كىرپىش ىزدەگەن كىسى «بازا-servis»-كە بارادى

بۇل كاسىپورىن ەكى جولدىڭ قاق ورتاسىندا ورنالاسقان. ءبىر جاعىندا ۇزىنىنان شۇباتىلىپ الماتى, استانا, شىمكەنتكە اپاراتىن تەمىرجول, ەكىنشى جاعىندا كولىگى ۇزىلمەيتىن كادىمگى ۇلكەن تراسسا جاتىر. بىلايشا ايتقاندا «بازا-servis» جشس وتە ىڭعايلى جەردە ورنالاسقان. بازاردا دا ادام كوپ جۇرەتىن جەردەن ورىن الساڭ, ساۋداڭنىڭ جەڭىل بولاتىنى سياقتى «بازا سەرۆيسكە» دە جول-جونەكەي بۇرىلىپ, ءونىمىن ساۋدالاۋشىلار سانى كوپ. مىنە, ءبىز اڭگىمە ەتكەلى وتىرعان بايزاق اۋدانى, ۇشبۇلاق ستانساسى ماڭىنداعى «بازا-servis» جشس 2011 جىلدان بەرى كورەيالىق جاڭا تەحنولوگيا بويىنشا كىرپىش شىعارۋمەن اينالىسىپ كەلەدى. – تەمىرجول مەن كولىك جولىنىڭ تۋرا ىرگەمىزدە جاتۋى كاسىبىمىزدىڭ العا باسۋىنا كوپ كومەگىن تيگىزۋدە, – دەيدى بۇل جونىندە «بازا-servis» جشس-ءنىڭ ديرەكتورى رۇستەم سەيداحمەتوۆ. – وسى تەمىرجول ارقىلى سوناۋ مويىنقۇمداعى مىڭارال زاۋىتىنان تىكەلەي تسەمەنت الدىرىپ وتىرمىز. بۇل اجەپتەۋىر ارزانعا تۇسەدى. سون­داي-اق, كولىك جولى ارقىلى ءونىمىمىزدى مولىنان ساۋدالاپ, تاسىمالداپ جاتىرمىز. جاقىندا «دامۋ» باعدارلاماسى بويىنشا نەسيە الىپ, 800 مىڭ اقش دوللارىنا جاڭا قوندىرعىلار ورناتتىق. ۇلكەن جولدىڭ بو­يىندا ورنالاسقاندىقتان ءبىز­دىڭ كاسىپورىنعا اتباسىن بۇرۋشىلار وتە كوپ. ونىڭ ۇستىنە بۇل ايماقتا بىزگە باسەكەلەس بولاتىن ەشقانداي كاسىپورىن جوق. سودان بولار ءۇي سوعىپ, قۇرىلىس جۇرگىزەتىندەر ءبىزدى كوبىنەسە وزدەرى ىزدەپ كەلەدى. بەس ءتۇرلى ءونىم شىعارىپ, قازىر كۇنىنە 5 مىڭ كىرپىش جونەلتۋدەمىز. ايتسە دە كاسىبىمىزدى تەك ءبىر باعىتتا عانا وربىتپەي, قاسىمىزدان ۇلكەن كوكونىس ساقتاۋ قويماسىن سالۋدى ءجون كوردىك. ىرگەمىزدەگى قاتىناس جولدارى بۇل قويما جۇمىسىنىڭ العا باسۋىنا كوپ سەپتىگىن تيگىزەتىنى انىق. جانە قويماعا ءونىمدى وزگەلەردەن عانا جيناماي, ءوزىمىز 20 گەكتار جەرگە باۋ ەكتىك. مىنە, «بازا-servis» جشس بارلىق مۇمكىندىكتى پايدالانىپ, كاسىبىن ورگە وزدىرۋدىڭ بار امالىن جاساۋدا. بۇل كاسىپورىن كەزىندە «بيزنەستىڭ جول كارتاسى-2020» باعدارلاماسى بويىنشا ۇستەمەلىك 7 پايىزبەن «تسەسنا بانك» اق-تان 265 ملن. تەڭگە نەسيە الىپ, وعان 35 ملن. تەڭگە ءوز قاراجاتىن قوسىپ, زاۋىت قۇرىلىسىن اياقتاعان بولاتىن. باس-اياعى 300 ملن. تەڭگەنى قۇرايتىن بۇل جوبا ايماقتىق يندۋستريالاندىرۋ كارتاسىنا ەنگىزىلگەن. توعىز جولدىڭ تورابىندا ورنالاسقان «بازا-servis» جشس-ءنىڭ بيزنەستە باعىندىرار بيىگى ءالى الدا ەكەنى ءسوزسىز. ورالحان ءداۋىت, «ەگەمەن قازاقستان» جامبىل وبلىسى