جاقىپ اسانوۆ مالايزيانىڭ باس پروكۋرورىمەن كەزدەستى

استانا. 25 مامىر. قازاقستاننىڭ باس پروكۋرورى جاقىپ اسانوۆ مالايزيانىڭ باس پروكۋرورى موحامەد اپاندي بين اليمەن كەزدەسۋ وتكىزدى. بۇل تۋرالى باس پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. جاقىپ اسانوۆ مالايزيالىق ارىپتەسىن قازاق جەرىندە قارسى الا وتىرىپ, قۇقىقتىق سالاداعى ەكىجاقتى قاتىناستاردىڭ دوستىق جانە سىندارلى سيپاتىن اتاپ ءوتتى. سۇحباتتاسۋ بارىسىندا باس پروكۋرور پروكۋراتۋرا ورگاندارى قىزمەتىنىڭ نەگىزگى باعىتتارى, سونداي-اق, شارتتىق-قۇقىقتىق نەگىزدى كەڭەيتۋ جانە نىعايتۋ ءۇشىن اتقارىلىپ جاتقان جۇمىستار تۋرالى مالىمەت بەردى. سۇحباتتاسۋشىلار ءوزارا قىزىعۋشىلىق تۋدىراتىن كەڭ اۋقىمدى ماسەلەلەردى تالقىلاپ, حالىقارالىق كۇن تارتىبىندەگى اسا وزەكتى پروبلەمالار جايلى وزدەرىنىڭ وي-پىكىرلەرىن ايتتى. ەكى ەل مەكەمەلەرىنىڭ باسشىلارى ەكىجاقتى قۇقىقتىق ىنتىماقتاستىقتىڭ ەداۋىر الەۋەتىن اتاپ ءوتىپ, لاڭكەستىككە قارسى تۇرۋ, ۇلتتىق جانە حالىقارالىق قاۋىپسىزدىكتى قامتاماسىز ەتۋ شەڭبەرىندە كۇش بىرىكتىرۋدىڭ ەرەكشە وزەكتىلىگىن اتاپ ءوتتى. كەزدەسۋ بارىسىندا ۇستاپ بەرۋ تۋرالى جانە قىلمىستىق ىستەر بويىنشا ءوزارا قۇقىقتىق كومەك تۋرالى مەملەكەتارالىق شارتتاردى جاساسۋ ماسەلەلەرى تالقىلاندى. كەلىسسوزدەر ناتيجەلەرى بويىنشا, تاراپتار قازاقستان رەسپۋبليكاسىنىڭ باس پروكۋراتۋراسى مەن مالايزيانىڭ باس پروكۋراتۋراسى اراسىنداعى ءوزارا تۇسىنىستىك تۋرالى مەموراندۋمعا قول قويدى. اتالمىش قۇجاتقا قول قويۋ ءوزارا ىقپالداستىقتىڭ دامۋىنا, قۇقىقتىق سالاداعى اقپارات جانە وزىق تاجىريبەمەن الماسۋعا جاڭا سەرپىن بەرەدى. كەزدەسۋ سوڭىندا تاراپتار قۇزىرەتتى ورگاندارى اراسىندا قىلمىسقا قارسى تۇرۋ, زاڭدىلىق پەن قۇقىقتىق ءتارتىپتى قامتاماسىز ەتۋ ماسەلەلەرىندە ىقپالداستىقتىڭ قالىپتاسقان دەڭگەيىن ريزاشىلىقپەن اتاپ ءوتتى. سونىمەن قاتار, ولار شارتتىق-قۇقىقتىق نەگىزدى كەڭەيتۋگە دايىن ەكەندىكتەرىن راستادى. تالعات رايىمبەك. دەرەك,فوتو: باس پروكۋراتۋرانىڭ ءباسپاسوز قىزمەتى.