كانادامەن ارىپتەستىگىمىز قالىپتى

كەشە سىرتقى ىستەر مينيسترلىگىندە جۋرناليستەرگە بريفينگ بەرۋ كەزەگى قازاقستاننىڭ كاناداداعى ەلشىسى, يامايكا مەن دومينيكان رەسپۋبليكاسىندا توتەنشە جانە وكىلەتتى ەلشى قىزمەتىن قوسا اتقارۋشى كونستانتين جيگالوۆقا كەلدى. ەلشى الدىمەن كانادا تۋرالى ايتىپ, ونىڭ باتىس جارتى شارداعى جەر كولەمى ەڭ ۇلكەن ەل ەكەنىن اتاپ ءوتتى. الايدا, ونىڭ باسىم بولىگىن تۋندرا مەن تايگا باسىپ جاتىر ەكەن. ءبىر قىزىعى, كانادا كۇنى بۇگىنگە دەيىن فورمالدى تۇردە ۇلىبريتانياعا قارايتىن ەل دەپ سانالادى. ەليزاۆەتا ءىى پاتشايىمنىڭ كاناداداعى وكىلى گەنەرال-گۋبەرناتور. الايدا ناقتى بيلىك پرەمەر-ءمينيستردىڭ قولىندا, بۇل قىزمەتتى 2015 جىلدىڭ قازانىنان بەرى دجاستين تريۋدو اتقارىپ كەلەدى. كانادا –  مۇنايدىڭ بارلانعان كولەمى بويىنشا دۇنيەجۇزىندە 3-ءشى ورىن, ال گاز بويىنشا 22-ءشى ورىن الاتىن مەملەكەت. جەردىڭ 16 پايىزى اۋىل شارۋاشىلىعى ماقساتىنا قولدانۋعا جارامدى. استىق ءوندىرۋ مەن مال ءوسىرۋ بويىنشا كانادا الەمدەگى وزىق ەلدەردىڭ قاتارىندا تۇر. بۇل ەلدىڭ ونەركاسىبى دە جوعارى دامىعان, ال بانك جۇيەسى الەمدەگى ەڭ تۇراقتىلاردىڭ قاتارىندا ەكەن. 2007-2008 جىلدارداعى قارجى داعدارىسىندا بىردە-ءبىر بانك بانكروتقا ۇشىراماپتى. جان باسىنا شاققانداعى ءىجو ۇلەسى – 44 مىڭ دوللار, بۇل كانادانى الەمنىڭ جوعارى دامىعان جەتى مەملەكەتىنىڭ قاتارىنا ەنگىزەدى. كانادانىڭ قازاقستانمەن اراداعى قارىم-قاتىناسى بارلىق سالادا قالىپتى جاعدايدا دامىپ كەلەدى. پرەزيدەنت ن.نازارباەۆتىڭ بۇل ەلگە جاساعان العاشقى رەسمي ساپارى 2003 جىلى بولعان. 2013 جىلى قازاقستانعا كانادانىڭ سىرتقى ىستەر ءمينيسترى دج.بەردا رەسمي ساپارمەن كەلىپ, ساپار بارىسىندا اتومدى بەيبىت ماقساتقا پايدالانۋدا ىنتىماقتاستىق ورناتۋ تۋرالى كەلىسىمگە قول قويىلعان. قازاقستان مەن كانادا اراسىنداعى ەكىجاقتى ساۋدا اينالىمى 2014 جىلى 7 ملرد. اقش دوللارى كولەمىنە جەتكەن. بۇل كورسەتكىش قازاقستاندى كانادانىڭ پوستكەڭەستىك ەلدەر عانا ەمەس, بۇكىل شىعىس ەۋروپا ەلدەرىندەگى ارىپتەستەرىنىڭ الدىنا شىعارعان. كانادا بۇكىل الەمگە تانىمال 18 اسا ءىرى پورتتىڭ يەسى, جىل سايىن ولارعا 310 ملن. توننا جۇك كەلىپ تۇرادى. كانادا سىرتقى ىستەر مينيسترلىگىنىڭ مالىمەتتەرىنە قاراعاندا, بۇل ەلدىڭ 2010-2014 جىلدارداعى قازاقستان ەكونوميكاسىنا سالعان ينۆەستيتسيا كولەمى 11 ملرد. دوللار بولعان. ينۆەستيتسيانىڭ نەگىزگى بولىگى مۇناي-گاز جانە وڭدەۋ سالالارىنا باعىتتالعان. قازىر كانادا قازاقستانداعى ينۆەستور ەلدەردىڭ اراسىندا الدىڭعى وندىققا ەنەدى. ال قازاقستان ۇلتتىق بانكىنىڭ مالىمەتتەرىنە قاراعاندا, قازاقستاننان كاناداعا باعىتتالعان ينۆەستيتسيا كولەمى 2015 جىلى 12,1 ملن. اقش دوللارىن قۇراپتى. ەلشىنىڭ ايتۋىنشا, ەكى ەلدىڭ اراسىنداعى مادەني-گۋمانيتارلىق سالا­داعى ىنتىماقتاستىق بويىنشا دا ىسكە اسىرىلا باستاعان جوبالار كوپ ەكەن. 2014 جىلى ەلشىلىكتىڭ ۇيىمداستىرۋىمەن قازاقستاننىڭ كاناداداعى كۇندەرى ءوتىپ­تى. بۇل ەكى ەلدىڭ 22 جىلدىق ىنتى­ماقتاستىعىنداعى ەڭ ۇلكەن مادەني شارا بولدى, دەدى ەلشى. بىلتىر وسى باعىتتاعى بايلانىس كانادادا قازاق حاندىعىنىڭ 550 جىلدىعىن اتاپ ءوتۋ شارالارىمەن جالعاسقان كورىنەدى. سونىمەن قاتار, ك.جيگالوۆ يامايكا مەن دومينيكان رەس­پۋبليكاسى سياقتى شاعىن مەملەكەتتەرمەن دە قازاقستان­نىڭ ىنتىماقتاستىعى تۋرالى ايتىپ ءوتتى. بۇل ەلدەرمەن باسقاسى­نان گورى تۋريستىك يندۋستريا سالاسىنداعى ارىپتەستىك جوعارى كورىنەدى. جاقسىباي سامرات, «ەگەمەن قازاقستان»