تابىستى قورعالعان بايانداما

جاقىندا شۆەيتساريانىڭ استاناسى – جەنەۆا قالاسىندا بۇۇ-نىڭ ادام قۇقىقتارى جونىندەگى كوميتەتىنىڭ 117-ءشى سەسسيا­سى بولىپ ءوتتى. وندا قازاقستان رەسپۋبليكاسىنىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ اياسىندا حالىقارالىق مىندەتتەمەلەرىن ورىنداۋ بويىنشا ەكىنشى كەزەڭدىك بايانداماسىن قورعاۋ جۇزەگە استى. قازاقستان دەلەگاتسياسىنىڭ قۇ­را­مىنا ادام قۇقى جونىندەگى ۇلتتىق كوميسسيانىڭ, جوعارعى سوت­تىڭ, باس پروكۋراتۋرانىڭ, ورتا­لىق سايلاۋ كوميسسياسىنىڭ, ءادى­لەت, ىشكى ىستەر, دەنساۋلىق ساق­تاۋ جانە الەۋمەتتىك دامۋ, سىرت­قى ىستەر, اقپارات جانە كوممۋني­كاتسيالار, ءبىلىم جانە عىلىم مينيستر­لىكتەرىنىڭ وكىلدەرى, سونداي-اق, ادام قۇقى جونىندەگى ۇلتتىق ورتالىقتىڭ وكىلدەرى ەندى. قازاقستان دەلەگاتسياسىنىڭ باسشىسى, ادىلەت ءمينيسترىنىڭ ورىنباسارى ەلۆيرا ازيموۆا بۇۇ-نىڭ اتالعان كوميتەتى مۇشەلەرىنە ەلىمىزدە ازاماتتىق جانە ساياسي قۇ­قىق­تار مەن ادام بوستاندىعىن قورعاۋ بويىنشا جۇرگىزىلىپ كەلە جات­قان ساياسات, قازاقستان قوعامى ءومى­رىن ايقىندايتىن بەس ينستيتۋت­تىق رەفورما مەن «100 ناقتى قادام» ۇلت جوسپارىن جۇزەگە اسىرۋ اياسىندا ۇلتتىق زاڭناماداعى سوڭعى وزگەرىستەر تۋرالى باياندامانى ۇسىن­دى. ودان ءارى دەلەگاتسيا مۇشەلەرى بۇۇ كوميتەتى ساراپشىلارىنىڭ سۇراقتارىنا جاۋاپ بەرىپ, ولاردى قازاقستانداعى الەۋمەتتىك-ەكو­نوميكالىق جانە قوعامدىق-ساياسي سالالارداعى شەشۋشى جاڭعىر­تۋلار مەن وزگەرىستەر تۋرالى قۇ­لاعدار ەتتى. وسى قاتاردا قىل­مىستىق سوت ءىسىن جۇرگىزۋ, سوت جانە قۇقىق قورعاۋ جۇيەسى, ادام قۇ­قى جونىندەگى وكىلەتتى وكىلدىڭ قىزمەتى, ادام قۇقىن قامتاماسىز ەتۋ سالاسىنداعى مەملەكەتتىك وكى­لەتتى ورگانداردىڭ قىزمەتىن ۇيىم­داستىرۋ باعىتتارىندا جۇزەگە اسىرىلىپ جاتقان جۇمىستار دا اتالدى. كوميتەت مۇشەلەرى وزدەرىنىڭ سۇراقتارى مەن كوممەنتاريلەرىندە قازاقستان رەسپۋبليكاسىندا ادام­داردىڭ ازاماتتىق جانە ساياسي قۇ­قىقتارىن قورعاۋ ماسەلەلەرىندە ىلگەرىلەۋشىلىك بار ەكەنىن اتاپ ءوتتى. اتاپ ايتقاندا, كوميتەت توراعاسى فابيان سالۆيولي قازاقستاننىڭ وسى سالادا سوڭعى ءتورت جىلدا قول جەتكىزگەن تابىستارى ايتارلىقتاي ەكەنىن ەرەكشە اتادى. گەرمانيا وكىلى انيا زايبەرت-فوور قازاقستان تاراپى كوميتەتتىڭ ۇسىنىمدامالارى مەن ەسكەرتپەلەرىن ورىنداۋعا ءۇل­كەن جاۋاپكەرشىلىكپەن كەلگەنىن كول­دەنەڭ تارتتى. كوميتەت باياندا­ما­شىلارىنىڭ ءبىرى ياحد بەن-اشۋر قازاقستاننىڭ ەل ىشىندە كونفەس­سياارالىق جانە دىنارالىق كەلىسىم­دى نىعايتۋدى قوسا العاندا, وسى باعىتتاعى حالىقارالىق باستا­مالارىنىڭ ماڭىزى دا اسا زور ەكەنىنە نازار اۋداردى. كوميتەت مۇشەلەرى الدىن الا قورىتىندىلارى رەتىندە جاريا ەتىلگەن ۇسىنىمدامالاردى جۇزەگە اسىرۋ ءۇشىن ءارى قاراي دا شارالار قابىلداۋ قاجەت بولىپ تابىلاتىنىن اتاپ كورسەتتى. «ەگەمەن-اقپارات»