ماڭىزدى ماسەلەلەر ءسوز بولدى

پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ استانا ەكونوميكالىق فورۋمىنا قاتىسۋ­شىلاردىڭ بىرقاتارىمەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى. كولۋمبيا ۋنيۆەرسيتەتى جەر ينستيتۋتىنىڭ ديرەكتورى دجەففري ساكس  پەن باقىتجان ساعىنتاەۆ كەزدەسۋ بارىسىندا ەكونوميكانى ءارتاراپتاندىرۋ, قازاقستانداعى قۇرىلىمدىق رەفورمالار ماسەلەلەرىن تالقىلادى. SPRING دامۋ جونىندەگى اگەنت­تىگىنىڭ (سينگاپۋر) توراعاسى فيلليپ يەو مەن پرەمەر-مي­نيستر­دىڭ ءبىرىنشى ورىنباسارى سين­گاپۋردىڭ دامۋ ينستيتۋتىنىڭ قازاق­ستانمەن ىنتىماقتاس­تىعى ءۇشىن ماڭىزدى سالالاردى بەلگىلەدى. كولۋمبيا ۋنيۆەرسيتەتىنىڭ ەكونوميكا پروفەسسورى, دۇنيە­جۇزىلىك ەكونوميكالىق فورۋمنىڭ جاھان­دىق باسەكەگە قابىلەتتىلىك يندەكسىنىڭ اۆتورى كساۆەر سالا-ي-مارتينمەن كەزدەسۋ بارىسىندا باقىتجان ساعىنتاەۆ قازاقستاندا  2018 جىلعا دەيىن جاھاندىق باسەكەگە قابىلەتتىلىك يندەكسىنىڭ كورسەتكىشتەرىن جاقسارتۋ بويىنشا جۇزەگە اسىرىلىپ جاتقان شارالار تۋرالى اڭگىمەلەدى. سالا-ي-مارتين قازاقستاننىڭ باسەكەگە قابىلەتتىلىگىن جاقسارتۋ جانە ءبىزدىڭ ەلىمىزدىڭ ورتا جانە ۇزاق مەرزىمدى بولاشاقتا تۇراقتى ەكونوميكالىق وسىمگە قول جەتكىزۋى بويىنشا ءوزىنىڭ ساراپشىلدىق پىكىرىن ءبىلدىردى. ەكونوميكالىق ىنتىماقتاس­تىق جانە دامۋ ۇيىمى باسەكە­لەستىك جونىندەگى كوميتەتىنىڭ ءتور­اعاسى فرەدەريك جەننيمەن كەزدەسۋدە ەكونوميكانى رەتتەۋدەن مونوپولياعا قارسى رەتتەۋ جولىمەن باسەكەلەستىكتى قورعاۋعا كوشۋ ماسەلەسى تالقىلاندى. برەتتون-ۆۋدستى جاڭعىرتۋ كوميتەتىنىڭ اتقارۋشى ديرەكتورى مارك ۋزان قازىرگى قارجى ارحيتەكتۋراسىن جاھاندىق رەفورمالاۋ ۇدەرىسى تۋرالى حابارلادى. پرەمەر-ءمينيستردىڭ ءبىرىنشى ورىنباسارى سونداي-اق نوبەل سىيلىعىنىڭ لاۋرەاتى كريستوفەر پيسساريدەس­پەن, ەكونوميست ارتۋر لاففەر­مەن, پروفەسسور-دوكتور كلاۋس مانگولدپەن كەلىسسوزدەر جۇرگىزدى.