بۇل جولعى جيىن ەرەكشەلىگى – قاتىسۋشىلار بىرەگەيلىگىندە

31 مامىردا استاناداعى بەيبىتشىلىك جانە كەلىسىم سارايىندا «دىندەر تەرروريزمگە قارسى» حالىقارالىق كونفەرەنتسياسى وتەدى. اتالعان شارا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ بۇۇ باس اسسامبلەيا­سى­نىڭ 70-ءشى سەسسياسىندا ۇسىنعان حالىقارالىق تەرروريزمگە قارسى ءىس-قيمىل جونىندەگى باستامالارىن ىسكە اسىرۋ اياسىندا ۇيىمداستىرىلدى. كونفەرەنتسيا 1 ماۋسىم­دا وتەتىن الەمدىك جانە ءداستۇرلى دىندەر ليدەرلەرى سەزى حات­شى­لى­عىنىڭ كەزەكتى وتىرىسىنىڭ قارساڭىندا بولادى, دەپ حابارلادى پارلامەنت سەناتىنىڭ ءباسپاسوز قىزمەتى. قازاقستان پارلامەنتى سەناتى­نىڭ توراعاسى, الەم­دىك جانە ءداستۇرلى دىندەر ليدەر­لەرى سەزى حاتشىلىعىنىڭ باسشىسى قاسىم-جومارت توقاەۆ اتاپ وتكەندەي, «دىندەر تەرروريزمگە قارسى» كونفە­رەن­تسياسىنىڭ ەرەكشە­لىگى – وعان قا­تىسۋ­شىلاردىڭ بىرەگەي قۇ­را­مىندا بولىپ وتىر. «پار­لا­مەنت­شىلەر, ءدىني قايرات­كەر­لەر, حالىقارالىق ۇيىم­داردىڭ باسشىلارى مەن ساراپشىلار تەر­روريزمگە قارسى كۇرەس ماسە­لە­لەرىن تالقىلاۋ ءۇشىن ال­عاش رەت ءبىر ۇستەل باسىندا جينالماق. قاتى­­سۋ­شىلاردىڭ وسىنداي وكى­لەت­تى قۇرامى قازاقستاننىڭ باس­تا­­ما­شى­لىعىمەن شاقى­رىل­عان فورۋم­نىڭ ايرىقشا ماڭىز­دى­لى­عىن كورسەتەدى», – دەدى توراعا. «كونفەرەنتسيا الەمدىك جانە ءداستۇرلى دىندەر ليدەرلەرىنىڭ سەزى اياسىندا باستالعان سايا­سي جانە ءدىني قايراتكەرلەر ءۇن­قاتى­سۋىنىڭ قيسىندى جال­عاسى­نا اينالادى. وزدەرىڭىزگە ءمالىم بولعانداي, بۇۇ باس حاتشىسى, يوردانيا كورولى, فينليانديا پرەزيدەنتى, ەقىۇ, يىۇ جانە باسقا دا حالىقارالىق ۇيىم­دار­دىڭ باسشىلارى العاش رەت قاتىس­قان, 2015 جىلى وتكەن V سەزد جاڭا تۇرپاتتاعى ءۇن­قاتىسۋدىڭ قاجەتتىگىن ناق­تىلاي ءتۇستى», – دەپ اتاپ ءوتتى سەنات توراعاسى. ق.توقاەۆتىڭ ايتۋىنشا, «الەم. ءححى عاسىر» ما­ني­­فە­سىن­دەگى قازاقستان پرە­زيدەنتى كوتەر­گەن جاھاندىق قاۋىپسىزدىكتى نىعايتۋ ءجونىن­دەگى يدەيالاردى دامىتۋ كون­فەرەنتسيانىڭ ماڭىزدى تاقى­رىبىنا اينالماق. «حا­لىق­ارالىق قوعامداستىق بىرىك­كەن ۇلتتار ۇيىمىنىڭ ۇيلەستىرۋشى ءرولىن, ونىڭ ىشىندە تەرروريزممەن كۇرەسكە قاتىستى قىزمەتىن نىعايتۋى قاجەت. فورۋم بارىسىندا ءبىز قازاقستان كوش­باس­شىسىنىڭ ادامزاتتى سوعىستار مەن قاقتىعىستاردان قۇتقارۋ جونىندەگى باستامالارىن تال­قىلاۋدى جوسپارلاپ وتىرمىز», – دەدى توراعا. توراعانىڭ پىكىرىنشە, «دىندەر تەرروريزمگە قارسى» كونفەرەنتسياسى تەرروريزممەن كۇرەستەگى ءدىني قايراتكەرلەردىڭ نەگىزگى ءرولىن ايقىنداۋمەن قاتار, انتيتەرروريستىك قىز­مەت­تىڭ پارلامەنتتىك ولشە­مىن نىعايتۋعا ارنالعان. حالىق­ارا­لىق تەرروريزمگە قارسى قۇقىق­تىق ءىس-قيمىلدى جەتىل­دىرىپ, وسى قاتەرگە قارسى كۇرەستە پارلامەنتتىك ديپلوماتيانىڭ الەۋەتىن ىسكە قوسۋ ماڭىزدى». كونفەرەنتسيا جۇمىسىنا ەقىۇ پارلامەنتتىك اسسام­بلەيا­سىنىڭ باس حاتشىسى رو­بەرتو مونتەللا, بىرىككەن اراب امىرلىكتەرى فەدەرالدىق ۇلتتىق كەڭەسىنىڭ توراعاسى امال ابداللا ءال كۋبەيسي, مىسىردىڭ ۋاقىپ ىستەرى جونىندەگى ءمينيسترى مۋحتار دجۋما, «وركەنيەتتەر ۇنقاتىسۋى» دۇنيەجۇزىلىك قو­عامدىق فورۋمى حالىقارالىق ۇيلەستىرۋ كوميتەتىنىڭ ءتور­اعاسى ۆالتەر شۆيممەر, حا­لىق­­ارالىق بەيبىتشىلىك ينس­تيتۋتىنىڭ پرەزيدەنتى تەرە رود-لارسەن, تمد پاا, بۇۇ وركەنيەتتەر اليانسى, ەقىۇ/دياقب, اوسشك جانە كورول ابداللا اتىنداعى ءدىنارا­لىق جانە مادەنيەتارالىق ۇنقاتى­سۋ حالىقارالىق ورتالىعىنىڭ وكىلدەرى قاتىسادى. جالپى, الەم­­­­ن­ىڭ 41 ەلىنەن, ونىڭ ءىشىن­دە اۋستريا, ازەربايجان, اۋعان­ستان, بەلارۋس, ۇلىبريتانيا, ماجار­ستان, گەرمانيا, گرەكيا, گرۋزيا, يران, يتاليا, قىتاي, قىرعىزستان, لاتۆيا, نيدەرلاند, پاكىستان, رەسەي, رۋمىنيا, ساۋد ارابياسى, تاجىكستان, تۇركيا, فرانتسيا, چەحيا, شۆەتسيادان جانە باسقا دا ەلدەردەن 63 دەلەگاتسيا قاتىسادى دەپ كۇتىلۋدە. ودان باسقا, فورۋمعا يسلام, حريستيان, يۋدايزم, بۋدديزم, داوسيزم جانە يندۋيزم دىندەرىنەن وكىلەتتىك ەتەتىن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ مۇشەلەرى قاتىسادى. اتاپ ايتقاندا, استاناعا ءال-ازھار ۋنيۆەرسيتەتىنىڭ, دۇنيەجۇزىلىك يسلام ليگاسىنىڭ, ماسكەۋ پاتريارحاتىنىڭ, دىنارالىق ۇنقاتىسۋ جونىندەگى پاپا كەڭەسىنىڭ (ۆاتيكان), دۇنيە­جۇزىلىك ليۋتەران فەدەرا­تسيا­سىنىڭ, انگليكان شىركەۋى­نىڭ, كونستانتينوپول پاتريار­حاتىنىڭ, ارميان اپوستول ءشىر­كەۋى­نىڭ, يزرايل باس سەفارد­تىق جانە اشكەنازدىق راۆۆين­دەرىنىڭ, دۇنيەجۇزىلىك بۋدديس­تەر قاۋىمداستىعىنىڭ, داو اسسوتسياتسياسىنىڭ, «سومايا بحارا­تيا سانسكريتي پيتام» ءۇندى مادەنيەت ورتالىعى مەن ت.ب. ۇيىم­داردىڭ باسشىلارى مەن وكىلدەرى كەلەدى.