مەترولوگ ماماندار جەتىسپەيدى

كەشە پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا تەحنيكالىق رەتتەۋ جانە مەترولوگيا سالاسىندا كادرلاردى دايارلاۋ ماسەلەسى تالقىلانعان بريفينگ ءوتتى. زامان تالابىنا ساي ەكونوميكانىڭ ءتۇرلى سالاسىنا مامانداردى دايىنداۋ كۇن تارتىبىندەگى نەگىزگى ماسەلەلەردىڭ ءبىرى ەكەندىگى راس. بۇل رەتتە جاستاردى تەحنيكالىق رەتتەۋ جانە مەترولوگيا باعىتىنا تارتۋدىڭ ماڭىزى زور. دەگەنمەن, بىلىكتى كادر دايىنداۋدا كوپتەگەن تۇيتكىلدەردىڭ جوق ەمەستىگى تاعى بار, وعان سەبەپ – كوپشىلىكتىڭ وسى سالاعا ۇمتىلىس تانىتپاۋى بولىپ وتىر. ءىس-شارا بارىسىندا اتالعان سالاعا جاستاردى تارتۋ مەن ولاردىڭ بۇگىنگى تاڭدا كاسىبي مامان بولۋى ءۇشىن قاجەتتى العىشارتتاردى كەڭىنەن اتاعان يدم تەحنيكالىق رەتتەۋ جانە مەترولوگيا كوميتەتى توراعاسىنىڭ ورىنباسارى عالىمجان دوعالوۆ بىرقاتار دەرەكتەردى العا تارتتى. ونىڭ ايتۋى بويىنشا, ءبىلىم جانە عىلىم مينيسترلىگىنىڭ اقپارى كورسەتىپ وتىرعانداي وتكەن جىلى «ستاندارتتاۋ, مەترولوگيا جانە سەرتيفيكاتتاۋ» ماماندىعىن 451 ستۋدەنت بىتىرگەن. ال, بۇل كورسەتكىش رەسپۋبليكالىق دەڭگەيدە سالانىڭ قاجەتتىلىگىن وتەۋدە ءتىپتى دە از. وسى ماسەلە جىل سايىنعى مەترولوگتار كەڭەسىندە كوتەرىلىپ ءجۇر», دەدى ول ءارى قاراي. سونىمەن قاتار, بۇگىنگى تاڭدا فيزيكا-حيميا قۇرالدارىن قولدانا بىلەتىن مامانداردىڭ جەتىسپەي وتىرعانىن ايتا كەلە, ونىڭ ىشىندە ەلەكتروندى ميكروسكوپتار, سپەكترومەترلەر مەن حروماتوگرافتاردى ەركىن پايدالاناتىن كادرلاردىڭ جوق ەكەندىگىن جەتكىزدى. وسى رەتتە جوعارى وقۋ ورىندارىنىڭ ءبىلىم باعدارلامالارى مەن كادرلىق الەۋەتى قاجەتتىلىككە ساي بولۋى تيىستىگىن اتاپ ءوتتى. بيىل سالا بويىنشا ماماننىڭ تاپشى بولۋىنا بايلانىستى كوميتەتتىڭ ۇسىنۋىمەن وقۋ ورىندارىندا باكالاۆرياتتارعا «مەترولوگيا» ءپانى ەنگىزىلمەك. جانە دە ءبىزدىڭ كوميتەت ەلىمىزدىڭ جەتەكشى جوعارى وقۋ ورىندارىمەن سەرىكتەستىك بايلانىس ورناتۋدا. قازىرگى تاڭدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتى جانە قاراعاندى مەملەكەتتىك تەحنيكالىق ۋنيۆەرسيتەتى مەن قازاق-بريتان تەحنيكالىق ۋنيۆەرسيتەتى جانە ءال-فارابي اتىنداعى قازۇۋ-مەن كەلىسىمشارتتارعا قول قويىلدى. ايتار بولساق, رەسپۋبليكامىزدا «ستاندارتتاۋ, مەترولوگيا جانە سەرتيفيكاتتاۋ» سالاسى بويىنشا بار-جوعى 42 جوعارى وقۋ ورنى عانا مامان دايىنداۋدا, دەدى ع.دوعالوۆ. بۇل رەتتە اتالعان كەلىسىمشارتتار اياسىندا ستۋدەنتتەر «قازاقستان مەترولوگيا ينستيتۋتى» رەسپۋبليكالىق مەملەكەتتىك كاسىپورنىندا جانە «قازاقستان ستاندارتتاۋ ينستيتۋتى» رمك-دا وندىرىستىك تاجىريبەدەن وتەتىن بولادى. يندۋستريالىق-يننوۆاتسيالىق دامۋ باعدارلاماسىنىڭ ەنگىزىلۋىنە بايلانىستى ءوندىرىستى مەترولوگيالىق باعىتتا قامتاماسىز ەتۋدە تالاپتار دا كۇشەيىپ وتىر. بۇل دەگەنىمىز, كەز كەلگەن ولشەۋىش قۇرالىمەن جۇمىس ىستەيتىن ماماننىڭ بىلىكتىلىك دەڭگەيىنە دە بايلانىستى. جيىن اياسىندا مەترولوگيا سالاسىندا باسقا سالادا وقىپ كەلگەن مامانداردىڭ جۇمىس ىستەپ جاتقاندىعى ايتىلدى. ولاردىڭ باسىم بولىگى ارنايى كۋرستاردى وقىعان قىزمەتكەرلەر. سول سەبەپتى, ولاردىڭ مەترولوگيا باعىتىندا تولىققاندى جۇمىس ىستەۋگە ءبىلىمى جەتپەيدى. بۇل ماسەلەنىڭ ءتۇيىنىن اعىتۋ ءۇشىن قازىرگى تاڭدا وقۋ باعدارلامالارىن تالداۋ جۇرگىزىلىپ جاتىر. ەلميرا ماتىباەۆا, «ەگەمەن قازاقستان»