تەڭدەسسىز بالەت تۋىندىسى

جاقىندا «استانا وپەرا» مەملەكەتتىك وپەرا جانە بالەت تەاترىندا وتەتىن «پاريج قۇداي اناسى سوبورى» بالەتىنىڭ پرەمەراسىنا وراي ءباسپاسوز ءماسليحاتى ۇيىمداستىرىلدى. وعان «استانا وپەرا» تەاترى­نىڭ ديرەكتورى تولەۋبەك الپيەۆ, قويۋشى-بالەتمەيستەر لۋيدجي بونينو, بالەتتىك ترۋپپانىڭ كور­كەمدىك جەتەكشىسى التىناي اسىل­مۇراتوۆا, بالەتتىك ترۋپپانىڭ ديرەكتورى تۇرسىنبەك نۇرقاليەۆ, كۆازيمودو رولىندەگى باقتيار ادام­جان, ەسمەرالدا رولىندەگى ايگەرىم بەكەتاەۆا, سياقتى تانىمال ساڭلاقتار قاتىسىپ, جۋرناليستەردىڭ قويعان سۇراق­تارىنا جاۋاپ بەردى. تەاتر ديرەكتورى تولەۋبەك الپيەۆ حح عاسىردىڭ ايتۋلى حورەوگرافى رولان پەتيدىڭ ايگىلى بالەتىن قازاقستاندا ساحنالاۋ «رولان پەتي بالەتتەرى» قورى­نىڭ رۇقساتىمەن جۇزەگە اسىرىل­عانىن جانە دە ەلوردالىق بالەت ترۋپپاسىنىڭ مۇنى جوعارى دەڭگەيدە ورىنداپ شىققانىن اتاپ ءوتتى. سونداي-اق, ول تانىمال قويىلىمدى قازاق ساحناسىنا الىپ كەلۋگە باستاماشى بولعان بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا مەن فران­تسيالىق ارنايى ماماندارعا زور العىسىن ءبىلدىردى.  «بۇل پارتيانى ورىنداۋ ءۇشىن مەن ءبىراز تەر توكتىم. لۋيدجي بونينو حورەوگرافيانىڭ بارلىق قىر-سىرىن ەگجەي-تەگجەيلى ايتىپ تا, كورسەتىپ تە بەردى. دايىن­دىقتىڭ بىرنەشە كەزەڭىنەن وتتىك, تەحنيكالىق ەرەكشەلىكتەردى مەڭ­گەرىپ, كوركەمدىك وبرازدا جۇ­مىس جاسادىق. رەپەتيتسيا بالەت زالىنان ساحناعا اۋىسقاندا, بار­لىق ارتىستەر ءوز كەيىپكەرىن تولىق­قاندى اشا ءبىلۋى كەرەك. پلاس­تيكاسى ۇيرەنشىكتى بولما­عان­دىقتان, بارىمىزگە قيىن­دىق تۋدىردى. مەنىڭ كاسىبي قورجىنىمدا باس­قا دا رولدەر كوپ, بىراق مۇنداي پارتيانى العاش رەت ورىنداۋىم. كۆازيمودونىڭ كەمىستىگىنە قارا­ماستان, مەن ونىڭ جانىنىڭ تازالىعىن كورسەتە ءبىلۋىم كەرەك. مۇنداي بالەتتى, مۇنداي پارتيانى تەك ارمانداۋعا بولادى», – دەيدى رۇستەم سەيىتبەكوۆ... تراگەديالىق سارىندا ءوربيتىن «پاريج قۇداي اناسى سوبورى» بالەتى بي ونەرىنىڭ ناعىز كلاسسيكالىق ءىنجۋ-مارجانى سانالادى.  ارايلىم تاستەمىر,  ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 2-كۋرس ستۋدەنتى