە قاتىسۋىن راستادى. جالپى, ەلورداداعى كورمەگە 100 مەملەكەت, 15 حالىق­ارالىق ۇيىم قاتىسادى دەپ كۇتى­لۋدە. سيسكو, سامسۋنگ, شەلل, DHL, دجەنەرال ەلەكتريك سياقتى الەمگە تانىمال ءىرى كومپانيالار ەلوردادا وتەتىن ەكسپو-2017-ءنىڭ سەرىكتەستەرى بولىپ تابىلادى. ۇلتتىق كومپانيا باسشىسى ءسوزى­نىڭ قورىتىندىسىندا ەكسپو كور­مەسىن وتكىزۋگە دايىندىقتى بارىن­شا ىجداھاتتى جۇرگىزۋدىڭ حالىق­ارالىق دارەجەدە ەلىمىزدىڭ بەدە­لىن ارتتىرۋدا زور ماڭىزى بولا­تىندىعىن اتاپ كورسەتتى. جىلقىباي جاعىپار ۇلى, «ەگەمەن قازاقستان»