وسكەمەن. 25 مامىر. بۇگىن وبلىستىڭ بارلىق مەكتەپتەرىندە وقۋ جىلىنىڭ اياقتالۋىنا ارنالعان سوڭعى قوڭىراۋ مەرەكەسى ءوتتى. بۇل تۋرالى شىعىس قازاقستان وبلىسى اقپاراتتىق ورتالىعىنا سىلتەمە جاساعان egemen.kz ءتىلشىسى حابارلادى.
سالتاناتتى جيىندا الداعى ءداستۇرلى ەمتيحاندار مەن ۇبت سىناعىن تاپسىراتىن مەكتەپ ءبىتىرۋشى تۇلەكتەرگە ەرەكشە نازار اۋدارىلاتىنى بەلگىلى.
وسكەمەن قالاسىنداعى №43 مەكتەپتە وقۋ جىلىنىڭ قورىتىندىسى شىعارىلىپ, ۇزدىك وقۋشىلار ماراپاتتالدى. سونىمەن قاتار, مەرەكەلىك كونتسەرتپەن جالعاسقان جيىندا وبلىس اكىمىنىڭ ورىنباسارى جاقسىلىق ومار مۇعالىمدەردىڭ ادال ەڭبەگىنە ريزاشىلىعىن ءبىلدىردى.
«سىزدەر ءۇشىن بۇگىن ەرەكشە كۇن. الدا ءومىردىڭ جاڭا كەزەڭى باستالادى. ارقايسىلارىڭىز قوعامدا لايىقتى ورىندارىڭىزدى تابادى دەگەن سەنىمدەمىن. ۇبت سىناعىن ويداعىداي تاپسىرىپ, العا قويعان جوسپارلارىڭىزدى ساتىمەن جۇزەگە اسىرۋلارىڭىزعا تىلەكتەسپىن. كەزدەسكەن قيىندىقتار سىزدەردى شىڭداي ءتۇسسىن, ارماندارىڭىزعا جەتۋگە جەتەلەسىن!» – دەدى جاقسىلىق ومار.
بيىل شىعىس وڭىرىندە 5727 وقۋشى ۇبت, ال 2446 وقۋشى ءداستۇرلى ەمتيحان تاپسىرادى. دەنساۋلىعىنا بايلانىستى 206 ءبىتىرۋشى ەمتيحاننان بوساتىلدى. ال «التىن بەلگىگە» ۇمىتكەرلەردىڭ سانى 402 ادامدى قۇراسا, ۇزدىك اتتەستاتقا بىتىرۋشىلەر سانى – 165.
دۋمان اناش.
دەرەك, فوتو: شىعىس قازاقستان وبلىسى اقپاراتتىق ورتالىعى.
