اۋىل جاستارىنىڭ القالى جيىنى

«گرينلەند» دەمالىس بازاسىندا «جاستار – اۋىل رەسۋرسى» ءى شەك­ارالىق اۋىل جاستارى سلەتى ءوتتى. وعان ەلىمىزدىڭ ىرگەلەس جاتقان اقتوبە, اتىراۋ, باتىس قازاقستان, قوستاناي, قىزىلوردا, ماڭعىس­تاۋ وبلىستارىنان, كورشىلەس رەسەي فەدەراتسياسىنىڭ باش­قۇرت رەسپۋبليكاسى مەن ورىنبور وبلىسىنان اۋىل جاستارى قوزعا­لىستارىنىڭ كوشباسشىلارى قاتىستى. شارا قوناق­­تا­رىنىڭ قاتارىندا نيدەرلاندتان كەلگەن ساياحاتشىلار دا بولدى. اۋىل جاستارىنىڭ القالى جيىنىنا وبلىس اكىمى بەردىبەك ساپارباەۆ قاتىسىپ, سلەتكە قاتىسۋشىلارعا قۇتتىقتاۋ ءسوز ارنادى. – مەملەكەت باسشىسى ن.نازارباەۆ جاستاردىڭ وزدەرىن دامىتۋى ءۇشىن قاجەتتى جاعدايلاردى جاساپ كەلەدى. بۇگىندە جاس­تاردى قولداۋعا باعىتتال­عان كوپتەگەن مەملەكەتتىك باعدارلاما قابىل­داندى. مىسالى, «بولاشاق» باعدار­لاماسى. 20 جىلدان بەرى وسى باعدارلاما بويىنشا ەلىمىزدىڭ تالاپتى جاستارى الەمنىڭ جەتەكشى وقۋ ورىن­دارىندا تەگىن ءبىلىم الىپ كەلەدى. بۇگىندە اتال­عان باعدارلامانىڭ 10 مىڭ قاتىسۋ­شىسى ەلى­مىزدىڭ تۇكپىر-تۇكپىرىندە, ەكونوميكانىڭ ءتۇرلى سالالارىندا ەڭبەك ەتىپ ءجۇر. ءبىز قولداۋ تانىتىپ كەلە جاتقان ەكىنشى باعدارلاما – «جاسىل ەل», – دەدى ءوزىنىڭ سوزىندە بەردىبەك ساپارباەۆ. ونىڭ ايتۋىنشا, 2016 جىلى وڭىردە وسى باعدارلامانى جۇزەگە اسىرۋ ءۇشىن 300 ميلليون تەڭگە بولىنگەن. ايماقتا جاس عالىمدار كەڭەسى قۇرىلعان, وعان كوپتەگەن تالانتتى جاستار كىرسە, ولاردى قولداۋعا دا 100 ميلليون تەڭگە ءبولىنىپ وتىر. سونداي-اق, جاستار رەسۋرستىق ورتالىعى مەن «اقتوبە جاستارى» ۇيىمى جۇمىس ىستەيدى. «ءبىز جاستار ماسەلەسىمەن اينالىساتىن ۇيىمداردىڭ ءبىر باعىتتا بىرلەسە وتىرىپ جۇمىس جاساعاندارىن قالايمىز», – دەدى بەردىبەك ماشبەك ۇلى. وتكىزىلىپ جاتقان شارانىڭ ماڭىزى تۋرالى «جاسىل ەل» جاستار ەڭبەك جاساعى رەسپۋبليكالىق شتابىنىڭ جەتەكشىسى راحات حاميدۋللين باياندادى. سلەت بارىسىندا اۋىل جاستارى اراسىنان شارۋالار مەن بيزنەسمەندەردىڭ, جاستار ۇيىمدارى كوشباسشىلارىنىڭ جوبالارى تانىستىرىلدى. شارا بارىسىندا, سونىمەن بىرگە, رەسپۋبليكالىق «گۇلدەنە بەر, تۋعان ەل!» مارافون-ەستافەتاسى اكتسياسى جانە فورمالدى ەمەس پىكىرتالاس الاڭدارى ۇيىمداستىرىلدى. سلەتكە قاتىسۋشىلار اعاش كوشەتتەرىن وتىرعىزدى. ءتۇرلى كونكۋرستار وتكىزىلدى. ساتىبالدى ءساۋىرباي, «ەگەمەن قازاقستان» اقتوبە وبلىسى