كاسىبي مەرەكەمەن قۇتتىقتادى

كەشە پارلامەنت ماجىلىسىندە پالاتا توراعاسى نۇرلان نىعماتۋلين جۋرناليستەردى بايلانىس جانە اقپارات قىزمەتكەرلەرى كۇنىمەن قۇتتىقتادى. سالتانات ءماجىلىستىڭ جالپى وتىرىس زالىندا ءوتىپ, مەرەكەگە شاقىرىلعان جۇزدەن استام جۋرناليست تۇگەلدەي حالىق قالاۋلىلارىنىڭ ورنىنا جايعاستى. جۋرناليستەردىڭ وزدەرىن دەپۋتات سەزىنۋگە مۇمكىندىك بەرگەن ءماجىلىس سپيكەرى مەرەكەلىك شاراعا ءوزى توراعالىق ەتىپ, دەپۋتاتتار مەن جۋرناليستەر جۇمىسىنىڭ ورتاق ماقساتىنا توقتالدى. ءماجىلىس سپيكەرىنىڭ ايتۋىنشا, تىكەلەي جۋرناليستەر قاۋىمىنىڭ قارىمدى قالامىنىڭ ارقاسىندا تاۋەلسىزدىگىمىزدىڭ 25 جىلدىعى, سونداي-اق, وسى ۋاقىت ىشىندە اتقارىلعان جۇمىستار, جەتكەن جەتىستىكتەر, بولاشاق ماقساتتار جان-جاقتى ايتىلدى. سونىڭ ىشىندە پارلامەنت ءماجىلىسى دەپۋتاتتارىنىڭ قىزمەتى جانە زاڭ شىعارماشىلىق جۇمىسى دا ەشقاشان جۋرناليستەر نازارىنان تىس قالعان ەمەس. وسىعان وراي پالاتا بيۋروسىنىڭ شەشىمىمەن كەلەر جىلدان باستاپ, ءماجىلىس قىزمەتىن ۇزدىك كورسەتكەن جۋرناليستەرگە ارنايى سىياقى تاعايىندالاتىن بولدى. بايقاۋ مەملەكەتتىك جانە ورىس تىلدەرىن قامتي وتىرىپ, بىرنەشە اتالىم بويىنشا وتكىزىلەدى. ال بايقاۋ وتكىزۋ جونىندەگى قۇرىلعان كوميسسياعا ەگەمەن ەلدىڭ تۇڭعىش اقپارات ءمينيسترى, ءماجىلىس دەپۋتاتى قۋانىش سۇلتانوۆ جەتەكشىلىك ەتەدى. كەشە, سونداي-اق, بىرقاتار جۋرناليس­كە ءماجىلىس توراعاسىنىڭ اتىنان العىس حات تابىس ەتىلدى, دەپ حابارلادى پارلامەنت ءماجى­لىسىنىڭ ءباسپاسوز قىزمەتى.