جاڭا اكادەميا

استانادا قازاق ۇلتتىق حورەوگرافيا اكادەمياسى اشىلادى. كەشە ونەر ورداسىنا شاكىرتتەر قابىلداۋ باستالدى. بۇل وقۋ ورنى كوپ دەڭگەيلى كاسىبي حورەوگرافيالىق ءبىلىم بەرۋدىڭ تولىق تسيكلىن قامتيتىن بولادى. حورەوگرافيا اكادەمياسىندا مەكتەپ جاسىنداعى بالالار مەن جاس­تار بالەت ونەرىن مەڭگەرەدى. استانا قالاسى اكىمدىگىنىڭ حابارلاۋىنشا, وقۋ ورنىندا  ءبىلىم بەرۋدىڭ كوپساتىلى فورماسى باستاپقى, تەحنيكالىق جانە كاسىپ­تىك, سونداي-اق, جوعارى (باكالۆريات) جانە جوعارى وقۋ ورنىنان كەيىنگى (ماگيس­تراتۋرا, دوكتورانتۋرا PhD) ءبىلىم بەرۋدەن تۇرادى. اكادەميا «بالەت ءارتىسى», «بي انسام­بلىنىڭ ءارتىسى», «رەجيسسۋرا», «حورەوگرافيا», «ونەر­­­تانۋ» جانە «ارت-مەنەدجمەنت» ما­مان­­­دىق­تارى بويىنشا كادرلاردى دايىن­­دايدى. ءبىلىم ورداسىنىڭ ماقساتى – حورەو­گرا­فيا ونەرىن دامىتۋ, جاستارعا رۋحاني جانە ەستەتيكالىق تاربيە بەرۋ. حورەوگرافيا اكادەمياسىندا بالەت ارتىستەرى نەگىزگى جالپى نەمەسە ورتا جالپى ءبىلىم بازاسىندا كاسىبي ءبىلىم الاتىن بولادى. شاكىرتتەر بالەت ونەرىنەن بىرەگەي تاجىريبە جيناۋ ءۇشىن شاعىن جانە ۇلكەن ساحنالاردا ونەر كورسەتەدى. اكادەميا عيماراتى حۋسەين بەن تالال كوشەسى, 9 مەكەنجايى بويىنشا ەكسپو كورمەسىنە قارسى ورنالاسقان. وقۋشى­لارعا 498 گرانت ۇسىنىلادى.  سونداي-اق, اقىلى نەگىزدە دە ءبىلىم الۋ مۇمكىندىگى قاراس­تىرىلعان. – كەيدە بالانىڭ الەۋەتى بىردەن كو­رىنبەيدى. ىرىكتەۋ قاتاڭ تۇردە جۇرگىزىلەدى. سون­دىقتان اقىلى نەگىزدە وقۋ مۇمكىندىگى بەرىلىپ وتىر. ودان ءارى وقۋشى ءوزىن جاقسى كورسەتسە, گرانتقا اۋىسۋىنا بولادى, – دەدى قازاق ۇلتتىق حورەوگرافيا اكادەمياسىنىڭ وكىلى اسەل تانيشەۆا. اكادەميا ستۋدەنتتەرگە جاتاقحانا بەرە­دى. مەديتسينالىق قىزمەت تە كورسەتەدى. داستان كەنجالين, «ەگەمەن قازاقستان»