«قازمۇنايگاز» ۇلتتىق كومپانياسىنىڭ «سۇڭقار» بالالار ساۋىقتىرۋ لاگەرى كوكشە وڭىرىندەگى زەرەندى كولىنىڭ جاعالاۋىنداعى «كوكشەتاۋ» ۇلتتىق ساياباعىندا ورنالاسقان. مۇندا ەكى اپتا ىشىندە كومپانياعا قاراستى ەنشىلەس ۇيىمدار قىزمەتكەرلەرىنىڭ 2 مىڭعا جۋىق بالالارى دەمالىپ, دەنساۋلىقتارىن تۇزەتەدى. اسىرەسە قىزىلوردا, ماڭعىستاۋ جانە باسقا وبلىستاردان كەلگەن جەتكىنشەكتەردىڭ العان اسەرلەرىن تاۋىسىپ ايتا المايسىڭ. جاقىندا لاگەردە ەكىنشى ماۋسىمنىڭ سالتاناتتى اشىلۋى بولدى.
– ەكى اپتا تەز وتە شىعادى, مەن بالالاردىڭ جاقسىلاپ دەمالىپ, تىنىعۋلارىنا تىلەكتەسپىن. تابيعاتتى ايالاپ, ءوز ەلدەرىڭىزدى شىن سۇيىڭىزدەر. دەمالىستى جاقسى وتكىزىپ, وقۋدا وزات بولىڭىزدار, – دەدى «قازمۇنايگاز» ۇلتتىق كومپانياسىنىڭ بيزنەستى قولداۋ ءجونىندەگى باسقارۋشى ديرەكتورى سەرىك كەۋلىمجاەۆ.
«سۇڭقار» ساۋىقتىرۋ لاگەرىندە تولىققاندى دەمالۋ ءۇشىن جان-جاقتى جاعداي جاسالعان. بالالار جايلى تۇرعىن كورپۋستاردا تۇرادى. ءار نومىردە سانيتارلىق توراپ, دۋش بولمەسى جۇمىس ىستەيدى. كەشەن اۋماعىندا باسكەتبول, ۆولەيبول, فۋتبول ويناۋعا ارنالعان الاڭدار بار. سۋعا ءتۇسىپ جۇزەمىن دەسەڭ ەكى باسسەين اشىلعان. سونداي-اق, ترەناجەر, كينو زالدارى دا تولىق قىزمەت كورسەتەدى. جەتكىنشەكتەر سۇيىكتى ىستەرىمەن اينالىسىپ, ۋاقىتتارىن ءماندى وتكىزەدى.
دەمالىس كەزىندە بالالار بۋراباي ۇلتتىق ساياباعىنا بارىپ ساياحاتقا شىعادى. ابىلاي حاننىڭ الاڭىندا بولىپ, تابيعات مۋزەيىنىڭ جادىگەرلەرىمەن تانىسادى. ارينە, جاياۋ جورىقتا گيتاراعا قوسىلىپ ءان شىرقايدى. ءتۇرلى كونتسەرتتەر مەن ديسكوتەكالارعا قاتىسىپ, ونەرلەرىن كورسەتەدى.
– «سۇڭقار» ساۋىقتىرۋ كەشەنىندە كوپتەگەن بالالارمەن تانىسىپ, دوستاستىم. ولارمەن بىرگە ءوز ونەرىمدى كورسەتىپ, كوپشىلىكتىڭ كوڭىلىنەن شىقتىق. جالپى العاندا لاگەردە دەمالىپ تىنىعۋ وتە كوڭىلدى. كەشەن قىزمەتكەرلەرى بىزگە تالاي نارسەنى ۇيرەتتى. ءويتكەنى, مۇنداعى تابيعاتتىڭ ءوزى عاجايىپ ەمەس پە. ءبارى شىنايى ءارى اسەرلى, – دەيدى 2-ءشى جاساقتىڭ مۇشەسى مەرەي مۇحامەتجان.
2001 جىلدان بەرى «سۇڭقار» ساۋىقتىرۋ كەشەنى جازعى ماۋسىمدا 23 مىڭنان استام بالانى قابىلداپ, جاقسى تىنىعۋلارىنا جاعداي جاسادى. نەگىزىنەن ولار «قازمۇنايگاز» ۇلتتىق كومپانياسىنا قاراستى ەنشىلەس كاسىپورىندار مەن ءبولىمشەلەردىڭ بالالارى. جەتكىنشەكتەردىڭ كوپشىلىگى تابيعاتى قاتالداۋ قىزىلوردا, جاڭاوزەن, ماڭعىستاۋ سياقتى وڭىرلەردەن كەلدى. ارينە, ولاردىڭ بارىنە اقمولا وبلىسىنىڭ اۋماعىنداعى قاراعايلى ورمانداردىڭ كوركەمدىگى كوڭىلدەرىنەن شىعىپ, دەنساۋلىقتارىن شىڭداۋعا سەبەبىن تيگىزگەنى ءسوزسىز.
بالالار ءبىر-بىرىمەن ءشۇيىر
كەلەسىپ جاتقان ساتتە, ءبىر كەزدەگى لاگەردە وتكەن كۇندەرىن ۇلتتىق كومپانيانىڭ باسقارۋشى ديرەكتورى سەرىك كەۋلىمجاەۆ تا ەسىنە ءتۇسىردى.
– مەن كەڭەستىك كەزەڭدە تۋىپ-ءوستىم. جىل سايىن جازعى كانيكۋل كۇندەرىن پيونەر لاگەرىندە وتكىزەتىنمىن. كەي كەزدە بوس ورىن تابا الماي شاتىرلاردا جاتقانبىز. ول ۋاقىتتاعىنى قازىرگىمەن سالىستىرا المايسىڭ. ەكەۋىنىڭ اراسى جەر مەن كوكتەي. ويتكەنى, ءبۇگىنگى كۇننىڭ لاگەرلەرى زاماناۋي جابدىقتارمەن جابدىقتالعان. كەرەكتى نارسەنىڭ ءبارىن تاباسىڭ. جالپى العاندا لاگەردە دەمالعانعا نە جەتسىن. جاڭا دوستار تاۋىپ, وي-ءورىسىڭ كەڭەيەتىنى ءوز الدىنا. ءبىر سوزبەن ايتقاندا, لاگەردە ءبارى تاماشا, – دەيدى سەرىك كەۋلىمجاەۆ.
كوركىمەن كوز تامساندىراتىن كوكشە وڭىرىندەگى بالالار لاگەرلەرىندە قازىر ناعىز قىزىقتى شاق. جاز جايناتىپ, كۇن كۇلدىرىپ, مارە-سارە بولعان جەتكىنشەكتەردىڭ قۋانىشتارى شەكسىز بولعاي. ولاردىڭ الاڭسىز دەمالۋىنا جاعداي جاساعان «قازمۇنايگاز» ۇلتتىق كومپانياسىنىڭ جۇمىسى اتاپ ايتۋعا ابدەن لايىق.
نۇرباي ەلمۇراتوۆ,
«ەگەمەن قازاقستان»
