قازاقستان زاڭى جوعارى حالىقارالىق باعالاۋعا يە بولدى

جاقىندا جەنەۆادا وتكەن اقپاراتتىق قوعام ماسەلەلەرى جونىندەگى دۇنيەجۇزىلىك فورۋمعا قاتىسۋشىلار ەلىمىزدىڭ «اقپاراتقا قول جەتكىزۋ تۋرالى» زاڭىن قاراپ, ساراپشىلىق توپ مۇشەلەرى بارىنشا كوپ وڭ رەتسەنزيالار بەردى. وسى جايىندا ماجىلىسكە حالىقارالىق ەلەكتر بايلانىستارى وداعىنىڭ باس حاتشىسى حوۋلين چجاو مىرزانىڭ اتىنان العىس حات كەلىپ ءتۇستى. فورۋمعا قاتىسۋشىلار قازاقستان پارلامەنتى ءماجىلىسىنىڭ ەل ازاماتتارى ءۇشىن قولايلى اقپاراتتىق ورتا قۇرۋعا قاتىستى ەلەۋلى كۇش-جىگەرىن ەرەكشە اتاپ وتكەن. 2015 جىلعى 16 قاراشادا «اشىق ۇكىمەت» قۇرۋ ءۇشىن زاڭنامالىق بازا دايىنداعان «اقپاراتقا قول جەتكىزۋ تۋرالى» زاڭ قابىلداندى. زاڭنىڭ نەگىزگى يدەيا­سى ازاماتتاردىڭ اقپارات الۋداعى كونستي­تۋتسيا­لىق قۇقىعىن ىسكە اسىرۋ بولىپ تابىلادى. زاڭمەن اقپارات بەرۋگە مىندەتتى سۋبەكتىلەر ءتىز­بەسى ۇلعايتىلدى, اقپارات تۇرلەرى, ولاردى ۇسىنۋ ءتاسىل­دەرى جۇيەگە ءتۇسىرىلىپ, كەڭەيتىلدى, مەملەكەتتىك ورگاندار باسشىلارىنىڭ جىل سايىنعى اشىق باياندامالار جاساۋ پراكتيكاسى ەنگىزىلدى. ازاماتتار مەن زاڭدى تۇلعالاردىڭ اقپارات الۋعا قۇقىقتارىن ىسكە اسىرۋ ماقساتىندا «ەلەكتروندى ۇكىمەت» ۆەب-پورتالىنىڭ ءتيىستى كومپونەنتتەرىندە بىرىڭعاي مودۋل جاسالدى, ول «اشىق دەرەكتەر», «اشىق نقا», «اشىق بيۋدجەت» سياقتى ءۇش كومپونەنتتەن تۇرادى. جىل سوڭىندا «مەملەكەتتىك ورگاندار قىزمەتىنىڭ تيىمدىلىگىن باعالاۋ» سياقتى ءتورتىنشى كومپونەنتتى اشۋ جوسپارلانىپ وتىر. تۇتاستاي العاندا, «اقپاراتقا قول جەتكىزۋ تۋرالى» زاڭ مەملەكەتتىك ورگاندار قىزمەتىنىڭ اشىقتىعىن قامتاماسىز ەتەدى, ازاماتتاردىڭ مەملەكەتتى باسقارۋ­داعى قۇقىقتارى مەن مۇمكىندىكتەرىن كەڭەيتىپ, سىبايلاس جەمقورلىقپەن كۇرەستى كۇشەيتەدى.  «ەگەمەن-اقپارات»