قارىنداستىڭ قامى ءۇشىن...

پارا بەرگەن باسشى 48 ميلليون تەڭگە ايىپپۇل تولەيدى تەندەردىڭ تاساسىندا كوزگە كورىن­بەي­تىن تالان-تاراجدىڭ ءتۇرى بار. ءتىپتى, اعاي­ىن-تۋىستىڭ قامى ءۇشىن مەملەكەتتىك قىز­مەتكەرگە قويىلاتىن تالاپ پەن ءتارتىپ­تى تارك ەتەتىن باسشى دا تابىلىپ وتىر. كىم دەيسىز بە؟ قاتارداعى جاي قىزمەتكەر ەمەس, لاۋازىمدى تۇلعا, ناقتىلاي ايت­قان­دا, ول – جىلىوي اۋداندىق تۇرعىن ءۇي-كوم­­مۋنالدىق شارۋاشىلىق, جولاۋ­شىلار كولىگى جانە اۆتوموبيل جولدارى ءبو­لىمىنىڭ باسشىسى امانقوس ابە­نوۆ. مەملەكەتتىك قىزمەتتە 7 جىلدان استام تاجىريبەسى بولا تۇرا, ءوزىنىڭ قارىن­داسى ا.يمانباەۆا جۇمىس ىستەيتىن «تەپ­لو­تەح­نيكا» جاۋاپكەرشىلىگى شەكتەۋلى سەرىك­تەستىگىنىڭ قامىن ويلاۋعا بەكەم بەل بۋىپتى. ءسويتىپ, وسى سەرىكتەستىكتىڭ مەملە­كەتتىك ساتىپ الۋ كونكۋرسىنا قاتىسۋ كەزەڭىندە جەڭىمپاز بولۋىنا ءمۇد­دەلى بولعان. وسى ورايدا ءوزى قىزىعۋشىلىق تانىت­قان سەرىكتەستىكتى جەڭىم­پاز اتاندى­رۋعا ىقپال ەتكەنى جانە قامقور­لىعى ءۇشىن وبلىستىق مەملەكەتتىك ساتىپ الۋ باسقار­ماسىنىڭ مەملەكەتتىك ساتىپ الۋ جانە موني­تورينگىلەۋ ءبولىمىنىڭ باس مامانى ك.مۇح­تاروۆقا پارا بەرگەن. پارا مولشەرى – 1 600 000 تەڭگە. دەسەك تە ول شىنىمەن قارىنداسىنىڭ قامىن ويلادى ما, الدە باسقا سەبەبى بار ما؟ بىزدىڭشە مۇنىڭ استارىندا ءبىر گاپ بار سەكىلدى. الدىمەن ايتارىمىز, امانقوس ابەنوۆ مەملەكەتتىك قىزمەتتە 2007 جىل­دان بەرى تاجىريبە جيناعان. اۋەلى جا­ڭا قاراتون كەنتى اكىمىنىڭ مىندەتىن اتقا­رۋشى بولۋدان باستالعان مانسابى سول جىلدىڭ قىركۇيەگىندە جىلىوي اۋدا­نى اكىمىنىڭ ورىنباسارىنىڭ مىندەتىن اتقا­رۋشى بولۋمەن جالعاسىپتى. سودان كەيىنگى 2008-2010 جىلدارى اۋدان اكىمىنىڭ ورىن­باسارى بولىپتى. ال 2010 جىلدىڭ اقپا­نىندا اتالعان ءبولىمنىڭ باسشىلىعىن قولى­نا العان. مۇنىڭ ءبارىن تىزبەلەگەندەگى ايت­پاعىمىز, قارىنداسىنىڭ قامىن ويلا­عىش «قامقورشى» مەملەكەتتىك قىزمەت­كە كەلگەنگە دەيىن «تەپلوتەحنيكا» سەرىك­تەستىگىنە 4 جىل بويى ديرەكتور بولىپتى. وسى دەرەككە قاراعاندا, وعان «تەپ­لوتەحنيكا» جشس اۋەلدەن جات ەمەس بولۋى كەرەك. الايدا, №2 اتىراۋ قالالىق سوتى امانقوس ابەنوۆتى قىلمىستىق كو­دەكستىڭ 367-بابىنىڭ 2-بولىگىندە كوز­دەلگەن قىلمىستى جاسادى دەپ تانىدى. وسىعان بايلانىستى اتالعان باپ بويىن­شا ونى مەملەكەتتىك قىزمەتتى اتقارۋ قۇقى­عىنان ءومىر بويىنا ايىرىپ, ءوزى ۇسىن­عان پارانىڭ 30 ەسەلەنگەن سوماسى ءمول­شەرىندە, ياعني 48 000 000 تەڭگە ايىپپۇل سالۋ جازاسىن تاعايىندادى. وسىلايشا, جى­لىوي اۋداندىق اكىمدىگىنىڭ پارا بەر­گىش لاۋازىمدى قىزمەتكەرى لايىقتى جازاسىن الدى. جولداسبەك شوپەعۇل, «ەگەمەن قازاقستان» اتىراۋ وبلىسى