جالپى, اقتوبەلىك جاستار پرەزيدەنت باستامالارىن جۇزەگە اسىرۋدا كوشباسشى بولىپ كەلەدى, دەدى وڭىرگە ىسساپارمەن كەلگەن قازاقستان جاستار كونگرەسىنىڭ اتقارۋشى ديرەكتورى ايدىن ءسابيتوۆ. بيىل «جاسىل ەل» ەڭبەك وتريادىنىڭ اقتوبە وڭىرلىك فيليالى 5 مىڭنان استام جاستى جۇمىسپەن قامتاماسىز ەتۋدى كوزدەۋدە. بۇل – باسقا وڭىرلەرگە قاراعاندا, وتە جوعارى كورسەتكىش. باستاما وبلىس باسشىلىعىنان كەڭ قولداۋ تاۋىپ وتىر. بيىلعى جىلى «جاسىل ەل» قوزعالىسىنا قاتىسۋشىلار ءۇشىن 300 ميلليون تەڭگە ءبولىندى.
بۇل قارجى جاسىلەلدىكتەردىڭ بۇرىنعىدان دا ۇزاعىراق ەڭبەك ەتىپ, ءونىمدى جۇمىس ىستەۋلەرىنە, سونداي-اق, ەڭبەكاقىلارىنىڭ جوعارى بولۋىنا جۇمسالاتىن بولادى. ولار قالانى كوگالداندىرۋ, اعاش كوشەتتەرىن وتىرعىزۋ, كۇتىپ-باپتاۋ جانە قۋراعان اعاشتاردى كەسۋ جۇمىستارىمەن اينالىسادى. جاستاردىڭ ەڭبەك ەتۋلەرىنە بارلىق جاعداي تۋعىزىلعان, جۇمىس كيىمدەرىمەن قامتاماسىز ەتىلگەن. قازىردىڭ وزىندە ولارعا جۇمىس ىستەيتىن اۋماقتار بەلگىلەنىپ, ءبولىندى.
ساتىبالدى ءساۋىرباي, «ەگەمەن قازاقستان» اقتوبە وبلىسى
