كوكشەتاۋدا بىرنەشە كۇننەن بەرى اەروپورت جابىلىپ تۇر

كوكشەتاۋ. 29 مامىر. اقمولا وبلىسىنىڭ ورتالىعىنداعى اەروپورت مامانداندىرىلعان اكىمگەرشىلىك سوتىنىڭ شەشىمىمەن بىرنەشە كۇننەن بەرى جابىق تۇر. بۇل تۋرالى وبلىستىق سوت ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. سوت قالانىڭ اۋە قاقپاسىن 10 كۇن مەرزىمگە جاپقان بولاتىن. وبلىستىق سوتتىڭ ءباسپاسوز قىزمەتى حابارلاعانداي, سوتتىڭ اەروپورتتىڭ يەسى بولىپ تابىلاتىن «كوكشەتاۋ اۆياكومپانياسى» اق ءىس-ارەكەتىن توقتاتۋ تۋرالى شەشىمى اۆياتسيالىق قاۋىپسىزدىك تالاپتارىنىڭ بۇزىلۋىنا بايلانىستى 1 اقپاندا قابىلدانعان. مەملەكەتتىك باقىلاۋ جانە تەكسەرۋ ورگاندارىنىڭ زاڭدى تالاپتارىن, ۇسىنىستارىن, قاۋلىلارىن ورىنداماعاندارى ءۇشىن اۆياكومپانيانىڭ لاۋازىمدى تۇلعالارىنا 200 ەسەپتى ايلىق كولەمىندە ايىپ پۇل سالىنعان. سونىمەن بىرگە اەروپورتتىڭ جۇمىسى 10 كۇنگە توقتاتىلعان. بۇل شارا 20 مامىردان باستالدى. ەندى 30 مامىر كۇنى اۋە قاقپاسى قايتادان ءوزىنىڭ جۇمىسىن جالعاستىرادى. باقبەرگەن امالبەك. دەرەك: اقمولا وبلىستىق سوتىنىڭ ءباسپاسوز قىزمەتى.